Rhangisa Swilo Swa Nkoka Swinene Emahlweni

¹ Hi swihi swilo swin’wana swa nkoka swinene leswi nga ni ntikelo eka vuhlayiseki bya hina bya moya? Entiyisweni leswi swi katsa dyondzo ya munhu hi xiyexe, ku va kona eminhlanganweni, ku phikelela exikhongelweni, vanghana lavanene ni vutirheli bya Vukreste. A hi nge swi koti ku hlayisa rihanyo lerinene ra moya loko hi nga rhangisi swilo swa nkoka swinene emahlweni evuton’wini bya hina.

² Hambiswiritano, hinkwerhu ka hina hi lwisana ni ku navela ka nyama naswona ha yi lava ndzayo. (Gal. 5:17) A hi fanelanga hi ehleketa leswaku hi ta vuyeriwa swinene hi ku hlongorisa swilo swa vutianakanyi. (Yer. 17:9) Hikwalaho, leswaku hi hlayisa timbilu ta hina ni ku papalata ku hambukisiwa, i swa nkoka leswaku hi tshama hi ri karhi hi tikambela.—Swiv. 4:23; 2 Kor. 13:5.

³ Kambisisa Mbilu Ya Wena N’wini: Leswi u nga swi endla hi ku tivutisa swivutiso leswi kongomeke: Xana ndza swi navela ku hlaya Rito ra Xikwembu? (1 Pet. 2:2) Xana ndza wu vona nkoka wa ku va kona eminhlanganweni hinkwayo ya vandlha? (Hev. 10:24, 25) Xana ndza phikelela exikhongelweni? (Rhom. 12:12) Xana ndzi lava vunghana bya vanhu lava anakanyaka swa moya? (Rhom. 1:11, 12) Xana ndza byi vona vutihlamuleri bya mina hi ndzexe bya ku twarisa mahungu lamanene? (1 Kor. 9:16) Tinhlamulo leti tshembekaka ti ta kombisa leswaku u navela ku rhangisa swilo swa nkoka emahlweni.

⁴ Kambisisa Tirhelo Ra Wena Ra Siku Na Siku: U fanele u landzela ndlela leyi u kambisisaka mbilu ya wena ha yona hi ku simeka swilo leswi u lavaka ku rhanga u swi endla. Leswi swi katsa ku veka nkarhi wa ku hlaya Bibele ni nkandziyiso wun’wana ni wun’wana wa Xihondzo xo Rindza ni Xalamuka! nkarhi na nkarhi, kun’we ni wa ku lunghiselela minhlangano. Nakambe ku fanele ku vekiwa nkarhi wa dyondzo ni ku khongela swin’we tanihi ndyangu. Lawula nkarhi wa ku hlalela TV kumbe wa ku tirhisa khompyutara. Tiyimisele ku va kona eminhlanganweni hinkwayo ya vandlha, naswona u ku rhangisa eka swilo hinkwaswo. Kunguhata ka ha ri emahlweni leswaku ndyangu hinkwawo wu hlanganyela entirhweni wa nsimu vhiki rin’wana ni rin’wana.

⁵ Handle ko kanakana, ku rhangisa swilo swa nkoka swinene emahlweni evuton’wini bya hina swi ta hi tisela ntsako.