I Yini Lexi U Xi Rhangisaka?

¹ Xana u nga xi hlamula njhani xivutiso lexi? Entiyisweni, hinkwerhu ka hina hi navela ku rhangisa timhaka ta Mfumo. (Mat. 6:33) Kambe hi nga tivutisa leswi, ‘Xana leswi ndzi swi hlawulaka swi kombisa leswaku ndzi rhangisa wona?’ Bibele ya hi khutaza, yi ri: “Tshamani mi tikombisa leswi n’wina mi nga swona.” (2 Kor. 13:5) Xana hi nga swi kombisa njhani leswaku hi rhangisa Mfumo?

² Matirhiselo Ya Nkarhi Wa Hina: Hi nga ha sungula hi ku kambisisa ndlela leyi hi wu tirhisaka ha yona nkarhi wa hina. (Efe. 5:15, 16) Xana vhiki ni vhiki hi tirhisa nkarhi wo tanihi kwihi hi endzela vanghana, hi hlalele thelevhixini, hi langute Internet kumbe hi tihungasa? Loko ho tsala nkarhi lowu hi wu hetaka eka swilo sweswo kutani hi wu ringanisa ni lowu hi wu hetaka eka swilo swa moya, hi ta hlamala. Xana hi heta nkarhi lowu engetelekeke entirhweni wo tihanyisa, hi teka ni nkarhi lowu a wu fanele wu ri wa timhaka ta swa moya leswaku hi ta kota ku hanya vutomi bya vulovolovo? Xana hi xwa kangani eminhlanganweni kumbe ensin’wini leswaku hi teka maendzo hi ya eku tihungaseni?

³ Rhangisa Swilo Swa Nkoka: Vo tala va hina a hi na nkarhi lowu eneleke wo endla xin’wana ni xin’wana lexi hi xi lavaka. Kutani leswaku hi rhangisa timhaka ta Mfumo, hi fanele hi kambisisa swilo leswi nga swa nkoka evuton’wini kutani hi hlela nkarhi wo endla “swilo [leswi nga] swa nkoka swinene.” (Filp. 1:10) Swilo swa nkoka swi katsa ku dyondza Rito ra Xikwembu, ku ya ensin’wini, ku khathalela vandyangu ni ku ya eminhlanganweni ya Vukreste. (Ps. 1:1, 2; Rhom. 10:13, 14; 1 Tim. 5:8; Hev. 10:24, 25) Swilo swin’wana swo tanihi vutiolori ni vuhungasi lebyi ringaniseriweke swa pfuna. (Mar. 6:31; 1 Tim. 4:8) Kambe swilo leswi, leswi nga riki swa nkoka a swi fanelanga swi endliwa hi nkarhi lowu nga wa swilo swa nkoka.

⁴ Makwerhu un’wana la ha riki muntshwa a a lava ku rhangisa Mfumo hi ku va a nghenela ntirho wo va muchumayeri wa nkarhi hinkwawo ku ri ni ku va a dyondzeka leswaku a ta kuma ntirho wo nyawula. Hikwalaho, u dyondze ririmi rin’wana kutani a rhurhela laha ku nga ni xilaveko lexikulu. U te: “Ndza tiphina haleni. Nsimu yi ndzi phyuphyisa ngopfu! Ndzi navela onge muntshwa un’wana ni un’wana a nga endla ku fana na mina a titwisa leswi ndzi tiphinaka ha swona. A ku na nchumu wo antswa ku tlula ku tirhela Yehovha hi matimba ya hina hinkwawo.” Ina, ku rhangisa Mfumo swi hi tisela mikateko, kambe xa nkoka ngopfu swi tsakisa Tata wa hina la nge matilweni, Yehovha.—Hev. 6:10.