Tirhisa Nkarhi Wa Wena Hi Vutlharhi
1 Ku navela ka hina ku tsakisa Yehovha ku hi susumetela ku rhangisa mintirho ya swa moya evuton’wini bya hina. Rito ra yena ri hi lerisa leswaku hi ‘hambeta hi lava mfumo ku sungula’ ni ku “tiyiseka hi swilo swa nkoka swinene.” (Mat. 6:33; Filp. 1:10) Xana hi nga wu xava njhani nkarhi wo yisa timhaka ta Mfumo emahlweni, ivi hi veka swilo leswi nga riki swa nkoka etlhelo?—Efe. 5:15-17.
2 Rhangisa Mintirho Ya Swa Moya: Endla xiyimiso lexi nga ta ku pfuna leswaku nkarhi wa wena wu nga dyiwi hi swilo leswi swi nga riki swa nkoka. Loko n’hweti yi sungula, van’wana va fungha masiku yo karhi eka khalendara, lawa va nga ta ma tirhisela ntsena ku ya ensin’wini. Kutani va tiyiseka leswaku a ku na nchumu lowu va kavanyetaka. Hi nga endla leswi fanaka leswaku hi kuma nkarhi wo ya eminhlanganweni, wa dyondzo ya munhu hi yexe ni wo ya emintsombanweni. Vanhu vo tala va ni xiyimiso xa siku ni siku xo dyondza Bibele nimixo kumbe nimadyambu. Veka nkarhi wo endla ntirho wun’wana ni wun’wana wa nkoka naswona u nga pfumeleli nchumu wu ku kavanyeta swi nga fanelanga.—Ekl. 3:1; 1 Kor. 14:40.
3 Pima Matirhiselo Ya Swilo Swa Misava: Ematikweni man’wana, mintlango, vuhungasi, ni swin’wana swa ku tirivatisa swi tshama swi ri kona. Vo tala va heta nkarhi wo tala va hlalele thelevhixini kumbe va tirhisa khompyuta. Hambiswiritano, swi le rivaleni leswaku ku tshama hi khomekile hi swilo swo tihungasa swa misava leyi swi ta hetelela swi hi vangele gome. (1 Yoh. 2:15-17) Hikwalaho, Matsalwa ma hi khutaza leswaku hi nga tirhisi misava leyi hi xitalo. (1 Kor. 7:31) Loko hi yingisa ndzayo leyi ya vutlhari hi ta va hi komba Yehovha leswaku vugandzeri bya yena i bya nkoka evuton’wini bya hina.—Mat. 6:19-21.
4 Mafambiselo lawa ya swilo ma saleriwe hi nkarhi wutsongo. Lava va rhangisaka timhaka ta Mfumo va ta tsaka naswona Xikwembu xi ta va amukela. (Swiv. 8:32-35; Yak. 1:25) Onge hi nga tirhisa nkarhi wa hina wa nkoka hi vutlharhi.