Veka Vuhungasi eNdhawini Ya Byona

¹ Emasikwini lawa yo nonon’hwa, hinkwerhu ka hina ha swi lava ku wisa minkarhi yin’wana. Swi fanerile ku kuma vuhungasi byo karhi. Kambe, ku heta nkarhi wo leha evuhungasini, eku titsakiseni ni le ku buleni ni van’wana swi nga hunguta nkarhi lowu munhu a wu hetaka eka swilo swa moya. Hi fanele hi veka vuhungasi endhawini ya byona. (Mat. 5:3) Sweswo swi nga endliwa hi ndlela yihi? Hi ku landzela ndzayo leyi kumekaka eka Vaefesa 5:15-17.

² Tivekele Swipimelo: Pawulo u tsale leswaku Vakreste va fanele ku ‘tshama va ri karhi va xiyisisa’ ku vona loko va tirhisa vutlhari evuton’wini bya vona. Ku ringanisela ni ku tikhoma swa laveka leswaku va nga heti nkarhi wo tala evuhungasini kambe va wu heta eka leswi nga swa nkoka hakunene. I vutlharhi ku anakanyisisa hi ndlela leyi hi wu tirhisaka ha yona nkarhi wa hina wa ku wisa. Vuhungasi byi fanele byi tirhiseriwa xikongomelo xo karhi lexi vuyerisaka ematshan’wini yo hi endla hi titwa onge hi tlange hi nkarhi wa hina kumbe byi hi siya hi karhele. Loko ku ri leswaku endzhaku ka vuhungasi hi titwa hi nga enerisekanga, hi nga vuyeriwanga ha chumu naswona hi biwa hi ripfalo, sweswo swi kombisa leswaku hi fanele ku lulamisa ndlela leyi hi wu tirhisaka ha yona nkarhi wa hina.

³ Vana La Ringaniselaka: Pawulo u nyikele ndzayo ya ku “tixavela nkarhi lowunene” wa swilo leswi nga swa nkoka swinene evuton’wini, hi nga vi ‘lava nga ringaniseliki.’ Vakreste lava tinyiketeleke a va fanelanga va dzikisa vutomi bya vona evuhungasini. Hambileswi ku wisa ni ku hungasa swi nga hi phyuphyisaka emirini, xihlovo xa matimba ya moya i matimba lama tirhaka ya Xikwembu. (Esa. 40:29-31) Hi kuma moya wakwe emintirhweni ya swa le tilweni—ku nga ku hlaya Bibele, ku va kona eminhlanganweni ya vandlha ni ku hlanganyela entirhweni wa nsimu—ku nga ri evuhungasini.

⁴ Rhangisa Swilo Leswi Nga Swa Nkoka: Pawulo u letele Vakreste leswaku va ‘hambeta va twisisa leswi ku rhandza ka Yehovha ku nga swona.’ Yesu u dyondzise leswaku leswi hi swi endlaka evuton’wini bya hina swi fanele swi rhangisa Mfumo wa Xikwembu. (Mt. 6:33) I swa nkoka leswaku hi rhanga hi endla swilo leswi nga ta hi pfumelela leswaku hi hanya hi ku pfumelelana ni ku tinyiketela ka hina eka Yehovha. Endzhaku ka sweswo, nkarhi wa vuhungasi wu nga hlayisiwa endhawini ya wona. Loko hi endle tano, hi ta kuma vuyelo lebyinene naswona hi ta byi tsakela swinene.—Ekl. 5:12.