Ndlela Yo Londzovota Nkarhi

¹ Loko hi ri ni swo tala swo swi endla entirhweni wa Yehovha swi hi endla hi tshama hi khomekile! (1 Kor. 15:58) Hi xiya xilaveko xa dyondzo ya munhu hi xiyexe ni ya ndyangu, ku hlaya Bibele siku na siku, ku lunghiselela ni ku va kona eminhlanganweni ni ku hlanganyela evutirhelini bya nsimu nkarhi na nkarhi. Valanguteri va ni vutihlamuleri bya vurisi, naswona va khathalela mintirho yin’wana ya vandlha. Van’wana va ni vutihlamuleri byo tika bya ndyangu kumbe mindzhwalo yo hambana-hambana eka van’wana. Leswaku swilo hinkwaswo swi endliwa khwatsi, un’wana ni un’wana u fanele a ringanisela naswona a hleleka.

² Rhangisa Leswi Nga Swa Nkoka: Leswaku hi humelela eku ‘londzovoteni ka nkarhi’ swi titshege hi ku twisisa ni hi langutelo ra hina lerinene. (Ef. 5:15, 16) Hi fanele hi hlawula swilo “leswi nga swinene ku tlula swin’wana” ivi hi swi veka eku sunguleni ka nxaxamelo wa hina wa swilo leswi nga swa nkoka. (Flp. 1:10) Mpatswa wun’wana wu hlamusele ndyangu wa wona lowu rhangisaka swilo swa le tilweni hi ndlela leyi: “Hi tata vutomi bya hina hi ntiyiso . . . Ntiyiso a hi xiphemu xa vutomi bya hina, i vutomi bya hina. Swilo hinkwaswo swi titshege hi wona.” Ku va munhu a rhangisa vugandzeri ni ntirho wa Yehovha evuton’wini i swa nkoka.

³ Tiva Swilo Leswi Dyaka Nkarhi: Ku ni tiawara ta 168 evhikini, naswona hi fanele hi tirhisa nkarhi lowu hi nga na wona hi vutlhari. Leswaku hi va ni nkarhi lowu ringaneke wa mintirho ya swa le tilweni, hi fanele hi tiva ni ku hunguta swilo leswi dyaka nkarhi. Nkambisiso wun’wana wu paluxe leswaku vanhu lavakulu le United States hi xiringaniso va heta tiawara to tlula 30 hi vhiki va hlalele TV! Van’wana, va heta nkarhi wo tala va ri eku hlayeni ka tibuku ta misava. Van’wana va nga ha xiya leswaku va heta nkarhi lowo tala ngopfu eku tihungaseni, eswintirhwanini swo tihungasa, emintlangwini kumbe emintlangwini yo karhi ya khompyuta. Hi fanele hi xiyisisa tirhelo ra hina ra siku na siku leswaku hi ta vona ndlela leyi hi nga tirhisaka nkarhi wa hina hi ndlela leyinene ha yona. Vutlhari bya laveka leswaku hi ta hunguta nkarhi wo tala lowu hi wu tirhiselaka swilo leswi nga riki swa nkoka.

⁴ Simeka Tirhelo Lerinene: Ku nga khathariseki leswi swiyimo swa hina swi nga xiswona, un’wana ni un’wana a nga wu londzovota nkarhi leswaku a rhangisa timhaka ta swa moya. Van’wana va kume leswaku loko va hatla va sungula mintirho ya siku rin’wana ni rin’wana swi va pfuna ku hetisisa swilo swo tala. Loko hi heta nkarhi wo tala hi ri endleleni yo ya entirhweni kumbe hi yimele van’wana, hi nga ha tirhisa wun’wana wa nkarhi wolowo leswaku hi hlaya Bibele, hi lunghiselela minhlangano kumbe hi yingisela mhaka leyi humesiweke hi Sosayiti eka tikhasete. Mindyangu ya vuyeriwa swinene hi ku veka nkarhi wo karhi etlhelo wo dyondza kun’we nkarhi na nkarhi. Loko xirho xin’wana ni xin’wana xi hlayisa nkarhi wa dyondzo ya ndyangu, hinkwavo va vuyeriwa.

⁵ Eka siku rin’wana ni rin’wana leri hundzaka, hi fanele hi swi vona kahle leswaku “nkarhi a wa ha ri kona.” (1 Kor. 7:29) Vutomi bya hina byi titshege hi ndlela leyi hi tirhisaka nkarhi wa hina wa risima lowu saleke. Hi ta katekisiwa loko hi londzovota nkarhi lowu leswaku hi ta rhangisa swilaveko swa Mfumo emahlweni!—Mt. 6:33.