Xiyisisa Ndlela Leyi U Tirhisaka Nkarhi Wa Wena Ha Yona
1. Hi wihi ntlhontlho lowu vanhu va langutaneke na wona kun’wana ni kun’wana namuntlha?
1 Eminkarhini leyi, laha ku nga ni switirho leswi londzovotaka nkarhi swi tlhela swi hunguta ntirho, vo tala va tikuma va ri ni swo tala swo swi endla kambe nkarhi wa ku swi endla wu ri wutsongo. Xana u swi kuma swi tika ku landzelela xiyimiso lexinene xo endla swilo swa moya? Xana u navela onge u nga va ni nkarhi wo tala wo endla ntirho wa nsimu? I yini lexi nga hi pfunaka leswaku hi wu tirhisa kahle nkarhi wa hina?—Ps. 90:12; Filp. 1:9-11.
2, 3. Xana hi yihi mintlhontlho leyi tisiwaka hi thekinoloji leyi endlaka leswaku rungula ri kumeka hi ku olova, naswona xana un’wana ni un’wana wa hina a nga tikambisisa njhani?
2 Kuma Swilo Leswi Swi Ku Dyelaka Nkarhi: Hinkwerhu ka hina nkarhi na nkarhi hi fanele hi languta ndlela leyi hi wu tirhisaka ha yona nkarhi wa hina. Bibele ya hi khutaza: “Tshamani mi ri karhi mi languta leswaku ndlela leyi mi fambaka ha yona a yi fani ni ya lava nga tlharihangiki kambe yi fana ni ya vanhu vo tlhariha, mi tixavela nkarhi lowunene, hikuva masiku ma hombolokile.” (Efe. 5:15, 16) Xiya mintlhontlho leyi tisiwaka hi thekinoloji leyi endlaka leswaku rungula ri kumeka hi ku olova. Hambileswi tikhompyutara ni swilo swa michini yin’wana swi pfunaka, swi nga va ntlhamu loko hi tsandzeka ku xiya ndlela leyi hi wu tirhisaka ha yona nkarhi wa hina.— 1 Kor. 7:29, 31.
3 Un’wana ni un’wana wa hina u fanele a tivutisa: ‘Xana siku na siku ndzi dya nkarhi hi ku hlaya kumbe ku hlamula marungula ya E-mail lama nga riki ya nkoka? Xana nkarhi wo tala ndzi tikuma ndzi vulavula hi riqingho kumbe ndzi rhumela marungula lama nga riki ya nkoka? (1 Tim. 5:13) Xana ndzi tikuma ndzi valanga endzeni ka Internet ndzi ri hava xikongomelo kumbe ndzi cinca-cinca switichi loko ndzi hlalele thelevhixini? Xana ku khomeka ngopfu hi michini leyi nga ni mintlango se swi sungule ku dya nkarhi wa mina wo dyondza Rito ra Xikwembu?’ Mintlhamu leyi leyi tumbeleke yi nga ha hi tekela vumoya bya hina.—Swiv. 12:11.
4. Hi wihi ndzulamiso lowu muntshwa un’wana a wu endleke naswona ha yini?
4 Ku Tirhisa Nkarhi Hi Vutlhari: Swingolongondzwana swa thekinoloji hakanyingi swi dya nkarhi ni nyingiso wa hina. Muntshwa un’wana loyi a a khomeka ngopfu hi mintlango ya khompyuta u te: “Minkarhi yin’wana, loko ndzi yi tlanga ndzi nga si ya ensin’wini kumbe eminhlanganweni ya Vukreste, ndzi swi kuma swi tika ku nyikela nyingiso. Minkarhi yo tala a ndzi anakanya hi ndlela leyi ndzi nga ta xi tlhantlha ha yona xiphiqo entlangweni wo karhi loko ndzi fika ekaya. A ndzi nga ha swi koti ku endla dyondzo ya munhu hi xiyexe ni ku hlaya Bibele. Ndzi sungule ku ka ndzi nga ha swi tsakeli ngopfu ku tirhela Xikwembu.” Hi ku xiya leswaku u fanele a endla mindzulamiso yo karhi, u sule mintlango hinkwayo leyi a yi ri eka khompyuta yakwe. U ri: “Leswi a a swi tika swinene. A ndzi nga swi xiyi leswaku ndzi yi rhandzisa xileswi mintlango. Kambe ndzi tlhele ndzi titwa ndzi tsakile hikuva a ndzi swi tiva leswaku leswi ndzi swi endleke swi ta pfuna mina.”—Mat. 5:29, 30.
5. Xana hi nga wu xava njhani nkarhi wo endla swilo swa moya, naswona swi ta hi pfuna njhani ku endla leswi?
5 Swi nga ha lava leswaku u teka magoza lama fanaka loko ku ri ni tindhawu leti u faneleke u lulamisa swo karhi eka tona. Xana u nga tixavela hafu ya awara siku na siku eka swilo leswi nga riki swa nkoka? Hi xiringaniso lowu i nkarhi lowu wu ringaneke leswaku u heta ku hlaya Bibele hinkwayo hi lembe. Hakunene leswi swi nga ku vuyerisa hi tlhelo ra moya! (Ps. 19:7-11; 119:97-100) Veka nkarhi wo hlaya Bibele, wo lunghiselela minhlangano ni ntirho wa nsimu. (1 Kor. 15:58) Ku endla tano swi ta ku pfuna leswaku u kota ku papalata swilo leswi dyaka nkarhi naswona swi ta ku pfuna ku “twisisa leswi ku rhandza ka Yehovha ku nga swona.”—Efe. 5:17.