Hanyela Ku Endla Ntirho Wa Yehovha

¹ Yesu u fanise vayingiseri vakwe ni mixaka yimbirhi ya vaaki. Un’wana u ake xisekelo xa vutomi byakwe eribyeni lerikulu hi ku yingisa Kreste naswona u swi kotile ku langutana ni maxangu ni nkaneto lowukulu hilaha ku humelelaka. Lowun’wana u ake esaveni hikwalaho ka vutianakanyi ni ku nga yingisi naswona a nga swi kotanga ku yima a tiyile loko nhlomulo wu fika. (Mat. 7:24-27) Hi langutana ni swidzedze swo tala swa maxangu hikwalaho ka leswi hi hanyaka emakumu ya mafambiselo lawa ya swilo. Emahlweni, mapapa ya ntima ya nhlomulo lowukulu ma karhi ma hlengeletana hi ku hatlisa. Xana hi ta swi kota ku tiyisela ku ya fika emakumu ripfumelo ra hina ra ha tiyile? (Mat. 24:3, 13, 21) Swo tala swi titshege hi ndlela leyi hi vekaka ha yona xisekelo xa vutomi bya hina sweswi. Xisweswo, i swa xihatla leswaku hi tivutisa, ‘Xana ndzi aka xisekelo xa vutomi bya mina bya Vukreste hi ku endla ntirho wa Xikwembu?’

² Xana swi vula yini ku hanyelo ku endla ku rhandza ka Yehovha? Swi vula ku endla Yehovha a va wa nkoka evuton’wini bya hina. Swi katsa ku endla Mfumo wu va nchumu wa risima eka hina. Swi fambisana ni ku yingisa Xikwembu eka swiendlo hinkwaswo leswi hi swi endlaka evuton’wini bya hina bya siku ni siku. Swi lava leswaku hi tinyiketa hi mbilu ya hina hinkwayo edyondzweni ya hina ya Bibele ya munhu hi xiyexe, ya ndyangu ni ya vandlha ni le vutirhelini bya hina bya nsimu, hi rhangisa swilo leswi. (Ekl. 12:13; Mat. 6:33) Ku yingisa ko tano ku endla leswaku hi va ni ripfumelo leri tiyeke ku fana ni ribye leri nga taka ri nga wi loko hi langutane ni swidzedze swin’wana ni swin’wana swa maxangu lawa ma nga ha vaka kona.

³ Swa tsakisa ku vona vanhu va timiliyoni va aka xisekelo xa vutomi bya vona ni mintshembo ya vona ya vumundzuku evutirhelini bya Xikwembu hi ku tiyiseka, hilaha Yesu a endleke hakona. (Yoh. 4:34) Nkarhi na nkarhi va namarhela xiyimiso xa mintirho ya swa le tilweni naswona va kuma mikateko leyi fuweke hikwalaho ka sweswo. Manana un’wana u hlamusele ndlela leyi yena ni nuna wakwe va va kuriseke ha yona vana va vona vambirhi va vafana hilaha ku humelelaka leswaku va tirhela Yehovha: “Hi tate vutomi bya hina hi ntiyiso—a hi ya emintsombanweni hinkwayo, hi lunghiselela minhlangano ni ku va kona eka yona, ni ku endla ntirho wa nsimu nkarhi hinkwawo evuton’wini bya hina.” Nuna wakwe u engeterile: “Ntiyiso a hi xiphemu xa vutomi bya hina, wona hi woxe i vutomi bya hina. Hinkwaswo swi titshege hi wona.” Xana na wena u rhangisa ntirho wa Yehovha edyangwini wa wena?

⁴ Hlela Xiyimiso Lexi Tirhaka Xa Vhiki Ni Vhiki: Nhlengeletano ya Yehovha ya hi pfuna leswaku hi landzelela ntila lowunene wa moya hi ku hlela minhlangano ya ntlhanu hi vhiki. Vakreste lava va akaka xisekelo xa vutomi bya vona eku gandzeleni ka Yehovha va hlela timhaka ta vona ta munhu hi xiyexe ni ta ndyangu hi ndlela leyi va pfumelelaka ku va kona eminhlanganweni leyi hinkwayo ya nkoka. A va pfumeleli timhaka leti nga riki ta nkoka ngopfu leswaku ti va kavanyeta, va nga swi koti ku va kona nkarhi hinkwawo.—Filp. 1:10; Hev. 10:25.

⁵ Vakreste lava wupfeke va swi xiya leswaku tanihi leswi swi nga swa nkoka ku dya siku ni siku hi nkarhi wo karhi, xisweswo i swa nkoka ku va ni xiyimiso xa dyondzo ya munhu hi xiyexe ni ya ndyangu, ku katsa ni ku lunghiselela minhlangano. (Mat. 4:4) Xana u nga swi kota ku vekela etlhelo timinete ta 15 kumbe ta 20 siku ni siku leswaku ti va ta dyondzo ya munhu hi xiyexe? Xilotlelo xa kona i ku alela nchumu wun’wana ni wun’wana leswaku wu nga kavanyeti nkarhi lowu u wu vekeleke etlhelo leswaku wu va wa ku dyondza. Swi endle mukhuva lowunene. Leswi swi nga koxa leswaku mixo wun’wana ni wun’wana u pfuka emahlweninyana ka nkarhi lowu u pfukaka ha wona sweswi. Swirho swa ndyangu wa Bethele wa misava hinkwayo swa 17000 swi pfuka nimpundzu leswaku swi bula hi ndzimana ya siku. Ina, ku pfuka nimpundzu swi lava leswaku u etlela hi nkarhi lowu faneleke nimadyambu leswaku u ta swi kota ku sungula siku leri landzelaka u lunghekile naswona u wisile.

⁶ Loko u ri nhloko ya ndyangu, teka goza ku sungula ro kunguhata ni ku hlela xiyimiso xa timhaka ta swa le tilweni xa ndyangu wa wena. Mindyangu yin’wana loko yi ri karhi yi xuxa endzhaku ko lalela yi hlaya Bibele, Yearbook, kumbe minkandziyiso yin’wana. Vatswari vo tala lava va voneke vana va vona va kula va va Vakreste va moya lava tiyeke va vula leswaku nchumu wun’wana lowu va pfuneke leswaku va humelela a ku ri mukhuva lowu a wu ri kona endyangwini, wa ku veka madyambu man’we vhiki rin’wana ni rin’wana ma va nkarhi wa ku akana swin’we hi tlhelo ra moya. Un’wana wa vatatana volavo u te: “Ndzi vona onge lexi ku nga xona xi endleke leswaku vana va hina va kula hi tlhelo ra moya a ku ri dyondzo ya hina ya ndyangu ya nkarhi hinkwawo hi Ravunharhu nimadyambu, leyi hi yi sunguleke kwalomu ka malembe ya 30 lama hundzeke.” Vana vakwe ha vanharhu ka vona va khuvuriwe va ha ri vatsongo, naswona hi ku famba ka nkarhi hi vunharhu bya vona va nghenele vutirheli bya nkarhi hinkwawo. Ku engetela eka dyondzo ya ndyangu, ku nga ha pfuxetiwa tinkulumo ta nhlangano kumbe swingheniso swa le ntirhweni wa nsimu, ni mintirho yin’wana leyi akaka mi nga yi endla swin’we.

⁷ Exiyimisweni xa wena xa vhiki ni vhiki, xana u ‘xave’ nkarhi wa ku chumayela hi Mfumo? (Kol. 4:5) Vo tala va hina a hi na nkarhi, hi ni vutihlamuleri bya ndyangu ni bya le vandlheni lebyi hi faneleke hi byi khathalela. Loko hi nga endli malunghiselelo lama tiyeke ya ku hlanganyela entirhweni wo chumayela ni ku dyondzisa vhiki ni vhiki, swi nga ha olova ngopfu leswaku swilo swin’wana swi kavanyeta ntirho lowu wa nkoka. N’wini wa ndhawu yo kurisela eka yona tihomu u te: “Kwalomu ka va 1944 ndzi vone leswaku ndlela leyi ndzi nga yi tirhisaka ntsena leswaku ndzi va evutirhelini a ku ri ku veka siku ra byona. Ku fikela namuntlha, a ndzi tirhi siku rin’we exikarhi ka vhiki leswaku ndzi ya evutirhelini.” Nkulu un’wana wa Mukreste u kume leswaku ku va ni xiyimiso lexi vekeriweke ku nyikela vumbhoni swa n’wi pfuna ku va ni nhlayo-xikarhi ya tiawara ta 15 hi n’hweti entirhweni wo chumayela. Loko a ri ni ntirho wakwe n’wini hi Mugqivela, u wu vekela etlhelo leswaku a ta wu endla endzhaku ka ntirho wakwe wa nsimu wa nimixo. Xana wena ni ndyangu wa wena mi nga veka siku rin’we vhiki rin’wana ni rin’wana leswaku ri va ra vutirheli bya nsimu, mi byi endla xiphemu xa vutomi bya n’wina bya moya?—Filp. 3:16.

⁸ Kambisisa Ntila Wa Vutomi Bya Wena: Ku ni swilo leswi lwisanaka ni ku aka xisekelo xa vutomi bya hina entirhweni wa Yehovha. Swiyimo leswi nga rindzeriwangiki swi nga ha kavanyeta xiyimiso xa hina lexi hi xi kunguhateke kahle xa ku dyondza, xa minhlangano ni vutirheli. Naswona Nala wa hina, Sathana, u ta endla hinkwaswo leswi a nga swi kotaka ku “hingakany[a] ndlela ya hina” ni ku kavanyeta makungu ya hina. (1 Tes. 2:18; Efe. 6:12, 13) U nga pfumeleli swihinga leswi swi ku heta matimba, lerova u lan’wa. Endla mindzulamiso leyi lavekaka leswaku u endla ntirho wa swa le tilweni lowu u wu kunguhateke. Ku laveka ku tiyimisela ni ku phikelela loko u lava ku endla swilo swa nkoka.

⁹ Hi nga tshuki hi pfumelela minkucetelo ya misava ni nkucetelo wo biha wa nyama ya hina leyi nga hetisekangiki leswaku yi sungula mintirho leyi nga riki ya moya leyi nga ha sungulaka ku hi tekela nkarhi ni nyingiso wa hina hilaha ku engetelekeke. Hi fanele hi tikambisisa, hi tirhisa swivutiso swo fana ni leswi: ‘Xana hakatsongo-tsongo ndzi sungule ku hanya hi ndlela leyi pfumalaka ku ringanisela kumbe ndzi lahlekeriwe hi pakani ya mina? Xana ndzi sungule ku aka xisekelo xa vutomi bya hina eswilweni swa misava leyi yi hundzaka? (1 Yoh. 2:15-17) Xana ndzi heta nkarhi wo tanihi kwihi etimhakeni ta munhu hi xiyexe, ku teka riendzo ro titsakisa, mintlango kumbe ku titsakisa kun’wana—ku katsa ni ku hlalela thelevhixini kumbe ndzi ri karhi ndzi valanga Internet—loko ndzi wu pimanisa ni nkarhi lowu ndzi wu tirhiselaka swilo swa moya?’

¹⁰ Loko u vona leswaku vutomi bya wena byi tele hi swilo leswi nga riki swa nkoka, xana u fanele u endla yini? Ku fana na Pawulo loyi a khongeleke leswaku vamakwavo va “ololoxiwa,” kumbe “ku vuyisiwa endleleni,” ha yini u nga kombeli mpfuno eka Yehovha leswaku u tlhela u vuyisa nyingiso wa wena entirhweni wakwe? (2 Kor. 13:9, 11, nhlamuselo ya le hansi eka NW) Endzhaku ka kwalaho tiyimisele ku hanya hi ku landza xiboho xa wena naswona u endla mindzulamiso leyi lavekaka. (1 Kor. 9:26, 27) Yehovha u ta ku pfuna leswaku u nga hambukeli exineneni kumbe eximatsini, leswaku u endla ntirho wakwe hi ku yingisa.—Ringanisa Esaya 30:20, 21.

¹¹ Tshama U Gingiriteka eNtirhweni Wa Xikwembu Lowu Tsakisaka: Vanhu va timiliyoni va hlongorisa ntsako, kambe va kuma leswaku loko vutomi byi tshinela emakumu, swilo leswi vonakaka leswi a va swi hisekela a swi va tiselanga ntsako lowu tshamaka hi masiku. A ku ri “ku lanḍa mheho.” (Ekl. 2:11) Hi hala tlhelo, loko hi hanya hi ku landza swileriso swa Yehovha, ‘hi n’wi veka emahlweni ka hina hi masiku,’ ha eneriseka swinene. (Ps. 16:8, 11) Swi tano hikuva Yehovha hi yena la endleke leswaku hi va kona. (Nhlav. 4:11) Handle ka yena, Muhetisisi Lonkulu wa Swikongomelo, vutomi a byi na xikongomelo. Ku tirhela Yehovha swi endla leswaku vutomi bya hina byi fuwa hi ntirho wa nkoka lowu nga ni xikongomelo lexi vuyerisaka hina swin’we ni van’wana nkarhi hinkwawo, ina, hilaha ku nga heriki.

¹² I swa nkoka leswaku hi nga vi vanhu lava nga khathaliki kutani hi lahlekeriwa hi langutelo ra xihatla malunghana ni makumu lama tshinelaka hi xihatla ya misava ya Sathana. Vutomi bya hina bya siku ni siku byi khumbiwa hi langutelo ra hina ra vumundzuku. Vanhu va le sikwini ra Nowa, lava a va nga kholwi leswaku ku ta va ni ndhambi ya misava hinkwayo, a va ‘lemukanga nchumu,’ va hanye vutomi bya ku hlongorisa swilo swa munhu hi xiyexe—ku dya, ku nwa ni ku nghenela vukati—ku fikela loko ndhambi “yi va kukula hinkwavo.” (Mat. 24:37-39) Namuntlha, lava va hanyaka hi ku landza misava leyi va ta vona mintshembo ya vona ya vumundzuku yi hela emahlweni ka vona loko ku fika ndzoviso lowukulu ngopfu ku tlula lowu munhu a tshameke a langutana na wona, “siku ra Yehovha.”—2 Pet. 3:10-12.

¹³ Kutani, yanani emahlweni mi hanyela ku endla ntirho wa Yehovha, Xikwembu lexi hanyaka ni ku endla ku rhandza ka yena. Ku hava vuvekisi lebyi u nga byi endlaka evuton’wini lebyi, lebyi nga ni Museketeri la tshembekaka ku fana na Yehovha. A nga ka a nga hembi—u ta hetisisa switshembiso swakwe. (Tito 1:2) A nga fi—ku hava lexi vekisiweke eka Yehovha xi nga ta lahleka. (Hab. 1:12; 2 Tim. 1:12) Ku hanya hi ku yingisa ni ku va ni ripfumelo loku hi vekaka xisekelo eka swona sweswi ko va masungulo ya vutomi lebyi nga ta va kona hilaha ku nga heriki entirhweni lowu tsakisaka wa Xikwembu xa hina lexi tsakeke!—1 Tim. 1:11; 6:19.

[Marito lama tshahiweke exihlokweni lama nga eka tluka 3]

“Ntiyiso a hi xiphemu xa vutomi bya hina, wona hi woxe i vutomi bya hina. Hinkwaswo swi titshege hi wona.”