Valanguteri Lava Rhangelaka—Mufambisi Wa Dyondzo Ya Xihondzo Xo Rindza
1 Xihondzo xo Rindza lexi Huwelelaka Mfumo wa Yehovha i lunghiselelo lerikulu ra “hlonga ro tshembeka ni ro tlhariha” ro hi phakela swakudya swa moya “hi nkarhi lowu faneleke.” (Mat. 24:45) Nkulu la fambisaka Dyondzo ya Xihondzo xo Rindza u ni vutihlamuleri lebyikulu tanihi mudyondzisi la nga ni vuswikoti la vekaka xikombiso lexinene xa mahanyelo ya Vukreste.—Rhom. 12:7; Yak. 3:1.
2 Leswaku a dyondzisa hilaha ku humelelaka, mufambisi wa Dyondzo ya Xihondzo xo Rindza u fanele a endla matshalatshala ya xiviri ya ku lunghiselela vhiki rin’wana ni rin’wana. U lunghiselela hi vukheta ni hi xikhongelo. Ku rhandza ka yena vandlha ku tikomba hiloko a swi lwela hakunene ku fikelela timbilu ta hina hi mhaka leyi dyondziwaka. U talela eka tinhla-nkulu ta dyondzo naswona u hi pfuna ku vona ndlela leyi ti fambisanaka ha yona ni mhaka ya xihloko xexo.
3 Loko a lunghiselela kahle, swi vula leswaku u hlaya matsalwa ka ha ri emahlweni leswaku a tiva ndlela leyi ma tirhaka ha yona. U rhangisa Rito ra Xikwembu hi ku khutaza vandlha leswaku ri yi tirhisa kahle Bibele hi nkarhi wa dyondzo. Loko vandlha ri nga yi khumbanga yinhla ya nkoka etinhlamulweni ta rona kumbe ndlela leyi tsalwa-nkulu ri tirhaka ha yona yi nga khumbiwanga, u vutisa xivutiso xin’wana lexi kongomeke leswaku mhaka leyi yi va erivaleni. Hi ndlela leyi, wa hi pfuna leswaku hi fikelela makumu lamanene ni ku tiva ndlela yo swi tirhisa evuton’wini bya hina leswi hi swi dyondzaka.
4 Mufambisi wa Dyondzo ya Xihondzo xo Rindza u fanele a lwela ku antswisa vuswikoti bya yena byo dyondzisa hilaha ku yaka emahlweni. A nga vulavuli ngopfu kambe u khutaza hina leswaku hi hlamula—hi marito ya hina, hi komisa naswona hi ba nhloko ya mhaka. Nkarhi ni nkarhi a nga ha hi tsundzuxa leswaku loyi a hlamulaka ku sungula endzimaneni u fanele a nyikela nhlamulo yo koma, leyi hlamulaka xivutiso lexi tsariweke. Tinhlamulo tin’wana ta vayingiseri ti nga ha hi komba ndlela leyi matsalwa ma tirhaka ha yona, tinhla leti seketelaka rungula ra kona kumbe ndlela leyi dyondzo leyi yi hi khumbaka ha yona. Hi ku bumabumela ku lunghiselela ka munhu hi xiyexe ni hi ndyangu, mufambisi wa Dyondzo ya Xihondzo xo Rindza u lwela ku khutaza un’wana ni un’wana leswaku a navela ku hlamula.
5 Tanihi ‘vanhu lava dyondzisiweke hi Yehovha,’ ha ti rhandza “tinyiko leti nga vanhu,” ku fana ni vafambisi va Dyondzo ya Xihondzo xo Rindza, lava “tirhaka hi matimba eku . . . dyondziseni.”—Esa. 54:13; Efe. 4:8, 11; 1 Tim. 5:17.