Valanguteri Lava Rhangelaka—Vafambisi Va Dyondzo Ya Buku Ya Vandlha
1 I lunghelo ro hlawuleka eka nkulu kumbe nandza wa vutirheli la fanelekaka ku va mufambisi wa Dyondzo ya Buku ya Vandlha. Ku khathalela swilaveko swa moya swa lava nga entlaweni wakwe i vutihlamuleri lebyikulu. Mintirho yakwe yi katsakanyiwe hi swiyenge swinharhu.
2 Vuswikoti Byo Dyondzisa: Swi lava leswaku mufambisi wa Dyondzo ya Buku ya Vandlha a lunghiselela khwatsi vhiki na vhiki leswaku ntlawa wu twisisa dyondzo. U lava leswaku rungula leri dyondziwaka ri tlangeriwa swinene. Ematshan’weni ya ku va a hlamusela ngopfu hi nkarhi wa dyondzo, loko swi laveka u vutisa swivutiso swin’wana leswi faneleke leswaku ku kandziyisiwa tinhla-nkulu ta dyondzo. Ndzhwalo wakwe i ku endla leswaku dyondzo yi tsakisa naswona yi va leyi akaka ni ku endla leswaku un’wana ni un’wana a hlanganyela. Xikongomelo xakwe i ku aka hi tlhelo ra moya, ku kandziyisa mpfuno wa dyondzo ni ku endla leswaku rungula ri fikelela mianakanyo ni mbilu.—1 Tes. 2:13.
3 Vurisi Lebyi Pfunaka: Mufambisi wa Dyondzo ya Buku ya Vandlha u “kotisa šisirelelo loko moya wu hunga, kukota šitšhav̌elo loko šidzedze ši fika.” (Esa. 32:2) U khathalela hinkwavo lava nga entlaweni wakwe ni ku tiyiseka leswaku mpfuno wa moya wa nyikeriwa loko un’wana wa lava nga ehansi ka vulanguteri byakwe a tsana.—Ezek. 34:15, 16; 1 Tes. 2:7, 8.
4 Ku Twarisa Evhangeli Hi Ku Hiseka: Mufambisi wa Dyondzo ya Buku ya Vandlha u xalamukela ku endla malunghiselelo lama faneleke leswaku hinkwavo lava nga entlaweni wakwe va hlanganyela hi xitalo evutirhelini bya nsimu. Wa rhangela entirhweni wa ku twarisa evhangeli, hi ku tiva leswaku ku va kona nkarhi na nkarhi, ku hiseka ni ku chivirika loku a ku kombisaka evutirhelini swi ta tekeleriwa hi ntlawa wakwe. (Kol. 4:17; 2 Tes. 3:9) Hi ku famba ka nkarhi, u tikarhatela ku tirha nsimu ni xirho xin’wana ni xin’wana xa ntlawa wakwe. Loko hi lava ku antswisa vutshila bya hina byo chumayela ni ku dyondzisa evutirhelini, mufambisi wa Dyondzo ya Buku ya Vandlha a nga hi pfuna hi fikelela pakani ya hina.—1 Tim. 4:16; 2 Tim. 4:5.
5 Entiyisweni hi katekisiwile hi tinyiko leti nga vanhu lava lunghekeleke ku hi nyika mpfuno wa moya ni nseketelo wa rirhandzu. (1 Tes. 5:14) Onge hi nga kombisa ku tlangela lunghiselelo leri ra Yehovha hi ku hlanganyela ka hina nkarhi na nkarhi eka dyondzo ya buku ni ku seketela ntirho wa ku twarisa evhangeli hi ku tshembeka.—Hev. 10:25.