Dyondzo Ya Buku Ya Vandlha Yi Khutaza Mintirho Yo Dyondzisa
1 Dyondzo ya Buku ya Vandlha yi ni xiphemu xa nkoka enongonokweni wo dyondzisa wa nhlengeletano ya Yehovha. Mintlawa ya dyondzo ya buku yi kumeka endhawini ya hina hinkwayo, leswi endlaka leswaku swi hi olovela hinkwerhu ku va kona. Loko ndhawu ya dyondzo yi ri ekusuhi, lava tsakelaka va nga ha xi amukela hi ku olova xirhambo xa ku va kona.
2 Ku endliwa matshalatshala yo hlayisa ntlawa wun’wana ni wun’wana wu ri wutsongo. Leswi swi endla leswaku mufambisi wa dyondzo a swi kota ku nyikela mpfuno wa munhu hi xiyexe eka un’wana ni un’wana. Hinkwavo va dyondza hi rivilo leri nga ringaniki. Loko ku ri ni loyi a nga yi twisisiki yinhla hambi loko a dyondze ka ha ri mahlweni, mufambisi wa dyondzo a nga ha tlhela a yi hlamusela endzhaku ka dyondzo. Tlhandla-kambirhi, entlaweni lowutsongo ku ni malunghelo lama engetelekeke yo hlamula ni yo hlanganyela eku hlayeni ka matsalwa. Xana wa hlanganyela ebulweni hi ku hlamula nkarhi na nkarhi? Xana wa ringeta ku hlamula hi marito ya wena n’wini? Ku lunghekela ka wena ku hlamula swi nga va mpfuno eka wena ni le ka van’wana. Loko u ri karhi u lunghiselela, tirhisa miehleketo ya wena ku vona ndlela leyi u nga ti tirhisaka ha yona tinhla to karhi ta dyondzo hi wexe.—Hev. 5:14.
3 Hi ku xiya tindlela to dyondzisa leti tirhisiwaka hi mufambisi wa dyondzo ya buku, u nga dyondza ndlela yo fambisa tidyondzo ta le kaya ta Bibele hi ndlela leyi tsakisaka ni leyi dyondzisaka swinene. Endzhaku ka loko makwerhu la fanelekaka a hlaye tindzimana, ku vutisiwa swivutiso. Mufambisi wa dyondzo u khutaza hinkwerhu leswaku hi vulavula swi twakala. Loko nkarhi wu pfumela, u kombela tinhlamuselo ta matsalwa lama kombisiweke eka vayingiseri leswaku a hi pfuna ku twisisa ndlela leyi ma tirhaka ha yona. (Ringanisa Nehemiya 8:8.) Minkarhi yin’wana a nga ha tlhela a hlamusela hi ku komisa kumbe a vutisa swivutiso swin’wana leswaku a veka yinhla erivaleni. Xikombiso kumbe xifaniso xi nga ha hi pfuna ku vona ndlela leyi mhaka leyi yi khumbaka vutomi bya hina ha yona.
4 Nhlayo ya lava va vaka kona eTidyondzweni tin’wana ta Buku ya Vandlha yi le hansi. Xana u va kona nkarhi na nkarhi? Loko swi nga ri tano, u hundziwe hi lunghiselelo ra nkoka. Lunghiselelo ra dyondzo ya buku ya vandlha hi yin’wana ya tindlela leti Yehovha a ti tirhisaka ku kombisa rirhandzu ra yena. (1 Pet. 5:7) U lava leswaku hi engetela vutivi ni vutlharhi bya hina leswaku hi ta tiya emoyeni. Hi tlhelo rin’wana, Sathana u lava ku kavanyeta ku kula ka hina ka moya ivi a hi heta matimba leswaku hi nga pfuni nchumu eka Yehovha ni le nhlengeletanweni Yakwe. U nga swi pfumeleli leswi swi humelela! Endla leswaku moya wo kufumela ni wa rirhandzu wa ntlawa lowu wa vun’we, wu khumba mbilu ya wena naswona wu ku susumetela ku ya emahlweni u dzunisa Yehovha.—Ringanisa Pisalema 111:1.
5 Ku lunghiseleriwa minhlangano ya vutirheli leyi vahuweleri va nga swi kotaka ku va eka yona etindhawini to tala ta dyondzo ya buku. Swi nga ha endleka yi va yo nyikela vumbhoni exikarhi ka vhiki, hi mahelo-vhiki kumbe ni madyambu. Mufambisi wa dyondzo ya buku wa tiyiseka leswaku ku ni nsimu leyi eneleke ni leswaku u ta va kona la nga ta rhangela ensin’wini. Minhlangano ya ntirho wa nsimu a yi fanelanga yi tlula 10-15 wa timinete. Mufambisi a nga ha kambela ndzimana ya siku na siku hi ku komisa loko yi khumba ntirho wa hina wo chumayela kutani a nyikela xiringanyeto xin’we kumbe swimbirhi swo hlawuleka swa ntirho wa nsimu kumbe a endla nkombiso wo koma wa nyiko ya nkarhi wolowo.
6 Mufambisi u tikarhatela ku tirha ni un’wana ni un’wana la nga entlaweni wakwe hi nkarhi wo karhi, a n’wi khutaza ni ku n’wi letela hi ndlela leyi faneleke.—Ringanisa Marka 3:14; Luka 8:1.