Lunghiselelo Ra Dyondzo Ya Buku Ya Bandlha Xiyenge 3: Xivandla Xa Vutirheli Bya Nsimu
1 Ku engetela eku nyikeleni ka ndhawu ya dyondzo ya ntlawa, ndhawu ya Dyondzo ya Buku ya Bandlha yi nga ha tirha tanihi ndhawu ya nhlangano wa ntirho wa nsimu. Minkarhi ya minhlangano yo tano yi fanele yi olovela vahuweleri vo tala, naswona minhlangano yi fanele yi nyikela mpfuno lowu tirhaka eku hleleleni ka vahuweleri ntirho wa nsimu.
2 Mintlawa leyi hleleriweke dyondzo ni ntirho kahle yi aka vumoya. I vamani lava nga pfunekangiki hi xikhutazo kumbe swiringanyeto swa ndlela yo tamela minkaneto, ndlela yo sungula bulo, ndlela yo nyikela dyondzo ya Bibele kumbe leswi va faneleke ku swi vula eka riendzo ro vuyela? Vahuweleri-kulobye ni maphayona lava hlanganyelaka endhawini ya dyondzo ya buku va nyikela mpfuno wo tano.—Vagal. 6:9, 10.
3 Xiphemu Xa Mufambisi: Mufambisi wa Dyondzo ya Buku ya Bandlha wa rhangela naswona u na vutihlamuleri byo hlela ntirho wa ntlawa. U tirha ni vahuweleri ensin’wini nkarhi na nkarhi. (1 Pet. 5:2, 3) Minhlangano ya ntirho leyi lunghiseleriweke kahle yi nyika ndzetelo wa Matsalwa ni lowu tirhaka ku hlomisela ntlawa nsimu. Hi ntolovelo ku tsakeriwa leswaku ntlawa wun’wana ni wun’wana wa dyondzo ya buku wu va ni nhlangano wa wona n’wini wa ntirho wa nsimu ematshan’wini yo hlanganisa mintlawa hinkwayo endhawini yin’we. Hambi swi ri tano, mintlawa yimbirhi leyitsongo ngopfu yi nga ha hlanganisiwa loko swi fanela. Loko ntirho wa nsimu wu landzela Dyondzo ya Xihondzo xo Rindza, nhlangano wa ntirho wa nsimu wu fanele wu koma. Endzhaku ka sweswo, mufambisi un’wana ni un’wana wa dyondzo ya buku u ta khathalela ntlawa wa yena n’wini.
4 Malunghiselelo ya ntirho wa nsimu ya nkarhi na nkarhi ma khutaza ku hlanganyela nkarhi na nkarhi evutirhelini. Loko minhlangano ya ntirho yi khomiwa hi nkarhi ni ndhawu leyi vekiweke, vahuweleri va hlela kahle, va khutaziwa hi ku tiva leswaku ku ta va ni nsimu ni van’wana vo tirha na vona. (Ringanisa Luka 10:1.) Hambi loko mufambisi wa dyondzo a nga ta va kona, u lunghiselela nsimu ivi a endla malunghiselelo ya ntlawa. (om matl. 44-5) Loko ku nga ri na makwerhu wa xinuna la fanelekaka wo fambisa nhlangano wa nsimu, mufambisi a nga ha avela makwerhu wa xisati ku endla leswi. (om matl. 77-8; kmTS 3/88 tl. 3) Mpfilumpfilu wa papalatiwa loko ntlawa wu hlangana nkarhi hinkwawo hi nkarhi lowu tolovelekeke ni ndhawu ya wona ya ntirho. Ku cinca kwihi na kwihi ka xinkarhana eka leswi ku fanele ku tivisiwa ka ha sele vhiki loko swi koteka.
5 Ntirhisano Wa Laveka: Hinkwavo va fanele va ringeta ku hlanganyela hi xitalo eka swivumbeko swo hambana-hambana swa vutirheli bya nsimu. Vahuweleri va nga sungula ku lunghiselela swin’we hi minongonoko yo titoloveta, va tirhisa minkaneto ya xiviri ni swiyimo leswi talaka ku tlhekeka ensin’wini ya kwalaho.—Swiv. 27:17.
6 Xana u nga swi tsakela ku pfuniwa hi muhuweleri la nga ni ntokoto leswaku u va ni vutshila lebyi engetelekeke entirhweni wo endla vadyondzisiwa? Loko swi ri tano, vulavula ni mufambisi wa Dyondzo ya Buku ya Bandlha ya wena. A nga ha swi kota ku hlela muhuweleri la fanelekaka leswaku a ku pfuna. Leswaku u pfuneka, tirhisa swiringanyeto leswi u swi kumeke hi vutlhari naswona u hlayisa swikombelo leswi endliweke.
7 Lava averiweke hi mufambisi wa dyondzo ya buku ku pfuna va fanele va pfuna naswona va tiyimisela eka leswi va swi langutelaka. Ntokoto wu kombise leswaku lava nga ni langutelo lerinene, leri ringaniseriweke ra ntirho wa nsimu ni lava va nga ni xingheniso lexi tirhaka va swi kota ngopfu ku letela van’wana. (km 8/79 matl. 1, 4; km 10/79 tl. 3) Nkarhi hinkwawo xibumabumelo xi fanele xi nyikeriwa loko nhluvuko wu endliwa. Kutani tipakani tin’wana ti nga vekiwa.—Ringanisa Luka 19:17-19.
8 Hi lava ku pfunana leswaku hi humelela eku chumayeleni ka mahungu lamanene ni le ku endleni ka vadyondzisiwa. Swiyimo swa misava leswi nyanyaka ku biha swi tiyisekisa xihatla xa ntirho lowu. Vutomi bya katseka, naswona Yehova u hatlisisa ku hlengeleta. (Esa. 60:22) Loko hi tsundzuka vutirheli lebyi hi nyikiweke byona, hi ta tirhisana swinene ni ntlawa wa hina wa Dyondzo ya Buku ya Bandlha leswaku hi hetisisa xiavelo xa hina hi xitalo hi ri karhi hi khongotelana ni ku khutazana.—Varhoma 12:6-8; 2 Tim. 4:1, 2, 5.