Namarhela Ku Huwelela eRivaleni Hi Ntshembo Wa Wena Handle Ko Tsekatseka
1 Dyondzo ya Xihondzo xo Rindza i ndlela ya nkoka leyi ha yona vanhu va Xikwembu va phameriwaka “ŝakudya e nkarini wa ŝona.” (Mt. 24:45) Hi hlanganyela nhlangano lowu wa nkoka hikwalaho ka swikongomelo-nkulu swimbirhi—ku akiwa emoyeni ni ku huwelela erivaleni hi ntshembo wa hina eka van’wana.—Hev. 10:23-25.
2 Ku Tipfuna: Ku ringanyetiwa leswaku emavandlheni yo tala i kotara ya vayingiseri ntsena lava dyondzaka dyondzo leyi ka ha ri emahlweni. Kwalomu ka nhlayo leyi fanaka hi yona leyi hlanganyelaka eku hlamuleni. Swakudya leswi tiyeke swa moya leswi nyikeriwaka eka Dyondzo ya Xihondzo xo Rindza a swi nge twisisiwi hi laha ku heleleke hi nkarhi wa nhlangano. U fanele u wu vekela etlhelo nkarhi wa ku dyondza dyondzo yoleyo ka ha ri emahlweni.
3 Loko u lunghiselela dyondzo, u nga ha swi kuma swi pfuna ku rhanga hi ku hlaya ni ku ehleketisisa hi swivutiso leswi nga le bokisini leri nga le kusuhi ni makumu ka xihloko. Leswi swi nga ku pfuna ku ehleketisisa hi tinhla-nkulu leti ku nga ta dyondziwa hi tona.
4 Loko dyondzo yi ya emahlweni, rhiya ndleve eka leswi vuriwaka. Yingiserisisa marito yo pfula ya mufambisi wa dyondzo; tinhlamuselo leti i xingheniso xa dyondzo. A nga ha vutisa swivutiso swinharhu kumbe swa mune leswi nga ta hlamuriwa, kumbe a nga ha pfuxeta tinhla-nkulu tin’wana eka dyondzo ya vhiki leri hundzeke loko dyondzo ya vhiki rero ya ha ya emahlweni emhakeni leyi fanaka. Loko ku ri ni ndzulamiso wo karhi eka matwisiselo ya hina hi vuprofeta bya Bibele kumbe emhakeni yo karhi ya Matsalwa, u ta hi byela. Kavula, tinhlamuselo ta mufambisi wa dyondzo ti fanele ti koma, tanihi leswi xikongomelo xa dyondzo ku nga ku nyika vandlha nkarhi wa ku vulavula hi mintshembo ya rona. Rhiya ndleve loko van’wana va ri karhi va hlamusela leswi va swi dyondzeke; leswi swi nga ku pfuna ku tiyisa ripfumelo ra wena.
5 Huwelela Hi Ntshembo Wa Wena: Xana wa hlamula nkarhi na nkarhi edyondzweni? Ku tlangeriwa tinhlamulo to koma, leti kongomeke. (Ringanisa Luka 21:1-4.) Nhlamulo yo olova leyi humaka embilwini yi tsakeriwa hi vanhu hinkwavo. Hi ntolovelo nhlamulo yo sungula ya xivutiso yi fanele yi koma naswona yi kongoma. Leswi swi nyika van’wana nkarhi wa ku boxa tsalwa kumbe ku kombisa vuxokoxoko bya ndzimana. Hi ndlela leyi vo tala va nga ha huwelela erivaleni hi ntshembo wa vona. Tinhlamuselo hakanyingi ti fanele ti va letinene ni leti akaka.
6 Loko wa ha ku sungula ku hlanganyela eka dyondzo leyi kumbe u chava ku hlamula, u nga ha kombela mufambisi wa dyondzo leswaku a ku pfuna. N’wi kombele leswaku a languta voko ra wena loko ku dyondziwa ndzimana yo karhi. Kumbexana u nga ha hlaya tsalwa leri kombisiweke hi ku tirhandzela naswona u hlamusela ndlela leyi ri tirhaka ha yona hi ku komisa. U nga ha tsala marito ma nga ri mangani ematlhelo ka phepha lama nga ta ku pfuna ku tsundzuka leswi u lavaka ku swi vula loko u hlamula. Loko u ri n’wana, tsundzuka leswaku tinhlamulo ta wena ta amukeriwa naswona ta tsakeriwa.—Mt. 21:16.
7 I swa nkoka leswaku hi kombisa ripfumelo ra hina, naswona Dyondzo ya Xihondzo xo Rindza yi hi nyika nkarhi lowunene wo endla tano. Loko u kanakana ku hlamula, endla matshalatshala hinkwawo leswaku u hlula xiphiqo xexo naswona u lwela ku hlamula kan’we. U ta va u hlanganyerile enhlanganweni naswona u ta titwa ku antswa. Kutani ha yini u nga hleli ku hlamula kan’we eDyondzweni leyi landzelaka ya Xihondzo xo Rindza?—Swiv. 15:23.