Va Endle Va Titwa Va Amukelekile eXitsundzuxweni
1 Emalembeni ma nga ri mangani lama hundzeke, a ku ri munhu un’we eka vanhu vanharhu lava a va ri kona eXitsundzuxweni loyi a ri muhuweleri wa mahungu lamanene. Kumbexana swi ta va tano ni nan’waka. Van’wana va nga ta hi ku va va khutaziwe ngopfu hi xaka kumbe hi munghana la tshamaka endhawini yin’wana, loko van’wana swi nga ha endleka va rhambiwe hi vahuweleri va kwalaho. Van’wana lava nga ta ta, hambi loko va khuvuriwile, a va ha hiseki evutirhelini. Hi va amukela hi mbilu hinkwayo, hinkwavo lava kombisaka ku amukela xileriso xa Yesu lexi nge: “Endlisani ŝeŝo mi nḍi anakanya ha ŝona.”—1 Kor. 11:24; Rhom. 15:7.
2 Lava va averiweke ku rindza va fanele va xalamukela ku amukela un’wana ni un’wana, ngopfu-ngopfu lontshwa, loko a fika eHolweni ya Mfumo. Hambi swi ri tano, hinkwerhu ka hina hi nga va ni xiphemu xo kombisa tintswalo eXitsundzuxweni. (Rhom. 12:13) Njhani?
3 Hi madyambu wolawo vahuweleri van’wana va ta va va khomekile ngopfu hi ku tleketlela vanhu lava tsakelaka. Van’wana va nga ha fika hi xihatla naswona va va kona leswaku va ta xeweta vaendzi lava titelaka hi voxe. Loko munhu loyi u nga n’wi tiviki a nghena eholweni, n’wi xewete hi xinghana ivi u sungula mabulo. N’wi vutise loko ku ri ni loyi a n’wi tivaka evandlheni rero. Loko a ri kona, n’wi khathalele ku kondza munhu yoloye a fika. (Ringanisa Luka 10:35.) Loko ku nga ri na munhu loyi a n’wi tivaka, ha yini u nga n’wi rhambi leswaku a ta tshama na wena loko minhlangano yi ya emahlweni? N’wi hlamusele ndlela leyi vhinya ni xinkwa swi nga ta tirhisiwa ha yona loko nongonoko wu ya emahlweni. Swi nga ha endleka a lava leswaku u n’wi pfuna ku kuma matsalwa lama tshahiwaka hi xivulavuri.
4 Loko nkhuvo wa Xitsundzuxo wu hela, n’wi byele leswaku u tsakile hi leswi a teke. Swi nga ha endleka a ri ni swivutiso leswi u nga swi hlamulaka mayelana ni ntirho wa hina. Ku tsakela ka wena ku nga ha yisa eku vulavurisaneni hi tinhloko-mhaka to karhi ta Bibele letinene, kumbexana eHolweni ya Mfumo kumbe kun’wana. Tidyondzo tin’wana letinene ta Bibele ti sunguriwile hi vamakwerhu lava xalamukeke lava tirhiseke masungulo lawa, lama bumabumeriwaka. Loko a nga si suka eHolweni ya Mfumo, n’wi tivise eka van’wana, naswona u n’wi rhamba hi ndlela leyinene leswaku a tlhela a vuya.
5 Mawaku ntsako wonghasi ku amukela vamakwerhu va xinuna ni va xisati lava rhandzekaka lava a va nga vi kona eminhlanganweni nkarhi na nkarhi kumbe lava nkarhi wun’wana a va nga hiseki evutirhelini! Ematshan’wini yo va vutisa swivutiso hi leswi a va nga ti eminhlanganweni, va kombise ku va tsakela hi leswi va teke. Kumbexana swin’wana leswi va swi tweke enkulumeni ya Xitsundzuxo swi ta va susumetela ku tlhela va kambisisa vuxaka bya vona lebyi va byi nyiketeleke eka Yehovha. Ku va amukela hi ndlela leyinene ni ku va khathalela hi xiviri loku u ku kombisaka ku nga ha va tsakisa. Va byele leswaku u langutele ku va vona nakambe.—Rhom. 1:11, 12.
6 Nkulumo yo hlawuleka leyi nga ni xihloko lexi nge “Vukhongeri Bya Ntiyiso Byi Enerisa Swilaveko Swa Vanhu” yi ta nyikeriwa emavandlheni yo tala hi April 10. Tiyiseka leswaku hinkwavo lava a va ri kona enkhubyeni wa Xitsundzuxo va rhambiwa naswona va pfuniwa leswaku va va kona. Ha tshemba leswaku hinkwavo lava vaka kona eminhlanganweni leyi yo hlawuleka va ta titwa va amukelekile naswona va ta vona moya lowunene wa vunghana exikarhi ka vanhu va Yehovha.—Ps. 133:1.