Siku Ra Xitsundzuxo Ku Ta Va Nkarhi Wa Kahle Wo Nyikela Vumbhoni Eka Lava Teke
1. Ku engetela eka nkulumo, i yini swin’wana leswi nga ha tsakisaka lava hi endzeleke eXitsundzuxweni? Hlamusela.
1 Ku le ku endliweni ka matshalatshala lamakulu yo rhamba vanhu leswaku va ta hlanganyela na hina eXitsundzuxweni. Lava hi endzeleke a va tsakisiwi ntsena hileswi va swi twaka. Endzhaku ka Xitsundzuxo, wansati un’wana u hlamusele leswi a swi voneke—ku nga xinakulobye lexi un’wana ni un’wana a a ri na xona swin’we ni muako wo saseka wu tlhela wu basa lowu akiweke ni ku khathaleriwa hi vatirhi va ku tirhandzela. Hikokwalaho, hinkwerhu ka hina hi fanele hi hlanganyela eku nyikeleni ka vumbhoni eka xiendlakalo lexi xa nkoka elembeni, ku nga ri xivulavuri ntsena.—Efe. 4:16.
2. Xana un’wana ni un’wana wa hina a nga nyikela vumbhoni hi ndlela yihi eka lava hi endzeleke?
2 Va Xeweteni Hi Rirhandzu: Hi ta va hi nyikela vumbhoni loko hi xeweta lava hi endzeleke hi ri karhi hi n’wayitela. (Yoh. 13:35) Hambiloko u ta ka u nga swi koti ku vulavula ni vanhu hinkwavo, u nga ha titivisa eka lava nga ekusuhi na wena. (Hev. 13:1, 2) Xiyisisa vaendzi lava vonakaka onge a va tivi munhu. Swi nga ha endleka leswaku va kume xirhambo hi nkarhi wa tsima. U nga ha va vutisa u ku, “Xana ma sungula ku ta laha?” Va kombele leswaku va tshama na wena naswona u tiyimisela ku hlamula swivutiso swin’wana ni swin’wana leswi va nga ha swi vutisaka. Loko vandlha ra n’wina ri fanele ri hatla ri huma leswaku vandlha rin’wana ri ta tirhisa holo, u nga ha va vutisa u ku: “Ndzi ta tsakela ku tiva leswaku mi wu twe njhani nongonoko. Xana yi kona ndlela leyi ndzi nga tihlanganisaka na n’wina ha yona?”
3. Xana hi nga va amukela njhani lava holeke?
3 Amukelani Lava Holeke: Swi le rivaleni leswaku vahuweleri lava holeke va ta va kona, ku katsa ni lava taka eXitsundzuxweni ntsena lembe ni lembe. Va amukeleni kutani mi va byela leswaku mi tsakela ku va vona. (Rhom. 15:7) Endzhakunyana ka sweswo, vakulu va nga ha ya emakaya ya vona ku ya va khutaza leswaku va hambeta va tihlanganisa ni vandlha. Hi navela leswaku vo tala lava nga ta va kona va susumeteleka ku vangamisa Xikwembu ku nga ri hileswi va swi tweke ntsena kambe ni hileswi va swi voneke “hikwalaho ka mintirho leyinene ya [hina] leyi va nga timbhoni leti yi voneke hi mahlo.”—1 Pet. 2:12.