Xana Hi Nga Va Pfuna Njhani Lava Teke eXitsundzuxweni?
1. Hi rihi rungula leri nga ta nyikeriwa hi March 22, 2008?
1 Hi March 22, 2008, timiliyoni ta vanhu emisaveni hinkwayo ti ta twa rungula ra risima. Lava nga ta va kona eXitsundzuxweni va ta twa hi ta rirhandzu lerikulu ra Yehovha ra ku va a lunghiselele vanhu nkutsulo. (Yoh. 3:16) Va ta dyondza hi ta Mfumo ni ndlela leyi Yehovha a nga ta wu tirhisa ha yona ku hetisisa ku rhandza ka yena emisaveni hinkwayo. (Mat. 6:9,10) Va ta tivonela hi voxe rirhandzu ni vun’we lebyi vanhu va Xikwembu va nga na byona loko hi va amukela hi malwandla.—Ps. 133:1.
2. Hi nga swi pfuna njhani swichudeni swa Bibele leswi nga ta va kona eXitsundzuxweni?
2 Swichudeni Swa Bibele: Van’wana lava nga ta ta ku ta va ku ri lava ha ku sungulaka ku dyondza Bibele. Va tivise eka vamakwerhu lavan’wana. Va hlamusele hi minhlangano ya vhiki ni vhiki, u tlhela u va komba Holo ya Mfumo. Hi nkarhi wa nkulumo, xivulavuri xi ta khutaza vanhu volavo leswaku va ya emahlweni va aka vuxaka na Yehovha. U nga tirhisa tinhla ta xona tanihi xisekelo xo khutaza swichudeni swa wena.
3. Xana hi nga endla yini ku khutaza vamakwerhu lava holeke emoyeni lava veke kona eXitsundzuxweni?
3 Vahuweleri Lava Holeke eMoyeni: Van’wana lava nga ta va kona i vahuweleri lava holeke emoyeni. Endla matshalatshala yo va xeweta hi ndlela ya rirhandzu. Papalata ku va vutisa swivutiso kumbe ku vula swilo leswi nga ta va khomisa tingana. Endzhakunyana ka loko Xitsundzuxo xi hundzile, vakulu va fanele va endzela vamakwerhu lava holeke emoyeni lava a va ri kona, va va bumabumela hi musa hikwalaho ka matshalatshala lawa va ma endleke leswaku va kota ku va kona eXitsundzuxweni, va tlhela va va rhamba ni le ka minhlangano leyi landzelaka.
4. Xana un’wana ni un’wana wa hina a nga va pfuna njhani lava hi endzeleke?
4 Lava Hi Endzeleke: Van’wana va lava nga ta ta ku ta va ku ri vanhu lava hi va toloveleke kumbe swirho swa ndyangu leswi hi swi rhambeke. Van’wana swi nga ha endleka va kume xirhambo hi nkarhi wa tsima ro xi fambisa. Loko u vona vanhu lava u nga va tiviki, yana eka vona u ya va xeweta, u titivisa ni ku va komba leswaku va amukelekile. Swi nga ha endleka leswaku vo sungula ku va kona eminhlanganweni ya hina. Loko mi ri karhi mi bula u nga ha kuma ni ndlela yo va endzela. U nga va endzela kumbe u va bela riqingho endzhaku ka Xitsundzuxo, sweswo swi nga va pfuna leswaku va dyondza swo tala hi Muvumbi loko u va fambisela dyondzo ya Bibele.
5. I yini leswi hi nga swi vulaka leswaku hi sungula Dyondzo ya Bibele?
5 Tinhla leti hi nga ta ti kuma enkulumeni ya Xitsundzuxo ti nga va xisekelo lexinene xo fambisa buku leyi nge Leswi Bibele Yi Swi Dyondzisaka loko hi endla maendzo yo vuyela. Hi xikombiso, xivulavuri xi ta hlaya Esaya 65:21-23. Eka riendzo ro vuyela hi nga ha tshaha leswi nkulumo yi swi vuleke kutani hi ku “I nge ndzi ku komba yin’wana ya mikateko leyi nkutsulo wu nga ta hi tisela yona.” Kutani u pfula eka matluka 4-5 ya buku leyi nge Leswi Bibele Yi Swi Dyondzisaka. Kumbe u nga ha ku “Vo tala va tivutisa loko hakunene byi ta hetiseka vuprofeta bya Esaya.” Kutani u languta tindzimana 1-3 eka ndzima 9. Ndlela yin’wana yo sungula Dyondzo ya Bibele i ku vula leswi xivulavuri xi nga swi vula, leswaku u fambisa buku leyi nge Leswi Bibele Yi Swi Dyondzisaka ni ku kombisa ndlela leyi dyondzo yi nga fambisiwaka ha yona.
6. Hi wahi malunghelo lawa hinkwerhu ma hi pfulekeleke tanihi leswi hi yingisaka xileriso xa Yesu xo tsundzuka rifu rakwe?
6 Onge un’wana ni un’wana wa hina a nga lava tindlela to pfuna swichudeni swa Bibele, lava holeke emoyeni ni lava hi endzeleke. (Luka 22:19) Yehovha u ta ku katekisa swinene ku andza kwihi na kwihi ka ntirho wa hina wa Mfumo.