“Tshamani Mi Ri Karhi Mi Endla Leswi Leswaku Mi Ndzi Tsundzuka”
Xitsundzuxo Xa Rifu Ra Yesu Xi Ta Va Hi April 2
1. Ha yini April 2, 2007, ri ri siku ra nkoka?
1 Hi April 2, 2007, timiliyoni ta vanhu emisaveni hinkwayo ti ta hlengeletana leswaku ti tsundzuka rifu ra Yesu ra gandzelo. Yesu u dlawele ku va museketeri wa vuhosi bya Tata wa yena wa le tilweni, kutani a swi veka erivaleni leswaku Sathana Diyavulosi u hembe mavunwa ya rihlaza hi ku vula leswaku vanhu va tirhela Xikwembu hikwalaho ko lava ku vuyeriwa ntsena. (Yobo 2:1-5) Xilalelo xa Hosi xi tlhela xi hi tsundzuxa leswaku Yesu ‘u nyikele moya-xiviri wa yena wu va nkutsulo wa lavo tala’ hi ku fa ka yena tanihi munhu la hetisekeke la nga riki na xidyoho. (Mat 20:28) Hikwalaho, Yesu u lerise vadyondzisiwa vakwe a ku: “Tshamani mi ri karhi mi endla leswi leswaku mi ndzi tsundzuka.” (Luka 22:19) Xana ku tlangela ka wena nyiko ya Xikwembu ku ku susumetele leswaku u sungula ku endla malunghiselelo yo tsundzuka ndlela leyi yo hlawuleka leyi rirhandzu ri kombisiweke ha yona?—Yoh. 3:16.
2. Xana hi nga ti lunghiselela njhani timbilu ta hina leswaku hi ta vuyeriwa loko hi ri eXitsundzuxweni?
2 Lunghiselela Mbilu Ya Wena: Loko hi xiya leswi humeleleke eka siku rin’wana ni rin’wana emasikwini yo hetelela ya vutomi bya Yesu bya laha misaveni, hi ta endla leswaku timbilu ta hina ti va eka leswi nga ta endleka eXitsundzuxweni lexi. (Ezra 7:10) Leswaku hi endla tano, ku lunghiseleriwe xiyimiso xo hlawuleka xa ku hlayiwa ka Bibele, eka xibukwana lexi nge Ku Kambisisa Matsalwa Siku Ni Siku—2007 ni le ka 2007 Calendar. Xiyimiso lexi xi fambisana ni masiku ya swiendlakalo leswi humeleleke emahlweni ka rifu ra Yesu hi ku ya hi khalendara leyi hi yi tirhisaka namuntlha. Masiku lama hlamuseriweke eka rungula ra Bibele ma sekeriwe eka khalendara ya Xiyuda, leyi masiku ya yona ma sungulaka loko dyambu ri pela ku ya fika eku peleni ka dyambu ra siku leri landzelaka. Ndlela leyi masiku wolawo ma hlayisiwaka xiswona yi kambisisiwile kutani yi tsariwa exiyimisweni xa ku hlayiwa ka Bibele hi nkarhi wa Xitsundzuxo. Ku kambisisa rungula rero ra Bibele ni ku anakanyisisa swinene hi rirhandzu ra Xikwembu swi ta hi pfuna leswaku hi vuyeriwa hilaha ku heleleke eXitsundzuxweni.
3. Xana hi nga va pfuna njhani lava tsakelaka ni lava va holeke emoyeni leswaku va vuyeriwa eXitsundzuxweni?
3 Rhamba Van’wana Leswaku Va Va Kona: Xiengetelo lexi nga eka Vutirheli Bya Hina Bya Mfumo bya February nan’waka xi tivise hi ta tsima ro hlawuleka ro rhambela vanhu eka xiendlakalo lexi xo hlawuleka. Xana u ma endlile malunghiselelo yo hlanganyela hi xitalo eka tsima leri? Xana u va tsale ehansi hinkwavo lava u va tivaka lava u faneleke u va rhamba, naswona xana se u va rhambile? Endla malunghiselelo yo fika ka ha ri ni nkarhi madyambu wolawo ya Xitsundzuxo leswaku u ta amukela lava u va rhambeke ni van’wana lava tsakelaka. U nga ha tshama swin’we na vona, u va nyika Bibele ni risimu. Va tivise eka van’wana evandlheni. Endzhaku ka nongonoko tinyike nkarhi wo hlamula swivutiso swa vona. Va rhambe leswaku va va kona enkulumeni ya le rivaleni yo hlawuleka leyi nga ta nyikeriwa hi April 15. Vakulu va fanele va tiyiseka leswaku lava a va hlanganyela kambe sweswi va holeke emoyeni va rhamberiwa eXitsundzuxweni ni le ka nkulumo yo hlawuleka.
4. Loko Xitsundzuxo xi hundzile, xana hi nga va pfuna njhani vanhu leswaku va hambeta va endla nhluvuko hi tlhelo ra moya?
4 Pfuna Lava Ha Ku Tsakelaka Ni Lava Holeke eMoyeni Leswaku Va Endla Nhluvuko: Xivulavuri lexi nga ta nyikela nkulumo ya Xitsundzuxo xi ta hlamusela hi ku komisa hi ta lunghiselelo leri nga kona ra dyondzo ya Bibele xi tlhela xi khutaza lava ha ku tsakelaka leswaku va hambeta va dyondza hi Yehovha. U nga ha tirhisa leswi xi swi vuleke leswaku u pfuna lava u va rhambeke leswaku va ya emahlweni va dyondza swo tala hi Yehovha. Loko ku nga ri na loyi a dyondzaka na vona Bibele, tiyiseka leswaku wa va endzela endzhaku ka Xitsundzuxo u ya va komba ndlela leyi dyondzo ya Bibele ya mahala yi fambisaka xiswona. Leswaku va endla nhluvuko hi tlhelo ra moya, va fanele va tlhela va ta eminhlanganweni ya vandlha. (Hev. 10:24, 25) Leswaku va endla tano, va khutaze leswaku va sungula ku va kona eminhlanganweni nkarhi hinkwawo. Vakulu va fanele va endzela Vakreste lava holeke emoyeni lava a va ri kona eXitsundzuxweni va bula na vona hi tinhla ta nkulumo leyi nyikeriweke siku rero. Leswi swi nga ha va khutaza leswaku va tlhela va hlanganyela hi xitalo.
5. Xana ku va kona eXitsundzuxweni swi ta hi pfuna njhani?
5 Ku va kona eXitsundzuxweni swi hi nyika nkarhi wo anakanyisisa swinene hi leswi Yehovha na Yesu va hi endleleke swona. Ku anakanyisisa hi swona swi hi endla leswaku hi ya hi va rhandza swinene naswona swi khumba ndlela leyi hi hanyaka ha yona. (2 Kor. 5:14, 15; 1 Yoh. 4:11) Sweswi i nkarhi wa leswaku hi sungula ku tilunghiselela ni ku lunghiselela lava tsakelaka leswaku va va kona eka xiendlakalo lexi, laha hi nga ta ‘twarisa rifu ra Hosi.’—1 Kor. 11:26.