Pfuna Vanhu Leswaku Va Vuyeriwa Hi Nkutsulo
Xitsundzuxo Xa Rifu Ra Kreste Xi Ta Tlangeriwa Hi April 12
1. Hi yihi ndlela yin’wana leyi vanhu va Xikwembu va nkhensaka nkutsulo ha yona?
1 “A ku nkhensiwe Xikwembu hikwalaho ka nyiko ya xona ya mahala leyi nga hlamuselekiki.” (2 Kor. 9:15) Marito lawa ma yi phofula kahle ndlela leyi hi titwaka ha yona hi vunene ni hi musa wa rirhandzu lowu Xikwembu xi wu kombisaka vanhu va xona hi N’wana wa xona Yesu Kreste. Ku nkhensa loku vuriweke etsalweni leri ku ta vonaka swinene loko hi hlengeletanile hi April 12 hi tlangela Xitsundzuxo xa rifu ra Kreste.
2. I vamani lava hlanganyelaka ni malandza ya Yehovha eku tlangeleni ka Xitsundzuxo, naswona i yini leswi va faneleke va swi endla leswaku va vuyeriwa hi nkutsulo?
2 Lembe ni lembe Timbhoni ta Yehovha swin’we ni vanhu van’wana va kwalomu ka timiliyoni ta khume va va kona eXitsundzuxweni. Hi ndlela yoleyo vanhu volavo va kombisa ndlela leyi va ri tlangelaka ha yona gandzelo ra Kreste. Hambiswiritano, leswaku va vuyeriwa hi gandzelo ra nkutsulo, va fanele va va ni ripfumelo eka rona. (Yoh. 3:16, 36) Xana hi nga va pfuna njhani leswaku va va ni ripfumelo ro tano? Enkarhini lowu wa Xitsundzuxo, hi nga va khutaza leswaku va va ni dyondzo ya Bibele va tlhela va ta eminhlanganweni vhiki na vhiki. Xiya swiringanyeto leswi landzelaka.
3. Xana hi nga yi sungula njhani dyondzo ya Bibele ni lava hi va rhambaka eXitsundzuxweni?
3 Tidyondzo Ta Bibele: Loko u rhamba vanhu lava tsakelaka leswaku va ta eXitsundzuxweni, ha yini u nga ringeti ku sungula dyondzo ya Bibele na vona hi buku leyi nge Leswi Bibele Yi Swi Dyondzisaka? Hlamusela xichudeni hi ndlela leyi Xitsundzuxo xi tlangeriwaka ha yona, u pfula eka matluka 206-8 kutani u bula na xona hi nhloko-mhaka leyi nge “Xilalelo Xa Hosi I Nkhuvo Lowu Dzunisaka Xikwembu.” U nga ha bula na xona hi rungula rero eka riendzo ro sungula kumbe eka ra vumbirhi, kumbexana u nga endla tano loko u ri karhi u xi fambisela dyondzo ya Bibele u lo yima kunene. Loko mi hetile ku bula hi rungula rero, kumbexana munhu yoloye u ta pfumela leswaku mi dyondza swin’we ndzima 5, leyi nge, “Nkutsulo I Nyiko Ya Nkoka Leyi Humaka Eka Xikwembu.” Loko dyondzo ya Bibele se yi sungurile, tlhelelani eku sunguleni ka buku mi dyondza tindzima ta mune to sungula.
4. I vamani lava hi nga sungulaka dyondzo ya Bibele na vona enkarhini lowu wa Xitsundzuxo?
4 I vamani lava hi nga sungulaka dyondzo ya Bibele na vona hi ku tirhisa ndlela leyi? Kumbexana vatirhi-kulorhi, swichudeni-kulorhi kumbe vaakelani va nga yi tsakela dyondzo yoleyo. Vamakwerhu va xinuna va nga ha endzela vanuna lava nga riki Timbhoni kambe lava vasati va vona va hlanganyelaka. U nga rivali ku dyondza ni maxaka ya wena lama nga riki Timbhoni. Ku tlula kwalaho, hi ta endla matshalatshala lama hlawulekeke yo rhamba lava nga hola emoyeni leswaku va ta eXitsundzuxweni. (Luka 15:3-7) Onge hi nga hisekela ku pfuna vanhu volavo hinkwavo leswaku va vuyeriwa hi nkutsulo.
5. Xana hi nga swi khutaza njhani swichudeni swa Bibele ni van’wana lava tsakelaka leswaku va va kona eminhlanganweni ya vandlha vhiki na vhiki?
5 Minhlangano Ya Vandlha: Xitsundzuxo hi wona nhlangano wo sungula lowu swichudeni swo tala swa Bibele ni vanhu van’wana lava tsakelaka va sungulaka ha wona. Xana hi nga va khutaza njhani leswaku va ta ni le ka minhlangano leyin’wana ya vandlha? Eka Vutirheli Bya Hina Bya Mfumo bya April 2005, eka tluka 8, ku ni swiringanyeto leswi landzelaka: Swichudeni swa wena “swi byele nhloko-mhaka ya nkulumo ya le rivaleni leyi nga ta nyikeriwa. Swi kombe xihloko lexi nga ta dyondziwa eka Dyondzo ya Xihondzo xo Rindza ni le ka Dyondzo ya Buku ya Vandlha. Hlamusela leswi endlekaka eka Xikolo xa Vutirheli bya le Tilweni ni le ka Nhlangano wa Ntirho. Loko u ri ni nkulumo exikolweni, kumbexana u nga ha swi rungulela yona. Swi rungulele tinhla leti tsakisaka leti u ti kumeke eminhlanganweni. Tirhisa swifaniso leswi nga etibukwini ta hina leswaku u pfuna swichudeni swi vona leswaku ku humelela yini. Swi rhambe ma ha ku sungula ku dyondza.”
6. Hi tihi tindlela timbirhi leti hi nga va pfunaka ha tona vanhu va timbilu letinene leswaku va vuyeriwa hi nkutsulo?
6 Loko vanhu va timbilu letinene va dyondzeriwa Bibele nkarhi na nkarhi naswona va va kona eminhlanganweni ya vandlha nkarhi hinkwawo, hakanyingi va hatlisa va endla nhluvuko hi tlhelo ra moya. Hikwalaho, a hi pfuneni vanhu leswaku va ta vuyeriwa hi malunghiselelo lawa ya moya ni hi nyiko leyikulu swinene ya Xikwembu—ku nga nkutsulo.