Amukela Vaendzi

Hi March 23, ku languteriwe vaendzi va kwalomu ka 12 wa timiliyoni kumbe ku tlula leswaku va va kona eXitsundzuxweni. Xivulavuri xi ta nyikela vumbhoni lebyikulu loko xi ri karhi xi vulavula hi nyiko ya Yehovha ya nkutsulo ni hi mikateko yin’wana ya le nkarhini lowu taka leyi nga ta kumiwa hi vanhu! (Esa 11:6-9; 35:5, 6; 65:21-23; Yh 3:16) Kambe, a hi xivulavuri ntsena lexi nga ta nyikela vumbhoni eka xiendlakalo lexi xo hlawuleka. Hinkwerhu ka hina hi nga katseka hi ku amukela lava hi endzeleke hi malwandla. (Rhm 15:7) Hi leswi swiringanyeto swin’wana.

• Ematshan’weni yo ya tshama u rindzela xiyimiso leswaku xi sungula, amukela vaendzi ni lava holeke u ri karhi u n’wayitela ni ku va xeweta hi ndlela ya xinghana

• Loko u ri karhi u langutele ku amukela lava u va rhambeke, tlhela u xiya ni van’wana lava nga ha vaka va rhambiwile hi nkarhi wa tsima ro fambisa swirhambo. Va kombele leswaku va tshama na wena. Hlaya na vona Bibele ni ku yimbelela na vona hi risimu ra wena

• Loko nkulumo yi hela, vana ekusuhi na vona leswaku u hlamula swivutiso leswi va nga ha vaka na swona. Loko ku nga ri na nkarhi hikwalaho ka leswi vandlha ri faneleke ri nyika vandlha lerin’wana nkarhi wo khoma Xitsundzuxo, endla malunghiselelo yo endzela munhu yoloye hi xihatla. Loko u nga ri na vuxokoxoko bya yena, u nga ha ku: “Ndzi tsakela ku twa lexi ku tsakiseke hi nongonoko lowu. Ndzi kombela u ndzi nyika tinomboro ta wena ta selfoni.”