Yisa Nhluvuko eMahlweni Hi Ku Endla Maendzo Yo Vuyela Lama Pfunaka
1 Leswaku hi pfuna lava kombiseke ku tsakela, i swa nkoka leswaku hi hambeta hi va nyika mphamelo wa swakudya swa moya hi maendzo yo vuyela ya nkarhi na nkarhi. Maendzo ya hina ma ta hambeta ma va pfuna leswaku va kurisa nhluvuko wa vona wa moya. (1 Kor. 3:6-9) Xisweswo, leswaku maendzo ya hina ma ta va lama pfunaka, i swa nkoka leswaku hi lunghiselela ka ha ri emahlweni, hi ri karhi hi ehleketa hi munhu loyi hi yaka eka yena.
2 Ku Vuyela Eka Lava Hi Va Siyeleke Xiphephana: Kumbexana eka riendzo ra hina ro sungula hi siye xiphephana lexi nge Misava Leyintshwa Ya Ku Rhula.
Endzhaku ko pfuxeta leswi hi vulavuleke ha swona, hi nga vutisa swo fana ni leswi:
◼ “Xana hi yihi hulumendhe leyi nga tisaka ku hundzuka loku? [Yimela nhlamulo.] Handle ko kanakana na wena u nga tsakela ku hanya ehansi ka swiyimo swo fana ni leswi. Xana hi nga swi tsakela hi ndlela yihi swiyimo leswi?” Xisweswo u nga ha kambisisa mhaka leyi nga exihlokwaneni lexi nge “Ndlela Leyi Swi Kotekaka Ha Yona Eka Wena.” N’wi kombise buku leyi nge Hanya Hi Masiku, ndzima 15, “Ku Va Mufumiwa Wa Hulumendhe Ya Xikwembu.” Hi nga ha bula hi tindzimana timbirhi to sungula ivi hi vutisa xivutiso lexi nge: “Xana ku dyondza hi Xikwembu swi fanele swi hi khumba njhani?” U nga ha endla malunghiselelo yo hlamula xivutiso lexi ni ku vulavula hi swin’wana swo tala eka ndzima leyi, eka riendzo leri landzelaka.
3 Loko hi vuyela eka lava hi va siyeleke buku leyi nge “U Nga Hanya Hi Masiku aParadeyisini eMisaveni,” hi nga ha ku:
◼ “Enkarhini lowu hundzeke loko ndzi ku endzerile, hi vulavule hi swiphiqo swo tala leswi langutaneke ni vanhu ni leswi Xikwembu xi tshembisaka ku swi endla. Xana ha yini Xikwembu xi pfumelele ku xaniseka nkarhi wo leha swonghasi? Nhlamulo leyi tsakisaka yi kumeka eka ndzima 11 ya buku leyi ndzi ku siyeleke yona.” Kombela n’wini wa muti leswaku a ya teka kopi yakwe loko swi koteka. Endzhaku ko hlaya tindzimana to hlayanyana, hi nga ha vutisa: “Xana u ehleketa leswaku swi ta kala swi koteka ku hanya emisaveni laha ku nga ta va ku nga ha ri na vubihi, laha vanhu va nga ta swi kota ku tsakela vutomi lebyi nga heriki ehansi ka hulumendhe yo lulama?” Byela n’wini wa muti leswaku u ta tsakela ku vuya vhiki leri taka naswona mi ta bula hi tinhlamulo ta swivutiso leswi leti nga eka ndzima 1, “Ku Hanya Hi Masiku A Hi Norho.”
4 Ku Vuyela Eka Lava Hi Va Siyeleke Timagazini: Loko u hlawule nhloko-mhaka yo karhi leyi tsakiseke n’wini wa muti, kombisa tinhla leti engetelekeke leti humaka eka xihloko lexi loko u vuyela, u seketela tinhlamuselo ta wena eka tsalwa rin’we leri nga xilotlelo xa mhaka leyi mi vulavulaka ha yona. Loko ku ri ni ku tsakela loku hambetaka, u nga ha vulavula hi mpfuno wa timagazini. Nakambe, u nga ha yisa nyingiso enkandziyisweni lowu landzelaka wa magazini loko wu ri ni xihloko lexi vulavulaka hi mhaka leyi fanaka. Eka swiyimo leswi hambaneke, hi nga ha yisa nyingiso emhakeni leyi nga le bukwini leyi nge Hanya Hi Masiku emhakeni yoleyo ivi hi endla malunghiselelo yo vulavula hi yona eka riendzo leri landzelaka.
5 Ku kombisa ku tsakela ka hina hi hexe hi ku tlhelela hi endla maendzo yo vuyela lama pfunaka swi ta kombisa rirhandzu ra hina eka vanhu ni le ka Yehovha. (Yoh. 13:34, 35) Onge hi nga hambeta hi kurisa nhluvuko wa vanhu ensin’wini ya ka hina hi ku endla maendzo yo vuyela lama pfunaka nkarhi na nkarhi.