Pfuxa Ku Tsakela eMfun’weni Wa Xikwembu Wa Ku Rhula
1 Hi n’hweti ya February, hi ta va hi fambisa buku leyi nge U Nga Hanya Hi Masiku aParadeyisini eMisaveni. Xikongomelo xa hina xi fanele xi va ku pfuna vanhu va timbilu letinene leswaku va tsakela Mfumo wa Xikwembu ni leswi wu nga ta swi endla. Swivutiso leswi lavaka mavonelo ya munhu swi nga hi pfuna ku endla leswi.
2 Xiphephana lexi nge “Vutomi eMisaveni Leyintshwa Ya Ku Rhula” xi nga tirhiseriwa ku fambisa nyiko ya buku. Endzhaku ka ku xeweta ka xinghana, hi nga ha vula swo fana ni leswi:
◼ “Ku cinca-cinca loku hlamarisaka ka mfumo ka humelela emisaveni hinkwayo, naswona hakanyingi ku vulavuriwa hi ku fikelela pakani ya ku rhula. Xana u ehleketa leswaku ku rhula ka ntiyiso ku ta kala ku fikeleriwa? [Yimela nhlamulo.] Hambi leswi vanhu vo tala va languteleke emimfun’weni ya vanhu hi ntshembo wa leswaku yi ta tisa ku rhula, xiya ndlela leyi Xikwembu xi tshembisaka ku tisa ku rhula ha yona, hi laha yi boxiweke eka Pisalema 46:9. [Hlaya.] Xana u ehleketa leswaku goza ra Xikwembu ri ta tisa ku hundzuka ka njhani emisaveni? [Yingisela nhlamulo ya n’wini wa muti, kutani u n’wi kombisa xiphephana lexi nge Vutomi eMisaveni Leyintshwa Ya Ku Rhula.] Xana u nga swi ehleketa leswi kombisiweke laha?” Ehleketisisa hi marungula lama nga le hansi ka nhloko-mhaka leyi nge “Vutomi eMisaveni Leyintshwa Ya Xikwembu.” Loko xiyimo xi pfumela, komba n’wini wa muti rungula leri ebukwini leyi nge Hanya Hi Masiku, matluka 156-62. Fambisa buku hi munyikelo wa R9,00. Siya n’wini wa muti ni xiphephana ku nga khathariseki leswaku u yi tekile buku kumbe e-e. Hi nga ha gimeta bulo hi ku vutisa leswaku: “Xana u ehleketa leswaku hulumendhe leyi nga ta tisiwa hi Xikwembu yi nga ku tisa ku hundzuka loku?” Hlela leswaku u vuya mi ta yisa bulo emahlweni.
3 Kumbexana hi nga ha ku:
◼ “Ku kombisiwa ku vilela lokukulu mayelana ni swiphiqo leswi kavanyetaka, leswi hinkwerhu ka hina hi faneleke hi langutana na swona siku na siku. Xana u ehleketa leswaku ku ni ntshembo wo ntshunxiwa eka swiphiqo leswi? [Yimela nhlamulo.] Van’wana va nga ha ehleketa leswaku Xikwembu a xi na mhaka ni xiyimo xa hina lexo nonon’hwa. Hambi swi ri tano, xiya leswi xi swi tshembisaka eka Nhlavutelo 21:3, 4.” Hlaya tindzimana. Sweswi u nga ha komba n’wini wa muti buku leyi nge Hanya Hi Masiku. U nga ha rhandza ku vutisa xivutiso: “Hikwalaho ka yini Xikwembu xi pfumelele vubihi?” N’wi kombise ndzima 11 ya buku leyi nge Hanya Hi Masiku. Loko nkarhi wu pfumela, hi ku komisa u nga ha yisa nyingiso wa n’wini wa muti eka tindzimana 1 na 2 eka tluka 99. Fambisa nyiko, naswona u byela n’wini wa muti leswaku u ta swi tsakela ngopfu ku yisa bulo emahlweni eka riendzo leri landzelaka.
4 Loko n’wini wa muti ana se a ri na yona buku yoleyo, kumbe a nga swi tsakeli ku teka nyiko hikwalaho ka swivangelo swo karhi, kutani fambisa timagazini ta sweswinyana hi ku vulavulela yinhla yo karhi eka xihloko lexi u xi hlawuleke.
U nga ha rhandza ku vulavulela magazini hi ku vula leswi:
◼ “Xihloko lexi xi hlamusela mhaka leyi hi vuenti. [Hlaya xivulwa xin’we kumbe swimbirhi leswi u swi hlawuleke ka ha ri emahlweni.] Xihloko lexi xi nyika marungula lama engetelekeke lawa ma nga vaka xikhutazo eka wena ni le ka ndyangu wa wena. Tanihi leswi u tikombaka u tsakela mhaka leyi, hi ta tsakela ku ku siyela nkandziyiso lowu ni munghana wa wona hi munyikelo wa R1,60.”
5 Hakanyingi namuntlha vanhu va pfilunganyekile loko swi ta emhakeni yo tiva laha va faneleke va hundzukela kona leswaku va kuma mintlhantlho ya swiphiqo leswi langutanaka ni vanhu. Hi ni lunghelo ro avelana na vona ntshembo lowu kongomeke wa vumundzuku. (Mint. 17:27) Xisweswo, onge hi nga yisa nyingiso wa vanhu hi vutlharhi eMfun’weni wa Xikwembu, xihlovo xa ntiyiso xa ku rhula.