Hlanganisa Swiphephana Ni Tibuku Tin’wana

 ¹ Eka timagazini hinkwato leti humesiwaka namuntlha, i Xihondzo xo Rindza ntsena ni Xalamuka! leswi nga pfunaka vahlayi lavanene leswaku va kuma ndlela yo ya evuton’wini lebyi nga heriki. Loko u vulavula ni vanhu hi April na May, van’wana va ta kombisa ku tsakela ka ntiyiso eka rungula ra Mfumo, naswona u nga ha va komba magazini wa sweswinyana ivi u fambisa xikhokhelo. Van’wana eku sunguleni va nga komba ku tsakela kutsongo. Loko swi ri tano, rhanga hi ku bula hi yinhla yin’we kumbe timbirhi ta le xiphephanini; kutani loko n’wini wa muti a komba ku tsakela loku engetelekeke, hlanganisa xiphephana ni magazini kumbe broxara leyi u yi fambisaka.

 ² U nga ha ku:

◼ “Vanhu vo tala va nga pfumela leswaku emisaveni ya namuntlha, ku ni swiphiqo swo tala ku tlula mintlhantlho ya swona. Xana wa swi tiva leswaku swiphiqo swa hina swo tala swi profetiwile eBibeleni?” Kutani u nga pfula matluka 4 na 5 ya xiphephana lexi nge Xana Misava Leyi Yi Ta Pona? ivi u bula hi swiphiqo swin’wana.

 ³ Loko u fambisa Xihondzo xo Rindza xa April 1 kutani n’wini wa muti a komba ku tsakela eka leswi u swi hlayeke exiphephanini, u nga n’wi komba xihloko lexi nge “Landzelela Ku Vonakala Ka Misava” ivi u hlamusela ndlela leyi Yesu Kreste a nga ta lulamisa swiphiqo swa vanhu ha yona eku heteleleni. Kutani u fambisa xikhokhelo. Loko xi nga tekiwi, siyela n’wini wa muti timagazini timbirhi ni xiphephana ivi u kombela ku tlhela u vuya hi nkarhi lowu faneleke mi ta bula hi mhaka leyi mi ya emahlweni.

 ⁴ Loko u fambisa “Xalamuka!” ya April 8, u nga ha tirhisa xingheniso lexi nga eka ndzimana 2 ya xihloko lexi kutani u tlhandlekela u ku:

◼ “Vo tala a va swi tshembi leswaku vukhongeri ni tipolitiki swi nga lunghisa swiphiqo swa hina, kambe va tivutisa leswaku xana sayense yona yi nga swi kota ke.” Kutani hlaya yinhla leyi faneleke eka xihloko lexi nge “Xana Sayense Yi Nga Langutana Na Yona Mphikamakaneta Ya Lembe Xidzana Ra Vu-21?” Swi nga ha endleka leswaku xihloko lexi xi ta tsakisa ngopfu eka vantshwa, ngopfu-ngopfu swichudeni.

 ⁵ Loko u fambisa broxara leyi nge “Vonani,” u nga ha tirhisa xingheniso lexi hambaneke:

◼ “Vanhu lavanyingi va tivutisa leswaku ku humelela yini loko hi fa. Van’wana va ri hi ya etilweni kumbe etiheleni; van’wana a va tiyiseki. Nhlamulo ya Bibele ya hlamarisa yi tlhela yi tiyisa nhlana.” Kutani u nga vulavula hi swiyenge swa xiphephana lexi nge Hi Wihi Ntshembo Wa Varhandziwa Lava Feke? Endzhaku ka sweswo u nga ha hlamusela matluka 16 na 17 eka broxara loko n’wini wa muti a tsakela xiphephana.

 ⁶ Hi ta kuma vanhu vo tala lava khumbekaka swinene hi swiyimo swa misava leswi yaka swi biha. Ha yini u nga va kombi xifaniso lexi nga exiphephanini lexi nge Vutomi eMisaveni Leyintshwa Ya Ku Rhula? U nga ha hlayela n’wini wa muti swivutiso swinharhu leswi tlakusiwaka eka ndzimana yo sungula ya xiphephana lexi. Loko se a hlamurile, n’wi kombe ndzimana yo sungula eka xihlokwana lexi nge “Vutomi eMisaveni Leyintshwa Ya Xikwembu” eka tluka 3. Yona yi hlamusela leswaku Mfumo wa Xikwembu hi wona wu nga ta tisa misava leyintshwa. Loko n’wini wa muti a komba ku tsakela kun’wana, tirhisa Xihondzo xo Rindza xa April 1 hi ndlela leyi ringanyetiweke eka ndzimana 3 ya xihloko lexi.

 ⁷ Loko u ri muhuweleri lontshwa, handle ko kanakana u ta lava xingheniso xo olova. Hikwalaho ka yini u nga kumi swiphephana leswi nge Xana Misava Leyi Yi Ta Pona? kutani u landzela swiringanyeto leswi andlariweke la henhla eka ndzimana 2?

 ⁸ Hi ni lunghelo ra ku yisa rungula ra ku ponisiwa emakaya ya vanhu. Loko hi ri karhi hi lavisisa ‘lava lulameriwaka,’ a hi swi tirhiseni khwatsi swiphephana swa hina ivi hi swi hlanganisa ni tibuku tin’wana loko hi kuma ku tsakela.​​—⁠⁠Mt. 10:⁠13.