Sungula Mabulo Hi Ku Tirhisa Swiphephana
1 Xana a hi ntiyiso leswaku ku nyikela vumbhoni hi ndlela leyi humelelaka swi titshege hi ku va u sungula bulo? Lexi nga xa nkoka i ku vula leswi nga ta xokola ku tsakela ka munhu ivi u n’wi nghenisa ebulwini. Xana leswi swi nga endliwa hi ndlela yihi?
2 Vahuweleri vo tala va xiye leswaku ku vula marito ma nga ri mangani lama hlawuriweke khwatsi, loko va fambisa xin’wana xa swiphephana swa hina leswi sekeriweke eBibeleni, va swi kotile ku sungula bulo. Swihloko swa kona swa tsakisa, kasi swifaniso swa kona swi xongile naswona swi koka mahlo. Xiphephana a xi n’wi lolohisi munhu, a xi n’wi endli a anakanya leswaku u ta boheka ku hlaya rungula ro tala. Hambiswiritano, rungula ro koma leri nga eka swiphephana ri koka nyingiso naswona ri nga ha tirhisiwa ku sungula dyondzo ya Bibele.
3 Mbhoni yin’wana yi vule leswi: “Emisaveni leyi hi tshamaka hi khomekile swinene, hakanyingi vanhu a va lavi ku heta nkarhi wo tala va ri eku hlayeni, kambe swiphephana swi ni rungula ra nkoka swinene naswona a ri lehanga lerova vanhu va ri heta va nga si kolwa. Ndzi hlaye swiphephana swo tala, naswona eku heteleleni ndzi dyondze ntiyiso.” U nga ma tekeli ehansi matimba ya Rito ra Xikwembu lama nga eka swiphephana leswi nga ni rungula ro koma.—Hev. 4:12.
4 Tindlela Ta Mune To Olova: Vo tala va humelerile hi ku tirhisa xingheniso xo olova. (1) Kombisa munhu swiphephana swi nga ri swingani ivi u n’wi kombela a hlawula lexi a xi tsakelaka. (2) Loko munhu wa kona se a xi hlawurile, vutisa xivutiso lexi wupfeke lexi kandziyisaka yinhla-nkulu leyi nga eka xiphephana. (3) Leswaku u hlamula xivutiso xa kona, hlaya ndzimana leyi faneleke kumbe tsalwa leri nga exiphephanini. (4) Loko a ku hlamula kahle, yana emahlweni u hlamusela leswi nga endzeni ka xiphephana kumbe u vulavulela dyondzo yin’wana leyi nga eka broxara leyi nge Leswi Xi Swi Languteleke kumbe ndzima yo karhi ya buku leyi nge Vutivi leyi nyikelaka tinhlamuselo tin’wana. Hi ndlela leyi, u nga ha sungula dyondzo ya Bibele hi ku kongoma. Swiringanyeto leswi landzelaka swi ta ku pfuna leswaku u lunghiselela leswi u nga ta swi vula loko u fambisa swiphephana swa mune.
5 Xihloko xa xiphephana lexi nge “I Mani Loyi Kahle-kahle A Fumaka Misava?” xi nga ha tirhisiwa tanihi xivutiso.
◼ Loko munhu loyi u vulavulaka na yena a hlamula xivutiso lexi a ku, “I Xikwembu” kumbe a ku, “A ndzi tivi,” hlaya swiga swimbirhi swo sungula eka tluka 2 ni ndzimana yo sungula eka tluka 3. Hlamusela leswi vuriwaka hi 1 Yohane 5:19 na Nhlavutelo 12:9. Ku nga khathariseki leswaku munhu wa kona wa byi kanakana kumbe a nga byi kanakani vukona bya Sathana Diyavulosi kumbe wa wu xiya nkucetelo wakwe emisaveni, u nga ha kandziyisa nhlamuselo leyi nga ehansi ka xihlokwana lexi nge, “Mfungho Lowu Nyikiwaka Hi Swiyimo Swa Misava” ivi u yisa bulo emahlweni. Loko munhu wa kona a kombisa ku tsakela, hlamusela laha Diyavulosi a humaka kona, tirhisa tinhla leti boxiweke eka tluka 3 na 4 ta xiphephana.
6 Xiphephana lexi nge “Hi Wihi Ntshembo Hi Varhandziwa Lava Feke” xi nga ha pfuxa ku tsakela. U nga ha sungula bulo hi ku vutisa xivutiso lexi:
◼ “Xana u anakanya leswaku hi ta tlhela hi va vona varhandziwa va hina lava feke?” Loko munhu wa kona a ku hlamurile, hlamusela ndzimana ya vumbirhi leyi nga eka tluka 4 ra xiphephana ivi u hlaya Yohane 5:28, 29. Kutani u hlamusela leswaku i swa nkoka ku twisisa rungula leri nga eka xihlokwana xo sungula xa xiphephana lexi. Vula leswaku u tsakela ku burisana na yena ha xona.
7 Xiphephana lexi nge “Tsakela Vutomi Bya Ndyangu” xi tsakeriwa hi mindyangu yo tala emisaveni hinkwayo. Loko u xi fambisa u nga ha ku:
◼ “Kunene wa pfumela leswaku namuntlha mindyangu yi le khombyeni. Xana u anakanya leswaku ku nga endliwa yini ku tiyisa vun’we bya ndyangu?” Endzhaku ka loko a ku hlamurile, n’wi kombise ndzimana yo sungula eka tluka 6. Hlawula rin’we ra matsalwa lama tshahiweke eka ndzimana 4 na 5 eka xiphephana lexi, u tlhela u hlamusela leswi matsalwa lawa ma swi vulaka. Kutani vula leswaku u tsakela ku n’wi fambisela dyondzo ya Bibele ya le kaya ya mahala.
8 Xiphephana lexi nge “Mhaka Leyi U Nga Tshembeka Bibele Ha Yona” xi nga ha tirhisiwa ni xingheniso lexi:
◼ “Vanhu vo tala va yi tiva mhaka ya Kayini na Avele, leyi kumekaka ebukwini yo sungula ya Bibele. Rungula leri nga eka Genesa ri tlhela ri vulavula hi nsati wa Kayini. Xana u tshama u tivutisa leswaku a a huma kwihi nsati loyi?” N’wi hlamule hi ndzima yo hetelela leyi nga eka tluka 2 ra xiphephana lexi. Nakambe hlamusela leswaku xiphephana lexi xi ni tinhlamuselo ta nkoka ta Bibele leti boxaka leswi vumundzuku byi hi khomeleke swona. Sungula hi ndzimana ya vunharhu leyi nga eka tluka 5, yisa bulo emahlweni, hlaya matsalwa lama tiyisaka mhaka leyi.
9 Ku hangalasa swiphephana swa Bibele i ndlela leyi nga ni malembe yi ri karhi yi tirhisiwa eku twariseni ka mahungu lamanene ya Bibele. Hikwalaho ka leswi swi olovaka ku famba ni swiphephana kun’wana ni kun’wana laha u yaka kona, u nga ha swi tirhisa entirhweni wa yindlu ni yindlu ni loko u nyikela vumbhoni hi xitshuketa. Swiphephana swi hi pfuna ngopfu eku hetisiseni ka vutirheli bya hina. Tiyiseka leswaku, u famba ni swiphephana swo hambana-hambana naswona u tirhisa swona leswaku u sungula bulo.—Kol. 4:17.