Tirhisa Swiphephana Ku Chumayela Mahungu Lamanene
1. Xana vanhu va Xikwembu va swi tirhise njhani swiphephana?
1 Vanhu va Yehovha i khale va ri karhi va tirhisa swiphephana leswi sekeriweke eBibeleni leswaku va chumayela mahungu lamanene. Hi 1880, C. T. Russell swin’we ni vanghana vakwe va sungule ku kandziyisa Swiphephana Swa Swichudeni Swa Bibele, naswona swi nyikiwe vahlayi va Xihondzo Xo Rindza leswaku va swi hangalasa eka vanhu hinkwavo. Swiphephana a swi tekiwa swi ri swa nkoka swinene lerova hi 1884, loko C. T. Russell a simeka nhlangano lowu nga le nawini lowu fambisiwaka handle ko bindzula, hi xikongomelo xo chumayela mahungu lamanene, rito leri nge “tract” [xiphephana] a ri katsiwile eka vito leri nge Zion’s Watch Tower Tract Society, leri sweswi ri vitaniwa Watch Tower Bible and Tract Society of Pennsylvania. Hi 1918, Swichudeni Swa Bibele swi fambise swiphephana leswi tlulaka 300 wa timiliyoni. Swiphephana swi hambete swi va xitirhisiwa lexinene xo chumayela.
2. Ha yini swiphephana swi pfuna?
2 Lexi Endlaka Swi Pfuna: Swiphephana swi koka mahlo. Swi tamele rungula ro koma leri twisisekaka ri tlhela ri dyondzisa. Swi koka rinoko eka vini va miti lava nga rhandziki ku hlaya magazini kumbe buku. Vahuweleri lavantshwa kumbe vana swi nga va olovela ku swi fambisa. Tlhandlakambirhi, swiphephana i switsongo naswona swa khomeka.
3. Hlamusela ntokoto lowu kombaka nkoka wa swiphephana.
3 Vo tala va sungule ku dyondza ntiyiso hi swiphephana. Hi xikombiso, wansati un’wana wa le Haiti u vone xiphephana xo karhi exitarateni. U xi rholile ivi a xi hlaya kutani a ku, “Ndzi kume ntiyiso!” Eku heteleleni u ye eHolweni ya Mfumo, kutani a sungula ku dyondza Bibele naswona se u khuvuriwile—hinkwaswo swi endleke hi matimba ya Rito ra Xikwembu leri a ri kumeke eka xiphephana.
4. Hi yihi pakani ya hina loko ku fambisiwa swiphephana n’hweti yoleyo?
4 Hi Yindlu Ni Yindlu: Tanihi leswi swiphephana ku nga switirhisiwa leswinene swo nyikela vumbhoni, ku sukela hi November swiphephana swi ta wela eka minkandziyiso ya n’hweti leyi nga ta fambisiwa nkarhi ni nkarhi. Xikongomelo xa hina i ku sungula bulo ni n’wini wa muti hi ku tirhisa xiphephana ku nga ri ku n’wi nyika xona. Loko munhu a kombisa ku tsakela eka riendzo ro sungula kumbe eka riendzo ro vuyela, hi nga sungula dyondzo ya Bibele hi ku tirhisa buku leyi nge Leswi Bibele Yi Swi Dyondzisaka kumbe nkandziyiso wun’wana. Hi nga swi fambisa njhani swiphephana loko hi ri entirhweni wa yindlu ni yindlu? Swiphephana swa hambana hikwalaho hi fanele hi tiva swiphephana leswi hi swi fambisaka.
5. Hi nga swi fambisa njhani swiphephana hi yindlu ni yindlu?
5 Swingheniso swa hina swi fanele swi fambisana ni swiyimo ni swiphephana leswi hi swi fambisaka. Hi nga sungula bulo hi ku nyika n’wini wa muti xiphephana. Xifunengeto lexi kokaka mahlo xi nga ha n’wi tsakisa. Kumbe hi nga ha n’wi komba swiphephana swi nga ri swingani kutani hi yimela n’wini wa muti leswaku a hlawula lexi n’wi tsakisaka. Loko hi tirha nsimu kutani n’wini wa muti a nga pfuli rivanti, hi nga ha veka xiphephana laha n’wini wa muti a nga ta xivona kumbe hi nga ha kombela ku twa vonelo rakwe eka mhaka yo karhi hi ku va hi nghenisa xiphephana ehansi ka rivanti rakwe. Loko nhloko-mhaka ya xiphephana ku ri xivutiso, hi nga kombela ku twa vonelo rakwe malunghana na xona. Kumbe hi nga n’wi vutisa xivutiso lexi nga ta endla leswaku a tsakela kutani hi sungula bulo. Nakambe hi nga ha hlaya xiphemu xa xiphephana ni n’wini wa muti, hi yima laha ku nga ni xivutiso kutani hi n’wi kombela leswaku a xi hlamula. U nga ha hlaya tsalwa rin’we eBibeleni. Endzhaku ko kambisisa timhaka ti nga ri tingani, hi nga gimeta bulo kutani hi endla malunghiselelo yo tlhela hi vuya. Loko vandlha ri tala ku siya minkandziyiso emitini leyi ku nga riki na munhu, hi nga ha siya xiphephana laha n’wini wa muti a nga ta xi kuma kona.
6. Hi nga swi tirhisa njhani swiphephana loko hi chumayela eswitarateni?
6 Ku Chumayela eSwitarateni: Xana u tshame u fambisa swiphephana loko u chumayela eswitarateni? Vanhu van’wana va hundza va jahile naswona va nga tiyimiselanga ku yima va bula na hina. Swi nga ha hi tikela ku vona loko hakunene va tsakela. Ematshan’weni yo va nyika magazini lowa ha ku kandziyisiwaka handle ko tiva loko va ta wu hlaya kumbe e-e, swi nga va swinene ku va nyika xiphephana. Tanihi leswi xifunengeto xa xona xi kokaka mahlo naswona rungula ra xona ri nga koma, sweswo swi nga susumetela vanhu ku hlaya loko va kuma xinkarhana. Entiyisweni, loko va nga khomekanga, hi nga ha bula na vona hi rungula ro karhi leri nga eka xiphephana.
7. Hlamusela ntokoto lowu kombaka ndlela leyi hi nga fambisaka swiphephana ha yona leswaku hi chumayela hi xitshuketa.
7 Ku Chumayela Hi Xitshuketa: Swa olova ku fambisa swiphephana loko u chumayela hi xitshuketa. Makwerhu un’wana loko a huma ekaya u teka swiphephana swi nga ri swingani nkarhi ni nkarhi. Loko a hlangana ni munhu wo karhi, wo tanihi matsalana wa xitolo, u kombela ku n’wi nyika nchumu wo karhi wo hlaya kutani a humesa xiphephana. Loko mpatswa wun’wana wu ya eDorobeni le New York ku ya valanga, wu lemuke leswaku wu hlangana ni vanhu vo tala lava humaka ematikweni yo hambana-hambana. Xisweswo wu sungule ku famba ni xibukwana lexi nge Nations, swin’we ni swiphephana swa tindzimi to hambana-hambana. Kutani loko wu twa munhu un’wana la vulavulaka ririmi rimbe loyi a xavisaka exitarateni kumbe loyi a tshameke ekusuhi na wona ephakeni kumbe ekhefini a wu n’wi fambisela xiphephana hi ririmi rakwe.
8. Xana swiphephana swi fana ni mbewu hi ndlela yihi?
8 “Byala Mbewu Ya Wena”: Swiphephana swi nga fanisiwa ni mbewu. N’wa-mapurasi u haxa mbewu yakwe hinkwako hikuva a nga swi tivi leswaku hi kwihi laha yi nga ta mila kona. Eklesiasta 11:6 yi ri: “Byala mbewu ya wena nimixo, naswona u nga ri wisisi voko ra wena ku fikela nimadyambu; hikuva a wu swi tivi leswaku leswi swi ta lulama kwihi, laha kumbe lahaya, kumbexana haswimbirhi swi ta va leswinene.” Hikwalaho, onge hi nga “tshamela ku hangalasa vutivi” hi ku tirhisa xitirhisiwa lexi xa nkoka!—Swiv. 15:7.
[Marito lama tshahiweke exihlokweni lama nga eka tluka 3]
Tanihi leswi swiphephana ku nga switirhisiwa leswinene swo nyikela vumbhoni, ku sukela hi November swiphephana swi ta wela eka minkandziyiso ya n’hweti leyi nga ta fambisiwa nkarhi ni nkarhi