Mhaka Leyi Swiphephana Swi Nga Swa Risima Ha Yona eVutirhelini Bya Hina Namuntlha
1 Enkandziyisweni wa Xihondzo xo Rindza wa January 1, 1991, tluka 30, a ku ri ni ntokoto lowu nge “U Kume Xiphephana eNtileni.” A xi vulavula hi mukongomisi wa valunghisi va xiporo loyi a nga kuma xin’wana xa swiphephana swa hina xi nghene ehansi ka xiporo. U hlaye xiphephana hi nkarhi wolowo ivi a byela mukon’wana wakwe: “Namuntlha ndzi kume ntiyiso!” Havambirhi va ode tibuku tin’wana, va ti dyondza. Sweswi vatukulu va vona vo tlula dzana va gingiriteka entiyisweni. Leswi swi komba leswi swi nga endlekaka hi ku hlaya xiphephana xin’we ntsena.
2 Ku Tirhisa Minkarhi: Vamakwerhu endhawini hinkwayo va kuma minkarhi yo fambisa swiphephana. Muntshwa un’wana wa Mbhoni u vula leswaku mudyondzisi wa yena a a tshoveke mbilu hikwalaho ka rifu ra n’wingi wakwe. Makwerhu loyi lontshwa u tsalele mudyondzisi wakwe papila leri chavelelaka ivi a nghenisa xiphephana lexi nge Hi Wihi Ntshembo Wa Varhandziwa Lava Feke? Mudyondzisi u tsale papila ro nkhensa ivi a vulavurisana na makwerhu wa hina lontsongo. Sweswi mudyondzisi loyi u kuma timagazini nkarhi na nkarhi eka yena.
3 Vahuweleri van’wana lava a va veka vumbhoni exitarateni lexi a xi ya emasirheni va vone vanhu va ri karhi va basisa masirha. Vahuweleri va tirhisa nkarhi lowu ku va fambisela swiphephana. Siku leri landzelaka a ku ri siku ro wisa leri vanhu lavanyingi a va endzela emasirheni, kutani vahuweleri va ehleketa ku yima egedeni ra masirha va fambisa swiphephana. Va fambise swiphephana swo tlula ntlhanu wa madzana, a ku ri vanhu vanharhu ntsena lava aleke ku swi teka. Hi lembe leri landzeleke, vahuweleri va tlhelerile ivi va fambisa swiphephana swo tlula gidi, a ku ri tsevu ntsena lava aleke ku swi teka. Vanhu vo tala va swi tlangerile swinene. Munhu un’wana u hlaye xiphephana loko a huma, kutani hi ku hatlisa a vuya a ta vulavula ni makwerhu wa xisati loyi a nga n’wi nyika xona. U te: “Ndzi lava ku nyika un’wana a hlaya mhaka leyi. Xana ndzi nga xi kuma xin’wana?”
4 Swiphephana swi ni mpimo lowu khomekaka naswona swa olova ku swi rhwala loko hi famba. Loko hi bula ni van’wana hi xitshuketa, lava taka hi ku famba kumbe vanghana, hi fanele hi lwela ku vula marito yo koma lawa ma nga yisaka eku vulavuleni hi xin’wana xa swiphephana swa tsevu leswi hi nga na swona sweswi. Leswi swi nga endliwa loko hi bula ni vaakelani, loko hi xava kumbe hi rindzele swin’wana, loko hi endzela maxaka kumbe eka swiyimo swin’wana swo tala.
5 Lexi Xi Swi Endlaka Swi Humelela: Swiphephana swi ni mivala yo xonga. Swi komile. Vini va miti ni lava hi hlanganaka na vona hi xitshuketa a va chavi, kumbe ku titwa va boheka ku hlaya ngopfu. Kambe, rungula ra kona ra tsakisa ni ku dyondzisa. Muhlayi u kuma langutelo leri tiyeke ra Matsalwa ra mhaka leyi hlamuseriwaka exiphephanini. Endzhaku ko kuma xiphephana lexi nge Vutomi eMisaveni Leyintshwa Ya Ku Rhula ni ku hlamuseriwa xona, muntshwa un’wana u huwelerile: “A ndzi si tshama ndzi twa rungula ro tano leri tiyisaka nhlana malunghana ni xiyimo xa misava!”
6 Hi fanele hi tirhisa swiphephana leswi hi nkarhi wihi na wihi lowu faneleke. Vahuweleri vo tala va swi kume swi pfuna ku sungula mabulo entirhweni wa yindlu na yindlu. Tidyondzo to tala leti fambisiwaka sweswi ti sunguriwe hi xiphephana. Eka tluka 4 ra nkandziyiso lowu wa Vutirheli Bya Hina Bya Mfumo, ku ni swiringanyeto leswi tirhaka swa ndlela yo tirhisa swiphephana hi laha ku humelelaka. Ina, swiphephana i switirho leswitsongo, kambe i swa risima evutirhelini bya hina.