Xivumbeko Lexi Kokaka Rinoko Xa Swiphephana Leswintshwa!
1. I switirhisiwa swihi swa le nsin’wini leswi nga ni xivumbeko lexintshwa lexi kokaka rinoko?
1 EMintsombanweni ya Muganga ya 2013 leyi a yi ri ni nhloko-mhaka leyi nge, ‘Rito Ra Xikwembu I Ntiyiso!’ ku humesiwe swiphephana leswintshwa swa ntlhanu. Ku engetela kwalaho, eka swona ku engeteriwe Kingdom News No. 38, leyi nga ni nhloko-mhaka leyi nge, “Xana Vafi Va Ta Tlhela Va Hanya Hakunene?” Swiphephana leswi swa tsevu swi ni xivumbeko lexintshwa lexi kokaka rinoko. Ha yini swi endliwe hi ndlela yoleyo? Loko hi swi fambisa hi yindlu ni yindlu, hi nga xi hlamusela njhani xivumbeko xa swona hi ndlela leyinene?
2. Hi xihi xikongomelo xa xivumbeko lexintshwa xa swiphephana?
2 Ha Yini Ku Tirhisiwe Xivumbeko Lexintshwa?: Swingheniso leswi tirhaka loko ku chumayeriwa hi yindlu ni yindlu hakanyingi swi katsa magoza lawa ya mune: (1) Vutisa xivutiso xo lava ku tiva vonelo ra n’wini wa muti leswaku u sungula bulo. (2) N’wi hlayele tsalwa kumbe u ri hlamusela kunene. (3) Siyela n’wini wa muti nkandziyiso lowu a nga ta sala a wu hlaya. (4) N’wi vutise xivutiso lexi u nga ta xi hlamula enkarhini lowu taka, kutani u endla malunghiselelo yo tlhela u vuya. Xivumbeko lexintshwa xa swiphephana leswi xi hi pfuna ku landzela magoza lawa ya mune hi ku olova.
3. Hi nga xi fambisa njhani xin’wana xa swiphephana leswintshwa ensin’wini?
3 Ndlela Yo Swi Fambisa: (1) Endzhaku ko xeweta n’wini wa muti, n’wi kombe xivutiso lexi tlhontlhaka mianakanyo lexi nga eka tluka ro sungula ra xiphephana laha a faneleke a hlawula nhlamulo, kutani u n’wi vutisa vonelo rakwe. (2) Pfula xiphephana endzeni kutani mi tlhuvutsa xihlokwana lexi nge, “Leswi Bibele Yi Swi Vulaka.” Loko swiyimo swi pfumela, n’wi hlayele tsalwa hi ku kongoma eBibeleni. Loko n’wini wa muti a ri ni nkarhi, bula na yena hi xihlokwana lexi nge, “Ndlela Leyi Sweswo Swi Nga Ku Vuyerisaka Ha Yona.” (3) N’wi fambisele xiphephana kutani u n’wi khutaza ku xi hlaya hinkwaxo loko a kuma nkarhi. (4) Loko u nga si famba, n’wi kombe xivutiso lexi nga le ka tluka ro hetelela ehansi ka xihlokwana lexi nge, “Xivutiso Xo Anakanyisisa Ha Xona” kutani u endla malunghiselelo yo bula hi nhlamulo leyi humaka eBibeleni enkarhini lowu taka.
4. Hi nga swi tirhisa njhani swiphephana leswintshwa loko hi endla riendzo ro vuyela?
4 Swa olova ni ku endla riendzo ro vuyela. Tirhisa matsalwa lama kombisiweke eka tluka ro hetelela ra xiphephana leswaku u hlamula xivutiso lexi u xi vutiseke loko mi gimeta bulo ra n’wina enkarhini lowu hundzeke. Loko u nga si famba, komba n’wini wa muti xifaniso xa broxara leyi nge Mahungu Lamanene lexi nga eka xiphephana, kutani u n’wi komba broxara hi yoxe ni dyondzo leyi vulavulaka hi mhaka yoleyo, ivi u n’wi fambisela yona. Loko a pfumela ku yi teka, endla malunghiselelo yo bula hi broxara yoleyo eka riendzo ra wena leri landzelaka. Se u sungule dyondzo ya Bibele! Kumbe ematshan’weni yo fambisa broxara, u nga ha fambisa xiphephana xin’wana kutani u hlela ku tlhelela leswaku mi ya bula ha xona ni n’wini wa muti.
5. Swiphephana i swa nkoka ku fikela kwihi entirhweni wa hina wa nsimu?
5 Se hi ni malembe yo tlula 130 hi tirhisa swiphephana ensin’wini. Hambileswi mpimo wa swona ni xivumbeko xa swona a swi hambana, swi ve xitirhisiwa lexi pfunaka swinene entirhweni wo chumayela. Onge hi nga swi tirhisa kahle swiphephana leswi leswintshwa leswaku hi ta ya emahlweni hi twarisa vutivi bya le Bibeleni emisaveni hinkwayo.—Swiv. 15:7a.