Ku Twarisa Mahungu Lamanene

Hi Swiphephana

1 Wanuna un’wana u tsalele Sosayiti a ku, “Ndzi hlangane ni wansati loyi a ndzi nyikeke xiphephana xa Bibele. A xi ku, ‘Vutomi eMisaveni Leyintshwa Ya Ku Rhula.’ A ndzi tsanile loko ndzi nga si xi hlaya, kambe endzhakunyana a ndzi nyanyukile naswona ndzi ri ni ku rhula.” Wanuna loyi u lave rungula leri engetelekeke naswona u tsarile ha swona, a hlamusela a ku: “Hi ku hiseka ndzi langutele buku leyi nge, ‘U nga Hanya Hi Masiku aParadeyisini eMisaveni’ leyi humaka eka n’wina.”

2 Hakunene, vo tala sweswi lava dzunisaka Yehova va twe torha ra vona ra moya ri timuriwa hi swiphephana na hi rungula ra Bibele leri gandlisiweke endzhaku ka swiphephana swa hina. Xana wa swi tirhisa swiphephana ensin’wini ya ka n’wina? Vo tala va swi tirhisa. EAfrika Dzonga, ku tlula 1,7 wa timiliyoni ta swiphephana leswi nge eMisaveni Leyintshwa Ya Ku Rhula swi gandlisiwile, kun’we ni kwalomu ka 3,5 wa timiliyoni ta tikopi ta swiphephana swin’wana swinharhu leswi nge, Mhaka Leyi U Nga Tshembaka Bibele Ha Yona, Xana Timbhoni Ta Yehova Ti Pfumela Yini? na Hi Wihi Ntshembo Wa Varhandziwa Lava Feke? Ku tlula 250 000 wa swiphephana nakambe swa rhumeriwa emabandlheni ya le Afrika Dzonga lembe rin’wana ni rin’wana.

3 A hi fanelanga ku honisa matimba ya Rito ra Xikwembu hi laha swi hlamuseriweke ha kona eka marungula lawa yo koma. (Vahev. 4:12; ringanisa Zakaria 4:10; Yakobo 3:4, 5.) Mbhoni yin’wana yi tsarile: “Ndzi hlaye swiphephana swo tala leswi humaka eka Sosayiti ya Watch Tower, naswona eku heteleleni ndzi dyondze ntiyiso.” U hlamuserile: “Emisaveni leyi yi nga bizi, hakanyingi vanhu a va swi lavi ku tinyika nkarhi wo tala va hlaya, kambe swiphephana swi lehe kahle ku va ni rungula ra nkoka kambe a swi lehanga ngopfu lerova swi nga hambukisa vanhu va nga si swi langutela.”

4 Hikwalaho ka swivangelo swo tala, hakanyingi vanhu va kanakana ku teka tibuku eka hina. Kambe vo tala hi ntsako va amukela xiphephana ntsena. Mulanguteri un’wana wa xifundza u hlamusela leswaku u na nkwama lowuntsongo wa pulasitiki naswona u kombisa swiphephana, a pfumelela n’wini wa muti a hlawula lexi a xi lavaka. Wa tsala, “xiphephana xo sungula lexi hlawuriwaka hi lexi nge Xana Timbhoni Ta Yehova Ti Pfumela Yini?”

EKA KU HLANGANA KO SUNGULA

5 Vahuweleri van’wana va kuma leswaku ku nyikela xiphephana i ndlela leyi humelelaka yo sungula mabulo. Hi ku xi nyikela, n’wini wa muti loyi a kanakanaka ku pfula nyangwa a nga susumeteleka ku endla tano. Ku kombisa xiyimiso xa nhlangano lexi andlariweke exiphephanini swi nga pfula ndlela ya bulo ra ntirho ni xikongomelo xa hina. Xana wa swi tirhisa swiphephana? Vakulu va fanele ku tiyiseka leswaku ku na mphakelo lowunene leswaku wu tirhisiwa hi bandlha.

6 Loko n’wini wa muti hakunene a khomekile kumbe a tshikilelekile, xiphephana ku nga ha va lexi lavekaka. Wansati un’wana a a chaveleriwile swonghasi hi xiphephana xa ntshembo wa lava feke lerova a tsalela Sosayiti leswaku a kuma rungula leri engetelekeke. Loko ku nga ri na munhu ekaya, xiphephana xi nga siyeriwa n’wini wa muti laha xi nga ta ka xi nga voniwi hi vahundzi va ndlela.

EKA MAENDZO YO VUYELA

7 Loko u tlhelela laha ku tsakela ku kombisiweke kona enkarhini lowu hundzeke, u nga ha ku: “Xewani, [nyika vito]. Entiyisweni ndzi tsakile ku ku kuma u ri ekaya. Loko hi hlangana ro sungula, ndzi tsakisiwe hi ku tinyika ka wena nkarhi wo vulavula hi Bibele. Ndzi na rungula rin’wana leri engetelekeke leri ndzi ehleketaka leswaku ri nga ku tsakisa. Ri kumeka eka xiphephana lexi, Vutomi eMisaveni Leyintshwa Ya Ku Rhula. Loko u tsundzuka, nkarhi lowu hundzeke hi vulavule hi xitshembiso xa Bibele xa ku rhula ka ntiyiso ni loku nga heriki ka vanhu. Hambi swi ri tano, tanihi leswi vo tala va ehleketaka hi tilo ntsena loko va hlaya hi ta switshembiso leswi, xiya leswaku Psalma 37:29 yi kombisa leswaku mikateko leyi yi ta humelela laha misaveni. [Hlaya tsalwa, u kombisa n’wini wa muti laha ri nga kona exiphephanini.] Xana a swi twali swi tsakisa sweswo? [Hlamusela tindzimana to hlayanyana.] Ku na matsalwa yo tala lama khutazaka eka xiphephana lexi, naswona u ta ma kuma ma tsakisa hi ku fanana. Nkarhi lowu taka loko ndzi ta, kumbexana hi nga hlaya man’wana ya wona swin’we hi laha hi endleke ha kona namuntlha.”

8 Entiyisweni, swiphephana swa hina i nyiko leyi humaka eka Yehova. Onge hi nga tirhisa swipfuno leswi swi tirhaka hi vutshila loko hi hetisisa vutirheli lebyi humelelaka lebyi dzunisaka yena ivi hi katekisiwa hi laha ku nga heriki.—Swiv. 22:29.