Bokisi Ra Swivutiso
◼ Xana ku tirha tanihi phayona ra nkarhinyana swi fanele ku langutiwa hi ndlela yihi?
Vuphayona bya nkarhinyana byi fanele ku langutiwa tanihi lunghelo ni vutihlamuleri lebyikulu. Vahuweleri va makume ya magidi n’hweti yin’wana ni yin’wana va tirha tanihi maphayona ya nkarhinyana, kasi van’wana va swi endla nkarhi na nkarhi. Hi khensa vahuweleri lava lava hisekaka, lava swiyimo swa vona swi va pfumelelaka ku heta tiawara ta 60 leti lavekaka entirhweni wa nsimu n’hweti na n’hweti loko va tirha tanihi maphayona ya nkarhinyana. Vakulu swin’we ni van’wana va fanele va khutaza vahuweleri lava endlaka xikombelo xa vuphayona bya nkarhinyana leswaku va teka ntirho wa vona wu ri wa nkoka naswona va nga tshuki va wu tekela ehansi.
Ku kotisa maphayona ya nkarhi hinkwawo, lava va tirhaka tanihi maphayona ya nkarhinyana n’hweti yin’we kumbe ku tlula va fanele va rhanga hi ku hlayela leswi va nga ta swi humesa. (Lk. 14:28) Leswi swi katsa ku vona ka ha ri emahlweni leswaku va nga swi kota ku heta nkarhi lowu lavekaka evutirhelini bya nsimu handle ko honisa vutihlamuleri byin’wana bya Vukreste. Xiboho lexi munhu a xi endlaka xo tsarisela vuphayona bya nkarhinyana u fanele a xi endla endzhaku ko khongela a ehleketile hi swiyimo swakwe. A xi fanelanga xi vangiwa hi minsusumeto ya leswaku van’wana va tsarisa. Ku fanele ku va xiboho lexi ehleketiweke kahle, lexi fambisanaka ni xiyimiso lexi tsariweke xo hetisisa swilaveko swa kona. I swinene ku hlaya xikombelo hi vukheta ivi u boha leswaku u nga pfumela eka leswi lavekaka.
Ina, ku laveka ntamu lowu engetelekeke. Tin’hweti tin’wana elembeni ti hi endla hi “khomeka swinene” hi ku chumayela mahungu lamanene. (Mint. 18:5) Leswi swi katsa nguva ya Xitsundzuxo ya March na April ni tin’hweti leti mulanguteri wa xifundzha a endzaka ha tona evandlheni. Vahuweleri van’wana va hlela leswaku va landzela swiyimo leswi nonon’hwaka leswaku va hlanganyela hi laha ku engetelekeke entirhweni wo chumayela eminkarhini leyi ya ntirho wo hlawuleka, hi ku vona leswaku hakanyingi va kuma mikateko leyi fuweke. (2 Kor. 9:6) Vahuweleri vo tala va endla matshalatshala yo hlawuleka yo phayona etin’hwetini ta ku wisa ni le ka n’hweti yihi na yihi elembeni, leyi vaka ni mahelo-vhiki ya ntlhanu. Kambe loko va sayina, va xi twisisa xilaveko xo namarhela nsinya wa nawu lowu nge, ‘Ina wa wena a ve Ina’ hi ku tikarhatela ku vika tiawara ta 60 kumbe ku tlula n’hweti yin’wana ni yin’wana loko va ri maphayona ya nkarhinyana.—Mt. 5:37.
Vahuweleri lava va nga swi kotiki ku phayona va nga pfuna hi ku tiendla va kumeka leswaku va tirha swin’we ni maphayona ya nkarhinyana, va hlela nkarhi na vona. Swa pfuna ku tirha nkarhi wo leha ensin’wini swin’we ni maphayona loko swi koteka. Maphayona ngopfu-ngopfu ma nga tlangela nseketelo wa vahuweleri van’wana ni mixo, ni ndzhenga kumbe ni madyambu. Maphayona ya nkarhinyana ma swi tsakela ku rhambiwa ma tirha ni van’wana eku endleni ka maendzo yo vuyela ni ku sungula tidyondzo ta le kaya ta Bibele. Lava va nga swi kotaka ku seketela maphayona ya nkarhinyana hi ndlela yoleyo va ta kuma ntsako lowukulu lowu taka hi ku nyika.—Mint. 20:35.
Ku gingiriteka ka maphayona yo tala ya nkarhinyana ka tlangeriwa swinene. Lava kotaka ku tirha na vona va nga langutela mikateko leyi fuweke. (Swiv. 10:4) Hi wihi nkarhi wun’wana lowu u nga hlanganyelaka ha wona eka ntsako wa ntirho lowu engetelekeke tanihi phayona ra nkarhinyana?