Ku Hlakulela Ku Tsakela Eka Maendzo Yo Vuyela
1 Vutirheli byi fanisiwe kahle ni vurimi, naswona ku endla maendzo yo vuyela swi ringanisiwe ni ku hlakula ni ku cheleta. (Mt. 13:23; Lk. 10:2; 2 Kor. 9:10) Tanihi “vatirhi-kulo[rhi] eka Xikwembu,” hi ni vutihlamuleri byo pfuna mbewu yihi ni yihi leya ha ku milaka leswaku yi kula ni ku veka mihandzu. (1 Kor. 3:6, 9) Xana leswi hi nga swi endla njhani hi ndlela yo antswa?
2 Hatlisa u vuyela eka hinkwavo lava kombiseke ku tsakela. Kambisisa tirhekhodo ta wena ta yindlu na yindlu, kutani u hlela leswaku i vamani lava u faneleke ku va endzela ni leswaku mi ta bula hi yini. Hi ntolovelo nhloko-mhaka leyi mi nga ta burisana ha yona yi ta va yi titshege hi leswi mi vulavuleke ha swona eriendzweni ro sungula. Pfumelelana ni swiyimo, u ehleketa hi Matsalwa man’wana lama nga ha tirhisiwaka. Nkarhi hinkwawo i swinene ku tirhisa Bibele, u xiya matimba ya yona yo fikelela timbilu.—Hev. 4:12.
3 Loko u siye broxara leyi nge “Xana Xikwembu Xa Hi Khathalela Hakunene?,” u nga ha sungula hi ku vula swin’wana swo fana ni leswi:
◼ “Vanhu vo tala lavanene va pfumela leswaku Xikwembu xi ta lovisa misava, loko van’wana va anakanya leswaku vanhu va ta yi herisa hi voxe. Wena u ri yini hi mhaka leyi? [Yimela nhlamulo.] Bibele yi hi byela leswaku ematshan’wini yo lovisa misava, Xikwembu xi ta susa vuhomboloki ehenhla ka yona, xi yi endla yi va ndhawu ya ku rhula ni nsirhelelo.” Kokela nyingiso eka tluka 22, ivi u hlaya Swivuriso 2:21, 22, leyi tshahiweke kwalaho. Loko ku kombisiwa ku tsakela, hlamusela lunghiselelo ra dyondzo ya le kaya ya Bibele kumbe u fambisa timagazini ta sweswinyana, kutani u lunghiselela ku tlhela u vuya mi ta vulavula hi leswi engetelekeke malunghana ni misava leyintshwa leyi tshembisiweke hi Xikwembu.
4 Loko u fambise broxara leyi nge “Vonani” u nga ha ku:
◼ “Enkarhini lowu hundzeke, hi hlaye eBibeleni hi xitshembiso xa Xikwembu xo endla misava yi va paradeyisi, ku fana ni leyi kombisiweke exifunengetweni xa broxara leyi ndzi ku siyeleke yona. Hi nga kuma mikateko leyi hi ku dyondza leswi engetelekeke hi ku rhandza ka Xikwembu ni ndlela leyi ku hi khumbaka ha yona.” Hlaya Yohane 17:3, kutani mi kambisisa tindzimana 52 na 53 eka tluka 27. Hlamusela hi ku komisa leswaku ha yini hi fanele ku kuma vutivi lebyi kongomeke bya Rito ra Xikwembu.
5 Loko u tlhelela laha u fambiseke broxara leyi nge “Xikongomelo Xa Vutomi” eka munhu loyi a nga wa vukhongeri, u nga ha kuma swi ri swinene ku vula leswi:
◼ “Handle ko ba mariri u xi phindhe ko tala Xikhongelo xa Hosi. U ehleketa yini loko u kombela Mfumo wa Xikwembu leswaku wu ta?” Endzhaku ka nhlamulo ya n’wini wa muti, kombetela eka tindzimana 8 na 9 eka tluka 26, ivi u hlaya Daniyele 2:44. Kumbexana u nga yisa bulo emahlweni hi ku hlamusela leswaku ku ta ka Mfumo wa Xikwembu swi ta vula ku herisiwa ka vubihi ni ku xaniseka. Kombisa leswaku loko hi lulamile emahlweni ka Xikwembu, hi nga tsakela vutomi lebyi nga heriki eParadeyisini emisaveni leyi.
6 Tsundzuka leswaku riendzo ro vuyela ri nga endliwa eka un’wana ni un’wana loyi a yingiselaka, hambi hi siye buku kumbe e-e. Ringeta ku hlela nkarhi wo endla maendzo yo vuyela vhiki na vhiki. Yehovha u ta katekisa ku gingiriteka ka wena ka ku hlakulela ku tsakela loku u ku kumaka. Onge ku nga tswala mihandzu leyi n’wi dzunisaka.—Yoh. 15:8.