Endla Maendzo Yo Vuyela Hinkwako Laha U Fambiseke Tibroxara
1 Muapostola Pawulo u bumabumele Vafilipiya hikwalaho ka ‘ku pfuxeta torha ra vona ra ku n’wi pfuna.’ (Flp. 4:10) Loko hi tirhisa xikombiso xa vona tanihi ntila wa vutirheli bya nsimu, hi ta ‘pfuxeta torha ra hina’ eka lava hi nyikeleke vumbhoni eka vona naswona hi ta susumeteleka ku endla maendzo yo vuyela.
2 Loko u fambise broxara leyi nge “Hulumendhe Leyi Nga Ta Tisa Paradeyisi,” u nga ha vula swin’wana swo fana ni leswi:
◼ “A ndzi ri karhi ndzi anakanya hi bulo ra hina ra siku leriyani, kutani ndzi tsundzuka hi matsalwa mambirhi lawa ndzi tsakelaka ku ma hlaya na wena. U ta tsundzuka leswaku hi vulavule malunghana ni Xikwembu loko xi fuma misava. EBibeleni, Yehovha Xikwembu u tshembise leswaku leswi swi ta humelela. [Hlaya Daniyele 2:44.] Xana wa pfumela leswaku sweswo swi nga humelela hakunene? [Yimela nhlamulo.] Yingisela leswi Xikwembu xi swi vulaka malunghana ni vuswikoti bya xona byo hetisisa switshembiso swa xona. [Hlaya Esaya 55:11.] Xana sweswo a swi hi khutazi leswaku hi veka ku tshemba ka hina eMfun’weni wa Xikwembu? Kambe xana Xikwembu xi ta swi hetisisa rini switshembiso swa xona?” N’wi byele leswaku u ta hlamula xivutiso xexo eriendzweni ra wena ra nkarhi lowu taka.
3 U nga ha tirhisa xingheniso lexi loko u endla riendzo ro vuyela eka munhu loyi a tekeke broxara leyi nge “Loko U Feriwa Hi Loyi U N’wi Rhandzaka”:
◼ “Ndzi endle hi matimba leswaku ndzi vuya, hikwalaho ka bulo ra hina ra mayelana ni ku feriwa hi munhu.” N’wi kombe xifaniso eka tluka 30 u ri karhi u ku: “Xana wa xi tsundzuka xivono lexi xo tsakisa xa vanhu lava pfuxiwaka ni ku tlhela va hlanganisiwa ni varhandziwa va vona? Ndzi ku siye ni xivutiso xa leswaku xana leswi swi ta humelela kwihi, etilweni kumbe emisaveni. Kumbexana u kume nhlamulo ya Bibele eka tluka 26 ra broxara leyi.” Bula hi tinhla-nkulu leti nga eka ndzimana ya vunharhu ku ya eka ya vuntlhanu, kutani u hlaya Yohane 5:21, 28, 29. Loko nkarhi wu pfumela, hlaya matsalwa wahi ni wahi lama saleke eka tluka rolero.
4 Xana u sungule dyondzo hi broxara leyi nge “Vonani, Ndzi Endla Swilo Hinkwaswo Swi Va Leswintshwa”!? Eka riendzo ro vuyela, u nga ha endla leswi:
◼ Tlhela u pfula tluka 30, kutani u tlakusa xivutiso lexi nge: “Xana Bibele yi hlawuleke hi tindlela tihi?” Pfula eka matluka 3 na 4, kutani u hlamusela tindzimana 1-4 kun’we ni xifaniso lexi nga exifunengetweni xa broxara. Hlaya tsalwa rin’we kumbe mambirhi lama kombisiweke eka nhlamuselo ya le hansi ya ndzimana 4. Hlamusela leswaku Bibele i buku yi ri yoxe leyi nyikelaka ntshembo wo tano lowu hlamarisaka. Endla malunghiselelo ya riendzo ra wena ra nkarhi lowu taka. Endzhaku ka riendzo ra vunharhu, loko swi languteka onge dyondzo yi ta sungula, u nga sungula ku vika dyondzo leyintshwa!
5 U nga ha sungula bulo hi ku tirhisa broxara leyi nge “Vito Ra Xikwembu Leri Nga Ta Tshama Hi Masiku” hi ndlela leyi:
◼ “Eku sunguleni, ndzi kote ku ku kombisa vito ra Xikwembu eBibeleni. Ku tiva ni ku tirhisa vito ra Yehovha i xiphemu xa nkoka xa vugandzeri bya hina.” Pfula eka tluka 31, kutani u hlamusela tinhla-nkulu eka tindzimana to hetelela ta mune, kutani u hlaya Yohane 17:3 na Mikiya 4:5. Hlamusela leswaku hi nyikela nongonoko wa dyondzo ya Bibele lowu nga ta komba ndlela leyi vito ra Xikwembu ri nga ta hlawulekisiwa ha yona hi ndlela leyi faneleke ni ndlela leyi hi nga ta tsakela mikateko ya misava ya paradeyisi ha yona.
6 Kutani, tsundzuka lava u vonaneke na vona. Phikelela u tlhelela, naswona u lunghiselela swin’wana leswi pfunaka leswi u nga ta va avela swona. U nga va un’wana loyi “a vekaka mihandzu hakunene” eku endleni vadyondzisiwa lavantshwa.—Mt. 13:23.