A Va Tshikanga Ku Nyikela Vumbhoni
1 Vito ra hina leri nge Timbhoni ta Yehovha, ra hi hlawulekisa ni ku hlamusela leswi hi nga swona. Hi nyikela vumbhoni hi vukulu bya Xikwembu xa hina, Yehovha. (Esa. 43:10, 12) Un’wana ni un’wana u fanele ku hlanganyela eku nyikeleni ka vumbhoni lebyi loko a ta va xirho xa vandlha. Ku nyikela vumbhoni swi endliwa ngopfu-ngopfu evutirhelini bya hina bya le rivaleni, lebyi katsaka ku famba hi yindlu na yindlu, ku endla ntirho wa le xitarateni, ku endla maendzo yo vuyela ni ku fambisa tidyondzo ta Bibele. Hinkwerhu ka hina hi khutaziwa leswaku hi hlanganyela hi xitalo.—1 Kor. 15:58.
2 Hambi swi ri tano, swirho swin’wana swa vandlha a swi swi koti ku hlanganyela hi xitalo. Vuvabyi lebyikulu kumbe ku lamala swi nga endla leswaku va nga swi koti. Maxaka lama kanetaka ma nga ha vanga swirhalanganya leswi nga papalatekiki. Muntshwa a nga ha siveriwa hi mutswari la nga pfumeriki. Vahuweleri lava tshamaka etindhawini leti nga ekule laha ku nga riki na swo famba va nga ha vona onge a swi koteki ku nyikela vumbhoni. Lava hi ntumbuluko va nga ni tingana va nga ha kanakana. Vahuweleri van’wana lava tikumaka va ri eswiyin’weni leswi kumbe leswi fanaka na swona va nga ha titwa onge a va faneleki ku va Vakreste hi ku va leswi va kotaka ku swi endla swi nga switsongo eka leswi van’wana va swi endlaka, naswona swi ri switsongo eka leswi va lavaka ku swi endla hakunene. Ku hava xivangelo xo va va langutela matshalatshala ya vona ehansi. (Gal. 6:4) Va nga kuma nchavelelo hi ku tiva leswaku Yehovha wa tsaka hi ku tikarhata ka vona eka xiyimo xihi na xihi lexi va tikumaka va ri eka xona.—Lk. 21:1-4.
3 Ku Kuma Ndlela Yo Hlanganyela: Ku runguriwe magidi ya mintokoto leyi kombisaka ndlela leyi vanhu lava nga eswiyin’weni swo nonon’hwa va nga pfumelelangiki swihinga swi va sivela ku vula vumbhoni. Hi ku teka goza, va kume tindlela to hambana-hambana ta ku nyikela vumbhoni hi xitshuketa. Lava bohekaka ku tshama ekaya va tirhise riqingho ku pfula ndlela yo nyikela vumbhoni. Muendzi un’wana ni un’wana u tekiwa tanihi muyingiseri lonene. Hambi loko wansati la nga ni ndyangu lowu kanetaka a nga ha tsandzekaka ku nyikela vumbhoni ekaya, a nga ha tirhisa nkarhi lowu a wu kumaka ku vulavula ni vaakelani kumbe van’wana lava a hlanganaka na vona siku na siku.
4 Muntshwa a nga ha siveriwa ku hlanganyela eku nyikeleni ka hina vumbhoni bya le rivaleni hi mutswari la nga pfumeriki. Ematshan’wini yo languta sweswo tanihi xihinga lexi nga ololoxekiki, a nga ha tirhisa vadyondzi-kulobye ni mathicara tanihi “nsimu” yakwe, a nyikela vumbhoni lebyinene kumbexana ni ku fambisa tidyondzo ta Bibele. Vahuweleri vo tala lava tshamaka etindhawini leti nga toxe va kote ku nyikela vumbhoni hi ku tsala mapapila. Lava susumetiwaka hi ku hiseka ka Vukreste nkarhi hinkwawo va ta kuma ndlela yo papalata ku “phyam[a] kumbe ku pfumala mihandzu, [malunghana ni vutivi lebyi] hetisekeke [bya] Hosi ya hina Yesu Kriste.”—2 Pet. 1:8.
5 Malunghana ni ku hlanganyela ka hina entirhweni wo nyikela vumbhoni, Yehovha u hi vekele mpimanyeto wun’we ntsena hinkwerhu, ku nga leswaku hi fanele ku wu endla “hi mbilu hinkwayo.” (Kol. 3:23) Hambi leswi nkarhi lowu hi wu hetaka ni leswi hi swi hetisisaka evutirhelini swi hambanaka, nsusumeto wa swona lowukulu wa fana—rirhandzu ra xiviri leri humaka ‘embilwini leyi heleleke.’ (1 Tikr. 28:9; 1 Kor. 16:14) Loko hi tirha hi matimba, a hi nge vi na xivangelo xo titwa onge hi pfumala ripfumelo kumbe hi titwa onge hi swirho leswi nga pfuniki nchumu swa vandlha hikwalaho ka leswi mpimo lowu hi kotaka ku wu endla wu nga wutsongo. Ku fana na Pawulo, hi nga vula hi ku tshembeka leswaku ‘a hi tshikanga ku vula timhaka leti pfunaka kumbe ku ti dyondzisa erivaleni.’—Mint. 20:20.