Ku Kombisa Ku Tlangela Swikombiso Swimbirhi Leswikulu Swa Rirhandzu
“Hina hi ni rirhandzu hikuva ku rhangile Xikwembu xi hi rhandza.”—1 YOHANE 4:19.
1. I xikombiso xihi lexi Yesu a hi vekeleke xona?
XANA hi nga komba ku tlangela ka hina ka rirhandzu lerikulu leri Yehova Xikwembu na Yesu Kriste va ri kombiseke eka hina ku antswa hi ndlela yihi? Ndlela leyikulu i ku entisa Yesu, loyi handle ko karhala a vekeke vumbhoni eka vito ra Tata wakwe ni Mfumo. (1 Petro 2:21) U endle tano emakaya, emasinagogeni, etempeleni, etintshaveni ni le ribuweni ra lwandle. A hi xiyeni tindlela ta kaye ta nkoka leti ti nga hi pfulekelaka.
Ntirho Wa Yindlu Na Yindlu
2. U nga tiyiserisa ku yini entirhweni wa yindlu na yindlu?
2 Xo sungula, naswona kumbexana ndlela ya nkoka ngopfu, leyi hi nga kombaka rirhandzu ra hina ni ku tlangela ha yona i ku famba hi yindlu na yindlu hi mahungu lamanene ya Mfumo wa Xikwembu. Ku endla tano swi lava ku ntshunxeka ka ntiyiso ka ku vulavula hikuva ku hambeta ku katsa ku kwetlembetana loku kongomeke ni van’wana, lava vo tala va vona va nga ta hi languta tanihi lava karhataka. Swi lava rirhandzu ra xiviri eka Xikwembu ni le ka muakelani ku hambeta hi famba hi yindlu na yindlu, hambi leswi hi nga ha hlanganaka ni ku hambana, ku siringeka, ku hlekuriwa kumbe ku kaneta loku kongomeke.—Ringanisa Ezekiel 3:7-9.
3. I xisekelo xihi xa Matsalwa lexi u nga na xona xa ntirho wa yindlu na yindlu?
3 Rhekhodo ya Evangeli ya swiletelo swa Yesu eka vaapostola vakwe va 12, naswona endzhaku eka vavuri va rito va 70, yi komba kahle leswaku a va fanele ku famba hi yindlu na yindlu va chumayela mahungu lamanene ya Mfumo wa Xikwembu. (Matewu 10:5-14; Luka 10:1-7) Eka Mintirho 20:20 Pawulo u hi byela hi ku famba kakwe hi yindlu na yindlu. Marito wolawo ya tirhisiwile eku endleni kakwe maendzo ya vurisi, kambe ndzimana 21 a yi siyi ku kanakana malunghana ni ntirho lowu a a wu vula, hikuva Pawulo wa engetela: “Ndzi tsundzuxile swinene Vayuda ni Vagriki”—hayi vamakwavo va xinuna ni va xisati va Vukriste—“ku hundzukela eka Xikwembu ni ku pfumela eka Hosi ya hina Yesu.” Loko a endla maendzo ya vurisi, nkulu hakanyingi a nga khutazi ‘ku hundzukela eka Xikwembu ni ku va ni ripfumelo eka Yesu.’ Ku ri na sweswo, u khutaza Vakriste-kulobye ku va ni ku tlangela loku engetelekeke ka minhlangano kumbe vutirheli, kumbe u va pfuna hi swiphiqo swa munhu hi xiyexe.
4. I yini lexi hi khutazaka ku hlanganyela eku chumayeleni hi yindlu na yindlu?
4 A ku na xisekelo lexi twalaka xa Matsalwa ntsena xa ku famba ka hina hi yindlu na yindlu kambe mihandzu ya ntirho wolowo yi komba leswaku nkateko wa Yehova wu le henhla ka wona. Ina, “vutlhari bya Xikwembu byi tikomba byi ri lebyo lulama hi mintirho ya byona.” (Matewu 11:19) Hakanyingi, lava fambaka hi yindlu na yindlu va vone vumbhoni bya nkongomiso wa tintsumi lowu va kongomiseke eka lava va nga ni ndlala ni torha ra leswo lulama. N’wini wa muti u vule leswaku a a khongelela mpfuno ni leswaku pfhumba ra Mbhoni ri hlamule xikhongelo xexo.
5. I xipfuneto xihi lexinene lexi hi nga na xona xa vutirheli bya hina bya yindlu na yindlu, naswona i tindlela tihi to hambana-hambana leti xi nga hi pfunaka ha tona?
5 Mawaku mpfuno lowukulu swonghasi wa ntirho wa nsimu lowu hi nga na wona eka buku leyi nge Reasoning From the Scriptures! Yi na masungulo yo tala lama tsakisaka ya mimbulavurisano ya Bibele kun’we ni vuxokoxoko lebyi tirhaka eka timhaka to tala ta Matsalwa kumbe vukhongeri. Kutani u nga yi rhwali kunene ntsena kambe kombetela eka yona. Hakanyingi maphayona ya phofule ku tlangela lokukulu ka xipfuneto lexi xa nkoka xa ntirho wa nsimu. Xana u nga komba ku tlangela ka wena ka rirhandzu ra Xikwembu hi ku tirhisa buku leyi hi xitalo na hi laha ku humelelaka?
6. Hi yimela ku kuma ku vuyeriwa kwihi ka munhu hi xiyexe hi ku famba hi yindlu na yindlu ni mahungu ya Mfumo?
6 A hi fanelanga ku honisa mhaka ya leswaku hina hi hexe hi yimele ku vuyeriwa swinene hi ku hlanganyela evutirhelini bya yindlu na yindlu. Loko hina Vakriste hi endla hi ripfumelo ra hina, ri va leri tiyeke ngopfu; loko hi vulavula hi ku tiyiseka, ra tiyisiwa. Hi nga ka hi nga byeli van’wana hi ntshembo wa hina loko ntshembo wa hina vini wu nga vangami. Ku hava nchumu lowu fanaka ni ku hlanganyela nkarhi na nkarhi evutirhelini bya yindlu na yindlu leswaku hi hlakulela mihandzu ya moya leyi hlamuseriweke eka Vagalatiya 5:22, 23. Hi ku olova yi fanele ku va hi ndlela yoleyo, hikuva Bibele ya hi tshembisa: “Munhu la hananaka u ta kateka; loyi a phyuphyisaka van’wana u ta phyuphyisiwa na yena.”—Swivuriso 11:25, New International Version.
Ku Endla Maendzo Yo Vuyela
7, 8. I swivangelo swihi leswi twalaka ni leswi tirhaka sweswi hi faneleke ku endla maendzo yo vuyela ha swona?
7 Ndlela ya vumbirhi eka hina yo amukela rirhandzu leri Xikwembu na Kriste va ri kombiseke eka hina i ku endla maendzo yo vuyela eka vanhu lava enkarhini lowu hundzeke va kombiseke ku tsakela mahungu ya Mfumo. Pawulo na Barnaba a va khumbeka hi lava va va chumayeleke. (Mintirho 15:36) Kahle-kahle, ku pfumelelana ku lava leswaku hi endla maendzo yo vuyela. Loko hi veka vumbhoni hi yindlu na yindlu, hi xitshuketa, kumbe eswitarateni, hi lava lava nga “swisiwana emoyeni.” (Matewu 5:3) Kahle-kahle, kavula, ku va nyika nghilazi yin’we ya mati ya moya kumbe xiphemu xin’we xa xinkwa xa moya a swi anelanga. Eka vona ku kuma ndlela yo ya evuton’wini, va lava mpfuno lowukulu.
8 Matshalatshala ya hina yo sungula ya nga ha fanisiwa ni ku byala timbewu ta ntiyiso. Kambe tanihi laha muapostola Pawulo a kombeke ha kona eka 1 Vakorinto 3:6, 7, ku laveka swo tala. A swi nga anelanga leswi a byaleke. Timbewu nakambe a ti lava mati, tanihi lawa Apolosi a cheleteke ha wona. Kutani a ku ta rindzeriwa leswaku Xikwembu xi endla leswaku ti mila. Xiendlakalo lexi xa ntirho xa honisiwa hi van’wana, kambe vo tala va xi languta ku ri xiendlakalo lexi hakunene xi olovaka xa vutirheli bya Vukriste. Ha yini? Hikuva vanhu lava hi vuyelaka eka vona ana se va kombise ku tsakela ko karhi.
Ku Fambisa Tidyondyo Ta Bibele Ta Le Makaya
9. Hikwalaho ka yini ku fambisa dyondzo ya Bibele ya le kaya ku fanele ku va pakani ya wena?
9 Loko maendzo yo vuyela ya endliwa nkarhi na nkarhi eka vanhu lava va kombiseke ku tsakela mahungu ya Mfumo, vuyelo hakanyingi i dyondzo ya Bibele ya le kaya—ku nga ndlela ya vunharhu leyi hi nga kombaka ku tlangela ka hina ha yona. Hakunene ku nga va xiendlakalo lexi tsakisaka swinene ni lexi hakelaka xa vutirheli bya hina. Hikwalaho ka yini? Kutani, i ntsako muni wonghasi ku vona vanhu va kula hi vutivi ni ku tlangela mintiyiso ya Bibele, ku va vona va endla ku hundzuka evuton’wini bya vona, ni ku va pfuna ku kondza va tinyiketela ku endla ku rhandza ka Xikwembu ivi va khuvuriwa! Vanhu vo tano hakunene va nga langutiwa tanihi vana va hina va moya naswona hina tanihi vatswari va vona va moya.—Ringanisa 1 Vakorinto 4:14, 15; 1 Petro 5:13.
10. I xikombiso xihi xo fanekisela xi kombaka nkoka wa ku fambisa tidyondzo ta Bibele ta le makaya?
10 Xiya xikombiso xo fanekisela. Murhumiwa loyi a a famba hi yindlu na yindlu exihlaleni xa Caribbean u hlangane ni mpatswa wa mahipi lowu kaya ra wona a ri nga ri nchumu kambe ri basile ni ku hleleka. Kambe va kombisile ku tsakela. Xipfuneto xo dyondza Bibele xi fambisiwile, naswona dyondzo ya Bibele ya le kaya yi sunguriwile ni mpatswa wa kona, lowu a wu nga tekananga hambi leswi a wu ri ni vana vo hlayanyana. Loko dyondzo yi ri karhi yi ya emahlweni, kaya ri sungule ku va leri langutekaka kutani na wona mpatswa ni vana va wona wu ve tano. Ku nga ri kungani mpatswa wu kombele murhumiwa ku va tekanisa, a va pfulela ndlela ya leswaku va khuvuriwa. Manuku siku rin’wana makwerhu lontshwa hi ku tsaka u humese layisense yakwe yo chayela movha, leyi a yi kumeke ro sungula. Ina, loko a nga si va un’wana wa Timbhoni ta Yehova, a a nga xi voni xilaveko xo kuma layisense ya vukati kumbe layisense yo chayela, kambe se a a yingisa milawu ya Xikwembu ni liya ya khezari.
Ku Veka Vumbhoni eXitarateni
11, 12. (a) Hi na xikhutazo xihi xa Matsalwa xo hlanganyela eku vekeni ka vumbhoni bya le xitarateni? (b) I swivangelo swihi swi nga kwalaho swa ku endla ka hina tano?
11 Ndlela ya vumune leyi hi nga kombaka ha yona ku tlangela ka hina ka leswi Xikwembu na Kriste va hi endleleke swona i ku veka vumbhoni exitarateni. Loko hi va ni xiphemu, hi pfuneta ku hetisisa Swivuriso 1:20, 21 hi ndlela yin’wana ya xiviri: “V̌utlhari byi huwelela e handle, byi tlakusa rito e miṭenḍeleni, Byi huwelela e mindyangwini ya pongo. E nyangweni ya muti, byi ḍunisa timhaka.”
12 Ku na swivangelo swo tala leswinene eka hina swo hlanganyela nkarhi na nkarhi eka xiendlakalo lexi xa ku chumayela hi Mfumo. Etindhawini to tala, swi ya swi nonon’hwa swinene ku kuma vanhu ekaya. Va hlanganyela eka xivumbeko xin’wana xo titsakisa, ku xava kumbe ku tirha. Nakambe, vanhu vo tala va tshama eka miako leyi hlanganeke kumbe tindlu leti avanyisiweke, ku nga ha vuriwi lava tshamaka etihostele. Kambe hakanyingi ku ni vanhu lava voniwaka eswitarateni.
13. Ku veka vumbhoni exitarateni ku nga va ni mimbuyelo yihi? Kombisa.
13 Nkulu wa le United States sweswinyana a a fambisa mune wa tidyondzo ta Bibele ta le makaya ni vanhu lava ro sungula a hlanganeke na vona entirhweni wo veka vumbhoni exitarateni. Kavula, a nga miyeli (hambi leswi ematikweni man’wana sweswo ku nga leswi nawu wu swi pfumelaka). Ku ri na sweswo, hi ku n’wayitela ka xinghana ni rito leri tsakeke, u tshinelela vanhu lava va yimeke, a rindzela bazi, kumbe a famba nkarhi wo leha hi ku ntshunxeka. ‘Ku vulavula ka yena hi lokunene, ku ‘lungiwile hi munyu,’ naswona u tirhisa vutlhari bya hi laha a nga tshinelelaka munhu un’wana ni un’wana ha kona. (Vakolosa 4:5, 6; 1 Petro 3:15) A nga kumanga tidyondzo ta Bibele ta le makaya hi ku veka ko tano ka vumbhoni bya le xitarateni ntsena kambe u tlhele a humelela swinene eku fambiseni ka tibuku ni vo tala. Ina, hi ku va la ambaleke kahle ni ku va ni ku n’wayitela ka xinghana kun’we ni ku vulavula loku ntshunxekeke, u nga va loyi a humelelaka swinene eku vekeni ka vumbhoni bya le xitarateni. Kahle-kahle, Timbhoni ta ntlhanu sweswinyana ti fambisile tikopi to tlula 30 ta buku leyi nge Life—How Did It Get Here? By Evolution or by Creation? etindhawini ta vanhu ta mavhengele. Tibuku to tala ti kumiwile hi vanhu lava tshameke emimovheni ya vona.
Vumbhoni Bya Xitshuketa
14. Nkoka wa ku veka vumbhoni hi xitshuketa wu vonaka hi ndlela yihi?
14 Ndlela ya vuntlhanu eka hina yo komba ku tlangela rirhandzu lerikulu leri Xikwembu na Kriste va ri kombiseke eka hina i ku veka vumbhoni hi xitshuketa. Leswi hakanyingi swi ve leswi humelelaka swonghasi, eku kumeni ka vanhu lava nga ni ndlala ni torha ra leswo lulama ni ku fambisa tibuku! Hakunene i ndlela yin’wana leyi hi nga hlayisaka xitsundzuxo lexi kumekaka eka Vaefesa 5:15, 16, ‘ku londzovota nkarhi lowu hi nga na wona.’ Murhumiwa u sungule ku vulavurisana ni mukhandziyi-kulobye ethekisini. Wanuna u kombe ku tsakela. Maendzo yo vuyela ya endliwile naswona dyondzo ya Bibele yi sunguriwile. Namuntlha wanuna yoloye i nkulu wa Mukriste. Kun’wana nkulu u sungule bulo ni wansati loyi, handle ko kanakana, a a cinca vukhongeri byakwe leswaku a tekana ni Muyuda. U lave ku tiva leswaku i mani a teke ku sungula, Muxe, Nowa, Davhida ni van’wana. U n’wi byele leswaku leswi a a swi lava a ku ri buku leyi nge Timhaka ta Bibele, leyi hlamuselaka swiendlakalo swa Bibele hi ku landzelelana ka ntivo swa khale. Hambi leswi a a ri mupfhumba la hetisekeke eka yena, hi ku hatlisa u n’wi nyike vito ra yena ni adirese ni munyikelo lowu fanelaka leswaku a ta n’wi rhumela buku.
15. I yini lexi nga ta hi pfuna ku phaphamela minkarhi yo veka vumbhoni hi xitshuketa?
15 Minkarhi yin’wana, hi ku chava leswaku hi nga ha hlekuriwa, hi nga ha kanakana ku sungula bulo ni un’wana loyi hi fambaka na yena. Hambi swi ri tano, hakanyingi hi hakeriwa hi laha ku fuweke loko hi tinyika xivindzi xo endla tano! Ku tlangela vunene bya Xikwembu ni xilaveko xa vanhu swi ta hi pfuna ku va ni xivindzi lexi lavekaka. Ina, tsundzuka leswaku “Xikwembu a xi hi nyikanga moya wa vutoya, kambe xi hi nyikile moya wa matimba, ni wa rirhandzu, ni wa ku tikhoma.”—2 Timotiya 1:7.
Ku Amukela Vapfhumba
16. Ha yini hi fanele ku phaphamela ku xiya vapfhumba lava vhakelaka Holo ya hina ya Mfumo?
16 Ndlela ya vutsevu leyi hi nga kombaka ku tlangela ka hina eka Xikwembu na Kriste ha yona i ku amukela vapfhumba lava hi va vonaka eHolweni ya hina ya Mfumo. Rirhandzu ra muakelani ri fanele ku hi phaphamisela ku vona mupfhumba wihi na wihi loyi a vhakelaka ndhawu ya hina yo gandzela. A hi lweleni ku n’wi endla a titwa a vevukeriwa, a titwa leswaku u le xikarhi ka vanghana lava tsakelaka vumoya bya yena swinene. Kahle-kahle, leswi tlulaka ku navela ku tiva loku nga pfuniki nchumu swi n’wi tise kwalaho. A nga ha va hakunene a ri ni ndlala ni torha ra leswo lulama. Ku n’wi khathalela ka hina ka xiviri ku nga ha hetelela hi ku sungula ka hina dyondzo ya Bibele ya le kaya, hi n’wi pfuna endleleni ya vutomi. (Matewu 5:3, 6; 7:13, 14) Entiyisweni, wona nchumu lowu wu humelerile ko tala. Murhumiwa la humaka eka ntlawa wo sungula wa Xikolo xa Bibele xa Watchtower xa Gilead u xiye leswaku swichudeni swakwe swimbirhi swa Bibele leswi tshembisaka a ku ri leswi a hlanganeke na swona ro sungula eHolweni ya Mfumo.
Ku Veka Vumbhoni Hi Ku Tsala Mapapila
17. Ku veka vumbhoni hi ku tsala mapapila ku nga va ni mimbuyelo yihi?
17 Ndlela ya vunkombo eka hina yo veka vumbhoni, eku amukeleni ka rirhandzu leri Xikwembu na Kriste va hi kombeke rona, i ku tsala mapapila. Hakanyingi, lava va tirhisaka xivumbeko lexi xo veka vumbhoni va kuma mapapila man’wana lama tlangelaka swinene ya va hlamula. Leri i endlelo leri tirhisiweke hi vatirheli van’wana va nkarhi hinkwawo lava swa xinkarhana va nga ha vaka va nga swi koti ku famba hi yindlu na yindlu hikwalaho ka vulema bya miri. Hi xikombiso: A ku ri na ndyangu lowu nga ni vana va 12. Siku rin’wana tatana u vuye ekaya a kuma leswaku ntlhanu wa vona a va duvuriwile va fa hi xin’wana xa swigangu swa n’wana wakwe wanhwana. A swi n’wi pfunanga nchumu ku langutela ku chaveleriwa eka vafundhisi va Vujagana. Kutani siku rin’wana u amukele papila leri humaka eka mupfhumba, Mbhoni leyi hlayeke hi ta khombo rakwe ephepheni ni leyi a yi lava ku n’wi chavelela, a yi nghenisile buku ya Ntiyiso. Leswi hi leswi wanuna wa kona a a swi lava. Namuntlha, na yena, i Mbhoni leyi chivirikaka.a
Ku Ba Riqingho
18, 19. I ndlela yihi yin’wana yo chumayela mahungu lamanene leyi van’wana va yi kumeke yi humelela, naswona ha yini?
18 Ku hlamusela ndlela ya vunhungu yo veka vumbhoni, ku na nkarhi wo tirhisa riqingho eku chumayeleni ka mahungu lamanene ya Mfumo. Leswi hi laha ku andzaka swi tikomba ku ri xivumbeko lexinene ni lexi humelelaka xo veka vumbhoni. Timbhoni to tala ti va ni vutshila eka xiendlakalo lexi xa vutirheli, lexi ku nga ni swo tala swa ku xi bumabumela. Ha xona hi fikelela vanhu van’wana lava hi nga swi kotiki ku hlangana na vona entirhweni wa yindlu na yindlu. Loko ku veka vumbhoni hi riqingho ku endliwile hi vutlhari, hi vunene, hi vuxiyaxiya ni vutshila, van’wana va kume ku amukeriwa loku antswaka ku tlula ku tlhelela eka vanhu vo tano emakaya ya vona.
19 Bandlha ra Majapani etikweni leri vulavulaka Xinghezi ri tirhisa buku ya riqingho tanihi xiphemu xa nsimu ya rona. Vahuweleri va bela mavito ya Majapani riqingho ivi va lunghiselela ku endla riendzo ra munhu hi xiyexe laha va kumaka ku tsakela. Hi xiviri va sungurile tidyondzo to tala hi endlelo leri.
Ku Veka Vumbhoni Hi Mahanyelo Lamanene
20, 21. Mahanyelo ya hina ma nga va ni vuyelo byihi lebyinene? Kombisa.
20 Ndlela ya vukaye leyi ha yona hi nga tisaka ku dzunisa eka Xikwembu i mahanyelo ya hina lamanene. Mutsari wa tinyuziphepha wa Mu-Russia u tshama a hlamusela leswaku mahanyelo ya hina lamanene a ku ri dyondzo ya hina yo antswa. Kahle-kahle, nyuziphepha yi bumabumele mahanyelo lama tlakukeke ya Timbhoni ta Yehova hi ku phindha-phindha. Yin’wana yi vikile: “Timbhoni ta Yehova hi laha ku xiyekaka i vanhu vo tshembeka eFederal Riphabliki ra Jarimani.” Eku sunguleni ka kotara yakwe ya Xikolo, nhwanyana wa Mbhoni u tise broxara ya School eka mudyondzisi wakwe. Hi ku tikukumuxa u yi arile, a vula leswaku a nga lavi ku twa nchumu hi Timbhoni. Hambi swi ri tano, hi ku famba ka nkarhi mahanyelo yakwe lamanene ma n’wi kumele ku dzunisiwa loku tlakukeke ivi ya vanga ku hundzuka hinkwako ka langutelo ra [thicara] eka Timbhoni. Xa nkoka lowu fanaka i papila leri vatswari va Mbhoni va ri amukeleke ri huma eka mudyondzisi wa vana va vona va xikolo: “Mpimo lowu nga landzulekiki wa ku humelela ka ku pfumela ka n’wina i vana va n’wina.”
21 Lava va nga emisaveni va nga ka va nga vuli leswinene hi Timbhoni ta Yehova handle ko tisa ku xixima eka Xikwembu na Kriste. Yoleyo i ndlela leyi olovaka leyi swi faneleke ku va ha yona. Xana Yesu a nga vulanga leswaku hi fanele ku endla leswaku ku vonakala ka hina ku voninga leswaku vanhu va ta vona mintirho ya hina leyinene ivi va dzunisa Tata wa hina wa le matilweni? (Matewu 5:16) Hakunene, hi mahanyelo ya hina lamanene, hi nga sasekisa ntiyiso. (Tito 2:10) Hakunene, mhaka ya leswaku mahanyelo ya hina lamanene ya dzunisa Xikwembu na Kriste ni ku pfuna van’wana ku kuma ndlela leyi yaka evuton’wini i xivangelo lexi nga ni matimba xa ku khathalela ka hina loku enteke leswaku mahanyelo ya hina minkarhi hinkwayo ya nga soriwi.
22. Hi le ka yihi ya tindlela to kombisa ku tlangela leyi u nga ta tikarhatela yona, naswona ha yini?
22 Tanihi laha hi voneke ha kona, ku na tindlela to tala leti hi nga kombaka ku tlangela ka hina ka hinkwaswo leswi Yehova na Yesu Kriste va hi endleleke swona ha tona, ngopfu-ngopfu eka swikombiso swa vona leswikulu swa rirhandzu. Ku ya emahlweni, hi nga kombisa rirhandzu ra hina ra muakelani.—Marka 12:30, 31.
23. Hi le ka ndlela yihi yo hetelela leyi u nga kombaka ku tlangela eka Xikwembu na Yesu?
23 Eku heteleleni, a hi xiyeni leswaku hi nga kombisa ku tlangela ka hina ka swikombiso swimbirhi leswikulu swa rirhandzu hi ku tlangela Xilalelo xa Hosi. Evusikwini byakwe byo hetelela emisaveni tanihi munhu, Yesu u endle xitsundzuxo xa lembe na lembe lexi endliwaka hi xinkwa ni wayini, leswi yimelaka nyama yakwe ni ngati ya yena. U lerise leswaku nkhuvo lowu wu fanele ku endleriwa ku n’wi tsundzuka. (1 Vakorinto 11:23-26) Nan’waka Xilalelo xa Hosi xi wela eka Sonto, April 12, endzhaku ka ku pela ka dyambu. Emisaveni hinkwayo, Timbhoni ta Yehova ti ta va kun’we eku yingiseni ka xileriso xa Yesu. U nga kayeli!
[Nhlamuselo ya le hansi]
a Ku kuma vuxokoxoko, vona Awake!, October 22, 1986, matluka 12-16.
Swivutiso Swa Mpfuxeto
◻ Yesu u veke vumbhoni hi ndlela yihi naswona kwihi?
◻ I tindlela tihi leti hi nga entisaka Yesu ha tona eku kombiseni ka ku tlangela rirhandzu lerikulu ra Xikwembu?