Ku Chumayela Hi Yindlu Ni Yindlu
1. Hi xihi xivutiso lexi tlakukaka malunghana ni ntirho wo chumayela hi yindlu ni yindlu naswona ha yini?
1 “Lava va nga ni ntokoto eka tindlela to hambana-hambana to hangalasa Ntiyiso va ta pfumela leswaku tsima ro chumayela hi yindlu ni yindlu va tirhisa nxaxamelo wa tibuku ta MILLENNIAL DAWN, hi yona ndlela ya kahle ngopfu yo chumayela Ntiyiso manguva lawa.” Marito wolawo lama humaka enkandziyisweni wa Zion’s Watch Tower wa July 1, 1893, ma kandziyise nkoka wa ku chumayela hi yindlu ni yindlu. Timbhoni ta Yehovha emisaveni hinkwayo, ti tiveka hi ntirho wolowo. Leswi ematikweni man’wana swi yaka swi tika ku kuma vanhu emakaya, xana endlelo leri ra ha tirha ninamuntlha?
2. Hi wahi Matsalwa lawa ntirho wo chumayela hi yindlu ni yindlu wu sekeriweke eka wona?
2 Wu Huma eMatsalweni Naswona I Wa Nkoka: Ntirho wo chumayela hi yindlu ni yindlu wu sekeriwe eMatsalweni. Yesu u lerise vadyondzisiwa va 70 leswaku va famba ha vambirhi-mbirhi va endzela vanhu etindlwini ta vona. (Luka 10:5-7) Endzhakunyana ka rifu ra Yesu, Bibele yi vula leswi mayelana ni vadyondzisiwa vakwe, yi ri: “Siku ni siku etempeleni ni hi yindlu ni yindlu a va hambeta va nga rhuteli ku dyondzisa ni ku vula mahungu lamanene.” (Mint. 5:42) Nakambe muapostola Pawulo u dyondzise hi ku hiseka hi yindlu ni yindlu.—Mint. 20:20.
3. Hi swihi swilo swin’wana leswi nga hi pfunaka loko hi ri karhi hi chumayela hi yindlu ni yindlu?
3 Ntirho wo chumayela hi yindlu ni yindlu wa ha ri endlelo ra nkoka ro hangalasa mahungu lamanene namuntlha. Wu hi endla hi kota ku ‘lavisisa’ lava fanelekaka hi ndlela leyi hlelekeke. (Mat. 10:11) Hi ntolovelo vanhu va va va nga jahanga loko va ri ekaya. Ku bula na vona hi ku kongoma—u twa rito ra vona, u vona leswi va angurisaka xiswona ni ku xiyaxiya swilo leswi nga endzeni ka yindlu—swi hi pfuna ku tiva leswi va swi tsakelaka ni leswi va karhataka. Hakanyingi swi hi nyika nkarhi lowunene wo bula na vona nkarhi wo lehanyana.
4. Xana hi nga endla njhani leswaku ntirho wo chumayela hi yindlu ni yindlu wu va ni mihandzu?
4 Endla Ku Cinca Ko Karhi: Muapostola Pawulo a a swi navela ku cinca swo karhi eka yena n’wini “hikwalaho ka mahungu lamanene.” (1 Kor. 9:23) Kumbexana hi nga cinca xiyimiso xa hina leswaku hi chumayela loko vanhu vo tala va ri kona ekaya, tanihi nindzhenga, hi mahelo-vhiki kumbe hi tiholideyi. Tsala tinomboro ta tindlu leti u nga kumangiki munhu eka tona kutani u tlhelela eka tona siku rin’wana kumbe hi nkarhi wun’wana.
5. Xana lava va nga ni swiphiqo swa rihanyo va nga katsiwa njhani entirhweni wa yindlu ni yindlu?
5 Hambi ku ri lava nga ni swiphiqo swa rihanyo va nga ha swi kota ku hlanganyela eku chumayeleni hi yindlu ni yindlu. Kumbexana hi nga endla matshalatshala yo famba ni vahuweleri volavo emakaya lawa va nga kotaka ku ma fikelela hi ku olova, lawa va nga ta kota ku chumayela va nga jahanga eka wona. Makwerhu un’wana wa xisati la nga ni phika u kota ntsena ku chumayela yindlu yin’we endzhaku ka hafu ya awara yin’wana ni yin’wana. Kambe wa tsaka naswona wa eneriseka endzhaku ka loko a hlanganyele ni ntlawa wa vamakwerhu entirhweni wo chumayela!
6. Ha yini hi fanele hi hlanganyela nkarhi hinkwawo eka lunghiselelo ro chumayela hi yindlu ni yindlu?
6 Vanhu vo tala lava fanaka ni tinyimpfu va hambeta va kumeka entirhweni wa yindlu ni yindlu. Muhuweleri un’wana loko a gongondza emutini wun’wana u twe rito ri ku: “Nghenani. Ndza swi tiva leswaku mi va mani. A ndzi ri karhi ndzi khongela eka Xikwembu leswaku xi rhumela munhu a ta ndzi pfuna, hiloko ndzi twa ku gongondziwa erivantini. Xikwembu xi xi twile xikhongelo xa mina hiloko xi rhumela n’wina.” Vuyelo bya kona byi nyika vumbhoni bya leswaku Yehovha wa yi katekisa ndlela leyi yo chumayela. (Mat. 11:19) Tiyimiseleni ku hlanganyela nkarhi hinkwawo eka lunghiselelo ro chumayela hi yindlu ni yindlu.