Ku Nghena Yindlu Na Yindlu Handle Ko Karhala
1 EIsrayele wa khale, magandzelo a ma nyikeriwa siku na siku. (Eks. 29:38-42) Ndzilo wa le altarini a wu tshama wu pfurha; musi lowu a wu tlhandlukela ehenhla a wu ri ‘nun’hwelo wo nandziha’ lowu tsakisaka Yehovha. (Eks. 29:18) Namuntlha, hi khongoteriwa leswaku hi ‘humesela Xikwembu magandzelo ya ku dzunisa, hi leswaku, mihandzu ya milomu ya hina leyi twarisaka vito ra xona erivaleni.’ (Hev. 13:15) Ematshan’weni yo tirhisa magandzelo lawa a ma lerisiwe hi Nawu, hi gandzela Yehovha hi ku vula swidzuniso swakwe hi vuenti handle ko karhala.—Esa. 43:21; Mint. 5:42.
2 Yesu Kreste, Mbhoni leyikulu ngopfu leyi tshameke yi hanya emisaveni leyi, u hi dyondzise ndlela yo nyikela vugandzeri lebyi tengeke hi ku nyikela magandzelo ya ku dzunisa. U byele vadyondzisiwa vakwe leswaku a ku ri ni xilaveko xa xihatla eka rungula leri a va ri chumayela. A a swi tiva leswaku ndlela leyi humelelaka yo fikelela vanhu hi mahungu lamanene a ku ri ku ya eka vona hi xiviri emakaya ya vona. (Mt. 10:7, 12) Kutani hi kuma leswaku vaapostola va landzelele nkongomiso wakwe lowu huhuteriweke hi Xikwembu wo chumayela hi yindlu na yindlu.—Mint. 20:20.
3 Ni namuntlha swa ha ri tano. Tanihi vadyondzisiwa va Yesu, Vakreste va ntiyiso va landzela xikombiso xakwe hi ku chumayela mahungu lamanene hi yindlu na yindlu. Hambi leswi hi nga ha soriwaka ni ku xanisiwa hikwalaho ka wona, kambe timiliyoni ti dyondze ntiyiso naswona magidi ya vadyondzisiwa lavantshwa ma joyina mintlawa ya ntshungu lowukulu lembe na lembe, leswi nyikaka vumbhoni bya leswaku i ndlela leyi Yehovha a yi tirhisaka ku hetisisa ku rhandza kakwe. Hi swona leswi endlaka leswaku hi tirha hi matimba evutirhelini bya hina.
4 Mpfuno Wo Chumayela Hi Yindlu Ni Yindlu: “Xikwembu a xi yi hi nghohe . . . Loyi a xi chavaka a vuya a endla leswi lulameke, xa n’wi tsakela.” (Mint. 10:34, 35) Ku ya endlwini yin’wana ni yin’wana leyi nga le nsin’wini ya hina hi ku kongoma swi kombisa leswaku a hi yi hi nghohe, hi nyika un’wana ni un’wana nkarhi wa leswaku a twa marungula ya Mfumo nkarhi hinkwawo. Hi nkarhi lowu fanaka lava va hi amukelaka va kuma mpfuno wa munhu hi xiyexe hi ku ya hi swilaveko swa vona vini.
5 Vahuweleri hinkwavo, ku katsa ni lavatsongo, lavakulu ni lava va ha riki vantshwa, va nga ha hlanganyela entirhweni wa yindlu na yindlu. Hi ndlela leyi un’wana ni un’wana a nga ha “vula hi nomo, kutani sweswo swi n’wi endla a va la ponisiwaka.” (Rhom. 10:10) Ku hlanganyela ni van’wana evutirhelini bya yindlu na yindlu swi hi hlanganisa exibohweni xa rirhandzu ni vun’we. Hi nkarhi lowu fanaka, hi nyikiwa nkarhi wa ku kombisa ku tiyisela ka hina loko hi langutana ni ku honisiwa kumbe nkaneto. Ku kombisa ripfumelo erivaleni hi ndlela leyi swi hi endla hi ‘hundzuka xihlamariso,’ leswi pfunaka vanhu va timbilu letinene ku xiya leswaku hi ni lunghiselelo leri hlelekeke ra ku dyondzisa Bibele ni leswaku va nga pfuneka eka rona. (1 Kor. 4:9) Hinkwaswo swi kombisa kahle leswaku Yehovha u katekisa ntirho wa yindlu na yindlu ni leswaku u tirhisa wona ku hlengeletela ntshungu lowukulu “e ndlwini” yakwe ya vukhongeri lebyi tengeke.—Esa. 2:2-4.
6 Sweswi, ku tlula hambi ku ri rini ematin’wini, vanhu va lava ku twa rungula ra Mfumo. A hi hambeteni hi chumayela hi yindlu na yindlu handle ko karhala ku kondza Yehovha a ku swi ringene. (Esa. 6:11) Loko hi endla tano, hi ta hakeriwa hi ntsako lowu hi wu kumaka hi ku hlanganyela evutirhelini bya nkoka ni lebyi pfunaka bya yindlu na yindlu enkarhini lowu wa makumu.—1 Kor. 15:58.