Mikateko Leyi Tisiwaka Hi Ku Tlangela Rirhandzu Ra Yehovha—Xiyenge 2
1 Loko nkulumo leyi fanaka ni leyi yi nyikeriwa en’hwetini leyi hundzeke, ku kandziyisiwe tindlela ta mune leti ha tona ku nga kombisiwaka ku tlangela rirhandzu ra Yehovha evutirhelini. (1 Yoh. 4:9-11) Eka xihloko lexi, ku ta engeteriwa tindlela tin’wana ta ntlhanu. Loko hi hlanganyela hi xitalo ku pfuna van’wana hi tlhelo ra moya, hi ta kuma mikateko.
2 Ku Chumayela Hi Xitshuketa: Leyi i ndlela leyi humelelaka yo kuma vanhu lava nga ni ndlala ni torha ra leswo lulama, kutani hi va siyela minkandziyiso leyi nga ta va pfuna. I swinene ku “tixavela nkarhi lowunene” ni ku chumayela minkarhi hinkwayo ni le ka un’wana ni un’wana loyi hi hlanganaka na yena. (Efe. 5:16) Swi nga ha lava leswaku hi va ni xivindzi leswaku hi chumayela hi ndlela leyi, kambe loko hi tlangela rirhandzu ra Xikwembu ni ku twisisa swilaveko swa vanhu, hi ta chumayela nkarhi wun’wana ni wun’wana lowu hi wu kumaka.—2 Tim. 1:7, 8.
3 Murhumiwa un’wana u vuyeriwe ngopfu hi ku sungula bulo ni munhu loyi a a khandziye na yena ethekisini. Munhu loyi u ri tsakerile bulo rero. Murhumiwa u n’wi endzele ko hlayanyana kutani a sungula ku n’wi dyondzela Bibele. Wanuna loyi u amukele ntiyiso kutani a endla nhluvuko ku fikela loko a va nkulu evandlheni!
4 Ku Tsala Mapapila: Swi nga ha endleka leswaku a hi swi koti ku ya chumayela hi yindlu ni yindlu hikwalaho ko vabya kumbe maxelo lama nga riki manene. Hi nga ha tsala mapapila, hi chumayela hi ku komisa eka vanhu lava hi va tivaka, eka lava feriweke hi varhandziwa va vona kumbe eka vanhu lava nga kumekiki emakaya loko hi ri ensin’wini. Hi nga ha hoxa xiphephana lexi nga enkarhini, lexi tameleke rungula leri tsakisaka, leri sekeriweke eBibeleni ni leri khutazaka loyi u n’wi tsalelaka leswaku a ri hlamula loko a ri ni swivutiso. Tirhisa adirese ya wena n’wini kumbe ya le Holweni ya Mfumo, hi kombela leswaku u nga tirhisi adirese ya rhavi.
5 Ku Chumayela Hi Riqingho: Leyi i ndlela leyinene yo burisana ni vanhu lava swi tikaka ku va kuma loko hi ri karhi hi chumayela hi yindlu ni yindlu. Loko hi yi tirhisa hi vutlhari, hi musa, hi vuxiyaxiya ni hi ndlela leyi faneleke, hi nga va ni vuyelo lebyinene. Vutirheli Bya Hina Bya Mfumo bya February 2001, matluka 5-6, byi ni swiringanyeto leswi pfunaka swa ndlela leyi hi nga humelelaka kahle ha yona.
6 Loko makwerhu un’wana wa xisati a ri karhi a chumayela wansati un’wana hi riqingho, u n’wi vutisile loko a kale a anakanyisisa hi leswi vumundzuku byi n’wi khomeleke swona ni ndyangu wakwe. Wansati loyi u vule leswaku u anakanyisisile. U kombise leswaku u tihambanise ni swirho swin’wana swa ndyangu hikwalaho ko va ni gome. Wansati loyi u pfumele ku hlangana ni makwerhu loyi wa xisati emakete ya le kusuhi, hileswi a n’wi kombiseke leswaku wa n’wi khathalela hakunene. Hikwalaho ka sweswo, wansati loyi u hatle a pfumela ku dyondzeriwa Bibele!
7 Ku Amukela Vanhu Lava Hi Nga Va Tiviki: Loko hi rhandza vaakelani va hina, hi ta hatla hi vona munhu un’wana ni un’wana la taka ro sungula eminhlanganweni ya hina naswona hi ta n’wi amukela hi mandla mambirhi. (Rhom. 15:7) N’wi endle a titwa a ri exikarhi ka vanhu lava khathalaka swinene hi vumoya bya yena. Rirhandzu ra hina ra xiviri ni ku lava ku n’wi dyondzela Bibele, swi ta n’wi susumeta leswaku a amukela mpfuno wa hina.
8 Mahanyelo Ya Hina Lamanene: Mahanyelo ya hina lamanene ma sasekisa ntiyiso. (Tito 2:10) Loko vanhu va misava va hi bumabumela hi leswi hi nga Timbhoni ta Yehovha, va dzunisa Xikwembu xa hina. (1 Pet. 2:12) Leswi naswona swi nga pfuna van’wana va vona ndlela leyi yisaka evuton’wini kutani va famba ha yona.
9 Ha yini u nga pfuxeti tindlela leti ta ntlhanu ta ku kombisa ku tlangela rirhandzu lerikulu, leri Yehovha a hi kombiseke rona kutani u hanya ha tona? (1 Yoh. 4:16) U ta vuyeriwa swinene hi ku endla tano.