Ku Tlhelela eXikolweni

¹ Hi January, vantshwa va hina va ta sungula ku dyondza eswikolweni leswintshwa. Ku ni swilo leswi tsakisaka leswi va swi languteleke, kambe ku ni swin’wana leswi nga endlaka leswaku va karhateka. Vantshwa va ta dyondzisiwa hi vadyondzisi lavantshwa, va ta nghenela tidyondzo letintshwa ni ku sungula ku hanya ni swichudeni leswi va nga swi tiviki. Vantshwa va swi lava ku khomisana ni valawuri va xikolo ni ku hanyisana ni swichudeni-kulobye, kambe va nga rivali leswaku va fanele ku tivonela eka xin’wana ni xin’wana lexi nga vekaka vumoya bya vona ekhombyeni.—1 Kor. 15:33.

² Vantshwa ni vana lava nga Timbhoni va tshama va xalamukile leswaku va nga thyakisiwi hi nkucetelo wa misava, lowu taleke eswikolweni ematikweni yo tala. Vakreste lavatsongo ni lavakulu va fanele ku va ni xivindzi xa ku ala milawu ni maanakanyelo ya misava, leswi khutaziwaka eka mahanyelo ya namuntlha, naswona va fanele ‘ku tshama va rindzile’ hi ku hlaya ni ku kongomisiwa hi Rito ra Yehovha. (Ps. 119:9) Vatswari lava khathalaka hi vana va vona va ta lava ku tiva leswi va dyondzisiwaka swona exikolweni, leswaku va ta va kongomisa hi ndlela leyi faneleke. Loko leswi dyondzisiwaka exikolweni kumbe kun’wana swi nga pfumelelani ni ku kwetsima ni ku tenga leswi languteriweke eka malandza ya Yehovha, swi fanele ku papalatiwa.—1 Pet. 1:15, 16.

³ Nakambe swi tolovelekile leswaku ku pfuka ku nga twisisani etimhakeni leti khumbaka minkhuvo ya vutiko, ku tlangeriwa ka masiku yo wisa, mintlango, tidyondzo ta vukhongeri kumbe swinkhubyana. Broxara leyi nge School and Jehovah’s Witnesses yi nga va mpfuno eka vantshwa lava nga Vakreste etimhakeni leti. Lava nga riki na yona, va nga yi kuma eka Watchtower Library CD-ROM. Ku engetela kwalaho, ku nga ha tirhisiwa broxara leyi nge Dyondzo, buku leyi nge Swivutiso Leswi Vantshwa Va Swi Vutisaka ni leyi nge Ku Hlamulana. Loko vatswari lava nga ni vana lavatsongo vo teka goza ro endzela vadyondzisi, va tamele kopi ya broxara leyi nge Dyondzo, va nga hlula kumbe va hunguta swiyimo swo nonon’hwa leswi pfukaka minkarhi yin’wana. Va nga byela mudyondzisi leswaku broxara leyi yi ta n’wi pfuna a ti twisisa ku antswa tidyondzo ni misinya ya hina ya milawu. Ku nyika mudyondzisi rungula leri swi ta pfuna ngopfu leswaku ku va ni ntirhisano.

⁴ Ku engetela kwalaho, swi ta va swinene leswaku swichudeni leswi nga Vakreste swi tshama swi ri ni tikopi ta buku leyi nge Swivutiso Leswi Vantshwa Va Swi Vutisaka ni broxara leyi nge Dyondzo, etibukwini ta swona ta xikolo. Minkarhi yin’wana ku pfuleka malunghelo ya ku nyikela vumbhoni eka swichudeni swin’wana leswi pfuxaka swivutiso loko ku vulavuriwa hi leswi hi swi kholwaka. Nakambe vana lava nga Timbhoni va fanele ku tshama va ri ni khadi leri tirhaka ra Advance Medical Directive/Release kumbe ra Identity Card, leri sayiniweke hi timbhoni ni hi n’wini wa rona. Lava nga ta tirhisa xitsundzuxo lexi va ta fana ni ‘munhu wo tlhariha la voneke khombo kutani a tumbela.’—Swiv. 22:3.