Vantshwa—Tirhisani Nkarhi Wa Ku Nghena Xikolo Hi Ndlela Leyinene
1 Xana u titwa njhani hi ku nghena xikolo? Xana wa swi hisekela leswaku u vuyeriwa hi ku nghena xikolo? Xana wa yi tirhisa minkarhi leyi u yi kumaka exikolweni leswaku u avelana ntiyiso ni lava u nghenaka na vona xikolo ni vadyondzisi va wena? Ha tiyiseka leswaku u lava ku endla leswi u nga swi kotaka exikolweni.
2 Vana Xichudeni Lexinene: Loko u tilunghiselele kahle loko u ya exikolweni naswona u nyikela nyingiso swinene, u ta kuma vuyelo lebyi nga heriki. Hisekela ku tsala swiavelo swa wena swa ntirho-kaya, kambe u nga pfumeleli ntirho wa wena wa xikolo wu ku sivela ku endla mintirho ya wena ya swa le tilweni.—Filp. 1:10.
3 Sungula lembe rin’wana ni rin’wana hi ku hlaya broxara leyi nge Timbhoni ta Yehovha ni Dyondzo. Kutani, wena ni vatswari va wena mi fanele mi nyika un’wana ni un’wana wa mathicara ya wena kopi ya yona. Va tiyisekiseni leswaku xivutiso xihi ni xihi lexi va nga ha vaka na xona xi ta hlamuriwa. Leswi swi ta va pfuna leswaku va yi twisisa ku antswa misinya ya wena ya milawu ni leswi u pfumelaka swona ni ku khomisana na wena loko u ri karhi u tirhisa leswi u dyondzisiweke swona. Swi ta tlhela swi tiyisekisa mathicara ya wena leswaku wena ni vatswari va wena mi navela ku tirhisana na vona loko va ri karhi va ku pfuna ku kuma dyondzo ya nkoka.
4 Vana Mbhoni Leyinene: Ha yini u nga languti xikolo tanihi nsimu ya wena yo nyikela vumbhoni bya xitshuketa? u ni minkarhi yo hlawuleka yo nyikela vumbhoni lembe hinkwaro exikolweni. U ni vutivi byo hlamarisa bya moya lebyi loko wo byi avela van’wana, byi nga “[ponisa] wena swin’we ni lava ku yingisaka.” (1 Tim. 4:16) Hi ku va ni mahanyelo lama nga xikombiso lexinene ya Vukreste naswona hi ku nyikela vumbhoni hi nkarhi wihi na wihi lowu faneleke, u ta tivuyerisa u vuyerisa ni van’wana.
5 Makwerhu un’wana loyi a ha riki muntshwa u nyikele vumbhoni bya xitshuketa eka swichudeni-kulobye exikolweni. Un’wana wa lava n’wi yingiseke a a ri Mukhatoliki, un’wana i munhu la nge Xikwembu a xi kona loyi a tolovele ku vungunya lava a va pfumela eka Xikwembu swin’we ni muntshwa loyi a a dzaha fole swinene naswona a a ri xindzendzele. Makwerhu loyi lontsongo u pfune 15 wa tintangha ta yena leswaku ti nyiketela vutomi bya tona ni ku khuvuriwa!
6 Kutani vantshwa, tinyiketeleni eku dyondzeni ni le ku tirheni ka nsimu ya n’wina leyi hlawulekeke. Kutani mi ta kuma vuyelo lebyikulu bya ku ya exikolweni.