Kuma Mpfuno Lowunene Exikolweni

¹ Tanihi leswi lembe ri yaka eku heleni, vantshwa va fanele va endla swiboho leswi katsaka mintirho-vutomi ya vona ya le xikolweni. Hambileswi ku nga ha vaka ni ntlhontlho ni ku vilela loku vangiwaka hi ku tlhelela exikolweni, nakambe ku ni mimbuyelo leyinene leyi vantshwa lava tikarhatelaka ku kuma mpfuno lowunene edyondzweni leyi va yi kumaka.

² Dyondzo leyinene yi nga hoxa xandla eka nhluvuko wa munhu hi tlhelo ra moya. Leswi munhu a swi endlaka evuntshweni bya yena swi ni nkoka lowukulu ehenhleni ka leswi a nga ta swi endla loko a ri munhu lonkulu. Hambi ku ri emhakeni ya xikolo, “xin’wana ni xin’wana lexi munhu a xi byalaka, ú ta tshovela xona.” (Gal. 6:7) Vantshwa lava tikarhataka etidyondzweni ta vona va nga kuma vutshila lebyi nga ta va endla va pfuna swinene eka Yehovha.

³ Ku anakanyisisa hi vukheta ka ha ri emahlweni swa laveka loko munhu a ta endla minhlawulo leyinene etidyondzweni ta le xikolweni. Vatswari va fanele va pfuna vana va vona leswaku va hlawula tidyondzo leti nyikelaka ndzetelo wa vutomi bya siku na siku leswaku va ta kota ku fikelela tipakani ta moya evuton’wini. Hi ku antswisa vutshila bya vona, vantshwa va ta kota ku tihanyisa entirhweni wa vuphayona. Dyondzo ya vona ya xisekelo yi ta va pfuna ku dzunisa Yehovha kun’wana ni kun’wana laha va n’wi tirhelaka va ri kona.

⁴ Vantshwa, ringetani ku kuma mpfuno lowunene emalembeni ya n’wina ya xikolo. Hi ku endla tano, mi ta va mi langutele ku hanya vutomi lebyi vuyerisaka entirhweni wo kwetsima, ematshan’weni yo landzela ntirho-vutomi wa misava. Tikarhateleni ku tirhisa vutomi bya n’wina eku endleni ku rhandza ka Yehovha. Hi ndlela yoleyo, mi ta endla leswaku ndlela ya n’wina yi humelela, eku dzuniseni ka Yehovha.—Ps. 1:3.