Dyondzo Ya Misava Ni Tipakani Ta Wena Ta Swa Moya
1 Ku kuma dyondzo leyinene ya xisekelo loko wa ha ri ntsongo, swi ta ku pfuna leswaku u kota ku hlaya ni ku tsala kahle naswona u ta va ni vutivi byo karhi hi dyondzo ya ntivo-misava, matimu, tinhlayo ni sayense. Hi ku famba ka nkarhi u ta dyondza ku anakanya kahle, ku kambisisa timhaka, ku lulamisa swiphiqo ni ku tisungulela tindlela leti nga ta ku pfuna. Dyondzo yo tano yi ta ku vuyerisa swinene evuton’wini bya wena hinkwabyo. Xana dyondzo ya wena ya misava yi nga hlangana njhani ni tipakani ta wena ta swa moya evuton’wini ni ku ku pfuna ku kuma “vutlhari lebyi pfunaka ni vuswikoti byo ehleketa”?—Swiv. 3:21, 22, NW.
2 Vana La Pfunaka Entirhweni Wa Xikwembu: Loko wa ha nghena xikolo, rhiya ndleve etlilasini u tlhela tikarhatela ku wu endla kahle ntirho-kaya wa wena wa xikolo. Loko wo kota ku hlaya kahle ni ku titoloveta ku dyondza, u ta kota ku kambisisa Rito ra Xikwembu hi ku olova naswona u ta tshama u hanyile hi tlhelo ra moya. (Mint. 17:11) Vutivi lebyi anameke byi ta ku pfuna ku twisisa vanhu va mindhavuko yo hambana-hambana, vanhu lava tsakelaka swilo leswi hambaneke ni leswi wena u swi tsakelaka ni lava nga ni tidyondzo leti hambaneke ni ta wena lava u hlanganaka na vona entirhweni wa nsimu. Dyondzo leyi u yi kumaka exikolweni yi ta ku pfuna leswaku u endla mintirho ya wena ya Vukreste enhlengeletanweni ya Xikwembu.—Ringanisa 2 Timotiya 2:21; 4:11.
3 Dyondza Ku Tihlayisa: Loko u tinyiketela, u nga ha dyondza ni vutshila lebyi lavekaka leswaku u kota ku endla ntirho wo tihanyisa loko u hete xikolo. (Ringanisa 1 Timotiya 5:8.) Hlawula tidyondzo ta wena hi vukheta. Ematshan’weni yo talela eka tidyondzo leti nga ni mintirho leyi ringaniseriweke, hlawula ku dyondzela ntirho kumbe vutshila lebyi nga ta ku pfuna ku kuma ntirho lowunene kun’wana ni kun’wana. (Swiv. 22:29) Dyondzo ya muxaka wolowo yi ta ku pfuna leswaku u tihlayisa loko u endla xiboho xo ya pfuna laha ku nga ni xilaveko lexikulu.—Ringanisa Mintirho 18:1-4.
4 Ku kuma dyondzo leyinene ya xisekelo loko wa ha ri exikolweni swi nga ku pfuna ku andzisa vutirheli bya wena. Tirha hi matimba leswaku u kuma vutshila lebyi lavekaka leswaku u tihlayisa loko u ri karhi u ya emahlweni entirhweni wa Yehovha. Xisweswo ku dyondza ka wena ku ta ku pfuna leswaku u fikelela tipakani ta wena ta moya.