Dyondzo—Yi Tirhisele Ku Dzunisa Yehovha
“Loyi a vulavulaka swo huma emiehleketweni ya yena, ú tilavela ku dzunisiwa, kasi la lavaka ku dzunisa loyi a n’wi rhumeke, ú tshembekile.”—YOHANE 7:18.
1. Xana fambiselo ra dyondzo ri sungule rini naswona njhani?
DYONDZO yi sungule enkarhini wa khale swinene. Fambiselo ra dyondzo ri sungule endzhakunyana ka loko Yehovha Xikwembu, Mudyondzisi ni Muleteri Lonkulu, a vumbe N’wana wakwe wa mativula. (Esaya 30:20; Vakolosa 1:15) Yena a a ta dyondzisiwa hi Mudyondzisi Lonkulu hi ku kongoma! Emalembeni ya magidi ya ntsandza-vahlayi a ri swin’we ni Tata wakwe, N’wana yoloye—loyi a thyiweke vito ra Yesu Kreste—u kume dyondzo leyi tlakukeke malunghana ni timfanelo, mintirho ni swikongomelo swa Yehovha Xikwembu. Endzhakunyana, loko a ri munhu wa nyama emisaveni, Yesu u te: “A ndzi endli nchumu hi ku tirhandzela ka mina, kambe ndzi vula swilo leswi hilaha Tatana a ndzi dyondziseke hakona.” (Xiitaliki i xerhu.)—Yohane 8:28.
2-4. (a) Hi ku ya hi Yohane ndzima 7, i yini leswi humeleleke loko Yesu a ya eNkhubyeni wa Titabernakele hi 32 C.E.? (b) Hikwalaho ka yini Vayuda va hlamarisiwe hi vuswikoti bya Yesu byo dyondzisa?
2 Xana Yesu u yi tirhise njhani dyondzo leyi a yi kumeke? Eka malembe manharhu ya vutirheli bya yena laha misaveni, u byele van’wana leswi a swi dyondzeke handle ko karhala. Hambi swi ri tano, leswi u swi endle hi xikongomelo xa nkoka. Kutani xana a xi ri xihi? A hi kambisiseni marito ya Yesu eka Yohane ndzima 7, laha a hlamuseleke masungulo swin’we ni xikongomelo xa ku dyondzisa kakwe.
3 Xiya xiyimo xa kona. A ku ri xixikana xa 32 C.E., kwalomu ka malembe manharhu endzhaku ka ku khuvuriwa ka Yesu. Vayuda a va hlengeletane eYerusalema eNkhubyeni wa Titabernakele. Eka masikunyana yo sungula ya nkhuvo lowu, a ku vulavuriwa swinene hi Yesu. Loko nkhuvo wu ri exikarhi, Yesu u ye etempeleni ivi a sungula ku dyondzisa. (Yohane 7:2, 10-14) Hi laha a a tolovele ku endla ha kona, u kombise leswaku i Mudyondzisi lonkulu.—Matewu 13:54; Luka 4:22.
4 Ndzimana 15 ya Yohane ndzima 7 yi ri: “Vayuda va hlamala, va ku: ‘Xana munhu loyi ú byi kuma kwihi vutivi, kasi a nga dyondzanga?’” Xana wa swi twisisa leswaku a va hlamarisiwa hi yini? Yesu a nga kalanga a nghena swikolo swa varhabi, kutani a a nga dyondzekanga—hi ku ya hi mianakanyo ya vona! Kambe, Yesu a kota ku pfula swiyenge swa Matsalwa yo Kwetsima a tlhela a swi hlaya hi ku olova. (Luka 4:16-21) Phela, muvatli loyi wa le Galeliya u tlhele a va dyondzisa hi Nawu wa Muxe! (Yohane 7:19-23) Xana swi endlekise ku yini?
5, 6. (a) Xana Yesu u xi hlamusele njhani xihlovo xa dyondzo ya yena? (b) Xana Yesu u yi tirhise njhani dyondzo ya yena?
5 Yesu u hlamuserile, hi laha hi hlayaka ha kona eka tindzimana 16 na 17: “Dyondzo leyi ndzi yi dyondzisaka a hi ya mina, kambe i ya Loyi a ndzi rhumeke. Loko munhu a navela ku endla ku rhandza ka Xikwembu, ú ta tiva loko dyondzo leyi yi huma eka Xikwembu, kumbe loko ndzi tivulavulela swa mina ntsena?” A va lava ku tiva leswaku Yesu u dyondzisiwe hi mani, kutani u va byele kahle leswaku dyondzo ya yena yi huma eka Xikwembu!—Yohane 12:49; 14:10.
6 Xana Yesu u yi tirhise njhani dyondzo yakwe? Hi laha swi rhekhodiweke ha kona eka Yohane 7:18, Yesu u te: “Loyi a vulavulaka swo huma emiehleketweni ya yena, ú tilavela ku dzunisiwa, kasi la lavaka ku dzunisa loyi a n’wi rhumeke, ú tshembekile, kutani ku hava ku homboloka eka yena.” (Xiitaliki i xerhu.) Mawaku ndlela leyi swi fanelaka ha yona leswi Yesu a tirhiseke dyondzo yakwe leswaku a dzunisa Yehovha, “l’a hetisekeke hi v̌utlhari”!—Yobo 37:16.
7, 8. (a) Xana dyondzo yi fanele yi tirhisiwa hi ndlela yihi? (b) Hi swihi swikongomelo swa mune swa xisekelo swa dyondzo leyi ringaniseriweke?
7 Xisweswo hi kuma dyondzo ya nkoka eka Yesu—a hi fanelanga hi tirhisa dyondzo leswaku hi tidzunisa, kambe leswaku hi dzunisa Yehovha. Ku hava ndlela yo tlula yoleyo yo tirhisa dyondzo. Kutani, xana u nga yi tirhisa njhani dyondzo leswaku u dzunisa Yehovha?
8 Ku dyondzisa swi vula “ku letela hi nkongomiso wa xiviri ni hi ku endla [ngopfu-ngopfu] eka ntirho wa vutshila, wa mavoko kumbe ntirho lowu thwaseriweke.” Sweswi a hi kambisiseni swikongomelo swa mune swa xisekelo swa dyondzo leyi ringaniseriweke ni ndlela leyi yi nga tirhisiwaka ha yona ku dzunisa Yehovha. Dyondzo leyi ringaniseriweke yi fanele yi hi pfuna (1) ku hlaya kahle, (2) ku tsala khwatsi, (3) ku kula emianakanyweni ni le mahanyelweni ni (4) ku kuma vuleteri lebyinene lebyi lavekaka evuton’wini bya siku na siku.
Ku Dyondza Ku Hlaya Kahle
9. Ha yini swi ri swa nkoka leswaku u va muhlayi lonene?
9 Xo sungula i ku dyondza ku hlaya kahle. Ha yini swi ri swa nkoka swonghasi ku va muhlayi lonene? The World Book Encyclopedia ya hlamusela: “Ku hlaya . . . i xisekelo xo dyondza naswona i vutshila byin’wana bya nkoka evuton’wini bya siku na siku. . . . Vahlayi lava nga ni vutshila va hoxa xandla eka vaaka-tiko lava humelelaka, lava tswalaka mihandzu. Hi hala tlhelo, vona hi voxe va tsakela vutomi lebyi fuweke, lebyi enerisaka swinene.”
10. Xana ku hlaya Rito ra Xikwembu ku hi pfunisa ku yini leswaku hi tiphina hi vutomi lebyi tsakisaka ni lebyi enerisaka?
10 Loko ku hlaya hi koxe ku kota ku hi pfuna leswaku hi tsakela vutomi “lebyi fuweke, lebyi enerisaka swinene,” leswi swi nga va tano swinene loko hi hlaya Rito ra Xikwembu! Ku hlaya koloko ku endla miehleketo ni timbilu ta hina swi pfulekela mianakanyo ni swikongomelo swa Yehovha, naswona loko hi swi twisisa khwatsi swi endla leswaku vutomi bya hina byi va ni xikongomelo. Ku engetela kwalaho, Vaheveru 4:12 yi ri: “Rito ra Xikwembu ra hanya, naswona ra tirha.” Loko hi hlaya Rito ra Xikwembu ni ku anakanyisisa ha rona, hi tshinetiwa eka Mutsari wa rona, naswona hi susumeteleka ku cinca vutomi bya hina leswaku a hi tsakela swinene. (Vagalatiya 5:22, 23; Vaefesa 4:22-24) Nakambe hi boheka ku byela van’wana ntiyiso wa risima lowu hi wu hlayaka. Hinkwaswo leswi swi dzunisa Mudyondzisi Lonkulu, Yehovha Xikwembu. Kunene ku hava ndlela leyi antswaka ku tlula leyi yo tirhisa vuswikoti bya hina byo hlaya!
11. I yini lexi faneleke xi katsiwa eka nongonoko lowu ringaniseriweke wa dyondzo ya munhu hi xiyexe?
11 Ku nga khathariseki leswaku hi vatsongo kumbe hi vakulu, hi khutaziwa ku hlaya kahle, hikuva ku hlaya ku tirha xiphemu xa nkoka evuton’wini bya hina bya Vukreste. Ku engetela eku hlayeni ka Rito ra Xikwembu ka nkarhi na nkarhi, nongonoko lowu ringaniseriweke wa dyondzo ya munhu hi xiyexe wu ta katsa ku kambisisa ndzimana ya Bibele eka Ku Kambisisa Matsalwa Siku Na Siku, ku hlaya Xihondzo xo Rindza na Xalamuka!, ni ku lunghiselela minhlangano ya Vukreste. Naswona ku vuriwa yini hi vutirheli bya Vukreste? Kunene, ku chumayela erivaleni, ku endla maendzo yo vuyela eka lava va tsakelaka ni ku fambisa tidyondzo ta le kaya ta Bibele hinkwaswo swi lava vuswikoti lebyinene bya ku hlaya.
Ku Dyondza Ku Tsala Khwatsi
12. (a) Ha yini swi ri swa nkoka ku dyondza ku tsala kahle? (b) Hi kwihi ku tsala lokukulu loku tshameke ku endliwa?
12 Xikongomelo xa vumbirhi hi leswaku dyondzo leyi ringaniseriweke yi fanele yi hi pfuna ku dyondza ku tsala khwatsi. Ku tsala a ku hundziseli marito kun’we ni mianakanyo ya hina ntsena kambe ku tlhela ku ma hlayisa. Eka malembe-xidzana yo tala swinene lama hundzeke, vavanuna va kwalomu ka 40 va Vayuda va tsale marito emajekejekeni kumbe emadzobyeni yo tsindziyela marito lama endleke Matsalwa lama huhuteriweke. (2 Timotiya 3:16) Kunene lebyi a byi ri vutsari lebyikulu eka lebyi tshameke byi endliwa! A swi kanakanisi leswaku Yehovha u kongomise ku kopiwa ni ku kopisisiwa nakambe ka marito wolawo yo kwetsima eka malembe-xidzana lama hundzeke, leswaku ma fika eka hina ma ri exiyin’weni lexinene. Xana a hi tsaki leswi Yehovha a tsaleke marito yakwe ehansi, ematshan’weni ya ku ma vula hi nomu?—Ringanisa Eksoda 34:27, 28.
13. I yini lexi kombisaka leswaku Vaisrayele a va swi tiva ku tsala?
13 Eminkarhini ya khale, a ku ri mintlawa yo karhi ntsena leyi a yi ri ni malunghelo, yo tanihi ya vatsari va le Mesopotamiya ni le Egipta leyi a yi dyondzekile. Ku hambana swinene ni matiko man’wana, eIsrayele un’wana ni un’wana a khutaziwa ku dyondzeka. Xileriso lexi nga eka Deteronoma 6:8, 9 xa leswaku Vaisrayele va tsala emarimbeni ya tindlu ta vona, hambi leswi xi nga xo fanekisela, xi kombisa leswaku a va swi tiva ku tsala. Loko va ha ri vatsongo, vana a va dyondzisiwa ku tsala. Gezer Calendar, yin’wana ya swikombiso swa matsalwa ya khale ya Xiheveru, vadyondzi van’wana va ehleketela leswaku a a yi ri tsalwa ra mufana loyi a nghena xikolo ra ku tikambela ha rona leswi a swi nhlokohateke.
14, 15. Hi tihi tindlela tin’wana letinene ni leti tengeke to tirhisa vuswikoti byo tsala?
14 Kambe xana hina hi nga byi tirhisa njhani vuswikoti byo tsala hi ndlela leyi akaka ni leyi tengeke? Entiyisweni hi nga swi endla hi ku tsala tinhla eminhlanganweni ya Vukreste, etinhlengeletanweni ni le mintsombanweni. Papila, hambi loko ri tsariwe hi “marito ma nga ri mangani,” ri nga nyika xikhutazo eka loyi a vabyaka kumbe ri kombisa ku nkhensa eka makwerhu wa xinuna kumbe wa xisati wa moya loyi a hi kombiseke musa kumbe malwandla. (1 Petro 5:12) Loko un’wana evandlheni a feriwe hi murhandziwa wakwe, papila ro koma kumbe khadi ri nga ha ‘vulavula hi ndlela yo chavelela’ eka munhu yoloye. (1 Vatesalonika 5:14) Makwerhu wa xisati wa Mukreste loyi a loveleke hi mana wa yena hikwalaho ka khensa u te: “Munghana wa mina un’wana u ndzi tsalele papila ra kahle. Sweswo swi ndzi pfunile hikuva a ndzi hamba ndzi ri hlaya.”
15 Ndlela leyinene yo tirhisa vuswikoti bya ku tsala leswaku hi dzunisa Yehovha i ku tsala papila ro nyikela vumbhoni bya Mfumo. Nkarhi wun’wana swi nga fanela ku tsalelana ni vanhu lava ha ku tsakelaka lava tshamaka etindhawini ta le kule. Vuvabyi byi nga ha endla leswaku u nga swi koti ku famba hi yindlu na yindlu swa xinkarhana. Kumbexana papila ri nga vula leswi a wu ta swi vula hi nomu wa wena.
16, 17. (a) Hi wihi ntokoto lowu kombisaka nkoka wo tsala papila ro nyikela vumbhoni bya Mfumo? (b) Xana u nga hlamusela ntokoto lowu fanaka na wona?
16 Xiya ntokoto wun’wana. Malembe yo tala lama hundzeke Mbhoni yin’wana yi tsale papila yi nyikela vumbhoni bya Mfumo eka noni leyi ku fa ka nuna wa yona ku tivisiweke eka phepha-hungu ra ndhawu yoleyo. A yi kumanga nhlamulo. Kutani, hi November 1994, endzhaku ka malembe yo tlula 21, Mbhoni leyi yi kume papila leri humaka eka n’wana wa xisati wa wansati loyi. Nhwana loyi u tsarile:
17 “Hi April 1973, u tsalele manana u n’wi chavelela endzhaku ka rifu ra tatana. Enkarhini wolowo a ndzi ri ni malembe ya kaye. Manana u yi dyondzile Bibele, kambe ku fikela ni sweswi a nga si va nandza wa Yehovha. Hambiswiritano, dyondzo yakwe yi endle leswaku ndzi hetelela ndzi tiva ntiyiso. Hi 1988, ndzi sungule dyondzo ya mina ya Bibele—endzhaku ka malembe ya 15 ndzi kume papila ra wena. Ndzi khuvuriwe hi March 9, 1990. Ndza nkhensa swinene hi papila ra wena ra malembe yo tala lama hundzeke naswona ndzi tsakela ku ku tivisa leswaku timbewu leti u ti byaleke ti kurile hi mpfuno wa Yehovha. Manana u ndzi nyike papila ra wena leswaku ndzi ri hlayisa, naswona ndzi nga tsakela ku ku tiva leswaku u mani. Ndza tshemba leswaku papila leri u ta ri kuma.” Kunene papila ra nhwanyana loyi, leri a ri ri ni adirese yakwe ni nomboro ya riqingho ri fikile hakunene eka Mbhoni leyi tsaleleke mana wakwe malembe yo tala lama hundzeke. Anakanya ndlela leyi nhwanyana loyi a hlamaleke ha yona loko a amukela riqingho ra Mbhoni leyi—leyi ya ha yaka emahlweni ni sweswi yi tsala mapapila yi byela van’wana hi ntshembo wa Mfumo!
Ku Kula eMianakanyweni, eMahanyelweni Ni Le Moyeni
18. Eminkarhini ya Bibele, xana vatswari a va yi khathalela njhani dyondzo ya mianakanyo ni ya mahanyelo ya vana va vona?
18 Xikongomelo xa vunharhu hi leswaku dyondzo leyi ringaniseriweke yi fanele yi hi pfuna leswaku hi kula emianakanyweni ni le mahanyelweni. Eminkarhini ya Bibele, dyondzo ya mianakanyo ni ya mahanyelo ya vana a yi tekiwa tanihi ntirho wun’wana lowukulu wa vatswari. Vana a va nga dyondzisiwi ku hlaya ni ku tsala ntsena, kambe, xa nkoka swinene, a va dyondzisiwa Nawu wa Xikwembu, lowu a wu katsa mintirho ya vona hinkwayo ya vutomi. Xisweswo, dyondzo a yi katsa ku leteriwa malunghana ni mindzhwalo ya vona ya vukhongeri, misinya ya milawu mayelana ni vukati, vuxaka bya le ndyangwini ni ku tenga hi tlhelo ra rimbewu, swin’we ni mindzhwalo ya vona eka vanhu-kulobye. Dyondzo yo tano a yi va pfuna leswaku va kula emianakanyweni ni le mahanyelweni swin’we ni le moyeni.—Deteronoma 6:4-9, 20, 21; 11:18-21.
19. Hi kwihi laha hi nga kumaka dyondzo leyi hi kombisaka nkoka wa mahanyelo yo antswa lawa hi faneleke hi hanya wona ni lama hi pfunaka ku kula emoyeni?
19 Ku vuriwa yini hi namuntlha? Dyondzo leyinene ya misava i ya nkoka. Yi hi pfuna leswaku hi kula emianakanyweni. Kambe xana hi nga yi kuma kwihi dyondzo leyi yi nga hi kombisaka mimpimanyeto leyinene ngopfu ya mahanyelo leyi hi nga hanyaka ha yona ni leyi nga hi pfunaka leswaku hi kula emoyeni? Evandlheni ra Vukreste, hi kuma nongonoko wa dyondzo ya le tilweni leyi nga kumekiki kun’wana emisaveni. Hi dyondzo ya hina vini ya Bibele ni tibuku leti sekeriweke eBibeleni, kun’we ni vuleteri lebyi kumekaka eminhlanganweni ya vandlha, etinhlengeletanweni ni le mintsombanweni, hi nga kuma dyondzo leyi ya risima, leyi yaka emahlweni—dyondzo ya Xikwembu—mahala! Xana yi hi dyondzisa yini?
20. Xana dyondzo ya Xikwembu yi hi dyondzisa yini, naswona hi byihi vuyelo bya kona?
20 Loko hi sungula ku dyondza Bibele, hi dyondza tidyondzo ta xisekelo ta Matsalwa, ‘tidyondzo ta masungulo.’ (Vaheveru 6:1) Loko hi ya emahlweni, hi dya “swakudya leswi tiyeke”—ku nga, mintiyiso leyi enteke. (Vaheveru 5:14) Kambe, ku tlula sweswo hi dyondza misinya ya milawu ya Xikwembu leyi hi dyondzisaka ndlela ya ku hanya hi laha Xikwembu xi lavaka hi hanya ha kona. Hi xikombiso, hi dyondza ku papalata mikhuva ni swiendlo leswi ‘thyakisaka nyama’ ni ku xixima vulawuri kun’we ni vanhu ni nhundzu ya van’wana. (2 Vakorinto 7:1; Tito 3:1, 2; Vaheveru 13:4) Ku engetela kwalaho, hi twisisa nkoka wa ku tshembeka ni ku gingiriteka entirhweni wa hina ni ntikelo wa ku hanya hi milawu ya Bibele emhakeni ya ku tenga hi tlhelo ra rimbewu. (1 Vakorinto 6:9, 10; Vaefesa 4:28) Loko hi endla nhluvuko eku tirhiseni ka misinya leyi ya milawu evuton’wini bya hina, ha kula emoyeni, naswona vuxaka bya hina ni Xikwembu bya kula. Ku tlula kwalaho, mahanyelo ya hina yo chava Xikwembu ma hi endla vaaka-tiko lavanene, ku nga khathariseki leswaku hi tshama kwihi. Naswona leswi swi nga susumetela van’wana leswaku va dzunisa Xihlovo xa dyondzo ya le henhla—Yehovha Xikwembu.—1 Petro 2:12.
Vuleteri Lebyinene Bya Vutomi Bya Siku Na Siku
21. Hi byihi vuleteri lebyi tirhaka lebyi vana va byi kumeke eminkarhini ya Bibele?
21 Xikongomelo xa vumune xa dyondzo leyi ringaniseriweke i ku nyika munhu vuleteri lebyinene lebyi lavekaka evuton’wini bya siku na siku. Dyondzo ya vutswari eminkarhini ya Bibele a yi katsa vuleteri lebyi tirhaka. Vanhwanyana a va dyondzisiwa mintirho ya le kaya. Ndzima yo hetelela ya Swivuriso yi kombisa leswaku swi le rivaleni leswaku a yi tele naswona a yi hambana. Xisweswo, vanhwanyana a va dyondzisiwa ku phota, ku luka, ku sweka, ni ku endla mintirho yin’wana ya le ndlwini, ku xavisa swin’we ni ku endla mintirho ya bindzu. Vafana hakanyingi a va dyondzisiwa ntirho wo tihanyisa wa vatata va vona, wa vurimi kumbe ntirho wa mavoko. Yesu u dyondze vuvatli eka tata wakwe wa muwundli, Yosefa; hi ndlela yoleyo, a a nga vitaniwi “n’wana wa muvatli” ntsena kambe u tlhele a vitaniwa “muvatli.”—Matewu 13:55; Marka 6:3.
22, 23. (a) Xana dyondzo yi fanele yi endla vana va lunghekela yini? (b) Xana xikongomelo xa hina xo hlawula dyondzo leyi engetelekeke loko yi laveka xi fanele xi va xihi?
22 Ni namuntlha, dyondzo leyi ringaniseriweke kahle yi katsa ku lunghekela ku khathalela swilaveko swa ndyangu siku rin’wana. Marito ya muapostola Pawulo lama kumekaka eka 1 Timotiya 5:8 ma kombisa leswaku ku khathalela ndyangu wa wena i ndzhwalo wo kwetsima. U tsarile: “Loko munhu a nga pfuni maxaka ya yena, ngopfu-ngopfu lava va nga va ndyangu wa yena wa xiviri, ú landzurile vupfumeri, kutani ú tlula ni vamatiko hi ku biha.” Kutani, dyondzo yi fanele yi endla vana va lunghekela vutihlamuleri lebyi va nga ta byi rhwala evuton’wini swin’we ni ku va hlomisela ku va vaaki lava tirhaka hi matimba.
23 I dyondzo yo fika kwihi ya misava leyi hi faneleke hi va na yona? Leswi swi nga ha hambana hi ku ya hi tindhawu. Kambe loko ndhawu ya ntirho yi lava vuleteri lebyi engetelekeke ku tlula lebyi laviwaka hi nawu, swi le ka vatswari ku kongomisa n’wana wa vona leswaku a endla xiboho mayelana ni dyondzo leyi engetelekeke kumbe vuleteri, va pima vuswikoti bya vuyelo ni swihinga swa tidyondzo toleto leti engetelekeke. Kambe, xana munhu u fanele a va ni xikongomelo xihi loko a hlawula dyondzo leyi engetelekeke loko yi laveka? Kunene a nga fanelanga a lava rifuwo, ku titlakusa kumbe ku dzuneka. (Swivuriso 15:25; 1 Timotiya 6:17) Tsundzuka dyondzo leyi hi yi dyondzeke exikombisweni xa Yesu—dyondzo yi fanele yi tirhiseriwa ku dzunisa Yehovha. Loko hi hlawula dyondzo leyi engetelekeke, hi fanele hi susumetiwa hi ku navela ku tiwundla kahle leswaku hi kota ku tirhela Yehovha hi xitalo hi laha swi kotekaka ha kona evutirhelini bya Vukreste.—Vakolosa 3:23, 24.
24. Hi yihi dyondzo leyi dyondziweke eka Yesu leyi hi nga fanelangiki hi yi rivala?
24 Hikwalaho ke, a hi gingiritekeni eka matshalatshala ya hina yo kuma dyondzo ya misava leyi ringaniseriweke. Onge hi nga wu tirhisa hi laha ku teleke nongonoko lowu yaka emahlweni wa dyondzo ya Xikwembu, lowu nyikeriwaka endzeni ka nhlengeletano ya Yehovha. Naswona a hi nge yi rivali dyondzo ya nkoka leyi hi yi dyondzeke eka Yesu Kreste, wanuna la dyondzekeke swinene loyi a tshameke a va kona laha misaveni—a hi fanelanga hi tirhisa dyondzo hi yi tirhisela ku tidzunisa, kambe hi fanele hi yi tirhisela ku dzunisa Mudyondzisi lonkulu ku tlula hinkwavo, Yehovha Xikwembu!
Hi Yihi Nhlamulo Ya Wena?
◻ Xana Yesu u yi tirhise njhani dyondzo ya yena?
◻ Ha yini swi ri swa nkoka ku dyondza ku hlaya kahle?
◻ Xana hi nga byi tirhisa njhani vuswikoti byo tsala leswaku hi tisa ku dzuneka eka Yehovha?
◻ Xana dyondzo ya Xikwembu yi hi pfuna hi ndlela yihi leswaku hi kula emahanyelweni ni le moyeni?
◻ I vuleteri byihi lebyi tirhaka lebyi dyondzo leyi ringaniseriweke yi faneleke yi byi katsa?
[Bokisi leri nga eka tluka 13]
Mpfuno Lowu Tirhaka Wa Vadyondzisi
Emintsombanweni ya Muganga ya “Vadzunisi Lava Tsakeke” hi 1995/96, Sosayiti ya Watch Tower yi humese broxara leyintshwa leyi nge Timbhoni ta Yehovha Ni Dyondzo. Broxara leyi ya matluka ya 32, ya mivala leyi heleleke yi endleriwe ngopfu-ngopfu vadyondzisi. Xisweswo se yi hundzuluxeriwe hi tindzimi ta 58.
Hikwalaho ka yini yi ri broxara ya vadyondzisi? Hikuva yi ta va pfuna leswaku va twisisa ku antswa ripfumelo ra swichudeni leswi nga vana va Timbhoni ta Yehovha. Xana broxara leyi yi na yini endzeni ka yona? Hi ndlela leyi twisisekaka ni leyi akaka, yi hlamusela mavonelo ya hina etimhakeni to kota dyondzo leyi engetelekeke, masiku yo velekiwa ni Khisimusi, ni ku losa mujeko. Broxara leyi yi tlhela yi tiyisekisa vadyondzisi leswaku hi lava vana va hina va dyondza hi laha va nga kotaka ha kona ni leswaku hi lava ku tirhisana ni vadyondzisi hi mbilu hinkwayo, hi ri karhi hi tsakela swinene dyondzo ya vana va hina.
Xana broxara leyi nge Dyondzo yi nga tirhisiwa njhani? Tanihi leswi yi lunghiseleriweke vadyondzisi, a hi yi nyikeni vadyondzisi, tinhloko ta swikolo ni vatirhi van’wana va le xikolweni. Onge broxara leyi leyintshwa yi nga pfuna vadyondzisi hinkwavo ku twisisa mavonelo ya hina ni tidyondzo ta hina ni lexi hi endlaka minkarhi yin’wana hi va ni lunghelo ro hambana ni van’wana. Vatswari va khutaziwa ku tirhisa broxara leyi tanihi xisekelo xa bulo ra vona ni vadyondzisi va vana va vona.
[Xifaniso lexi nga eka tluka 10]
EIsrayele wa khale dyondzo a yi langutiwa yi ri leyi tlakukeke