U Nga Kanakani Ku Chumayela
1. I yini leswi lavaka xivindzi naswona ha yini?
1 Xana u tshame u kanakana ku chumayela exikolweni hi ku chava leswaku u ta hlekuriwa? Hakunene swi lava xivindzi leswaku u vulavula, ngopfu-ngopfu loko u ri ni tingana. I yini leswi nga ku pfunaka?
2. Loko swi ta emhakeni ya ku chumayela exikolweni, xana ku tirhisa vutlhari swi katseka hi ndlela yihi?
2 Tirhisa Vutlhari: Hambileswi xikolo xi nga tekiwaka tanihi ndhawu leyi u nga ha vaka ni nkarhi wo chumayela van’wana, tsundzuka leswaku a wu languteriwanga ku sungula mabulo ya swilo swa moya ni un’wana ni un’wana hilaha a swi ta va hakona loko u ri karhi u chumayela hi yindlu ni yindlu. Tirhisa vutlhari ku kumisisa leswaku hi rini laha u faneleke u vulavula. (Ekl. 3:1, 7) Bulo ra le tlilasini kumbe ntirho wa xikolo swi nga ku nyika nkarhi wo phofula ripfumelo ra wena. Kumbe swichudeni-kulobye swi nga ha ku vutisa leswaku hikwalaho ka yini u nga hlanganyeli eka mintirho yo karhi. Vakreste van’wana va byele vadyondzisi va vona eku sunguleni ka lembe lerintshwa ra xikolo leswaku vona i Timbhoni ta Yehovha kutani va nyika vadyondzisi va vona minkandziyiso leyi hlamuselaka ripfumelo ra vona. Van’wana va siye minkandziyiso ya vona ehenhla ka desika ku endlela leswaku vadyondzi-kulobye va ta vutisa swivutiso ha yona.
3. Xana u nga lunghiselela njhani leswaku u ta chumayela exikolweni?
3 Lunghiselela: Loko u lunghiselela, u ta va ni xivindzi. (1 Pet. 3:15) Ringeta ku langutela swivutiso leswi nga ha tlakukaka naswona ehleketa hi ndlela leyi u nga swi hlamulaka ha yona. (Swiv. 15:28) Loko swi koteka, yana exikolweni u ri ni Bibele ya wena ni minkandziyiso yi nga ri yingani, yo tanihi buku leyi nge Ku Hlamulana, tibuku leti nge Vantshwa Va Vutisa ni leti vulavulaka hi ntumbuluko, leswaku u ta kota ku kombetela eka tona loko ti laveka. Kombela vatswari va wena leswaku mi katsa ni minkombiso hi nkarhi wa dyondzo ya ndyangu.
4. Ha yini u fanele u hambeta u chumayela exikolweni?
4 Vana Ni Langutelo Lerinene: U nga gimeti hileswaku minkarhi hinkwayo swichudeni-kulobye swi ta ku hlekula loko u swi chumayela. Swin’wana swi ta xixima xivindzi lexi u nga na xona naswona swi nga ha ku yingisa. Kambe u nga heli matimba loko ni xin’we xa swona xi nga ku yingisi. Yehovha u ta tsakisiwa hileswi u ringeteke. (Hev. 13:15, 16) Hambeta u n’wi kombela leswaku a ku pfuna u ‘vulavula hi vurhena lebyi heleleke.’ (Mint. 4:29; 2 Tim. 1:7, 8) Anakanya ntsako lowu u nga ta va na wona loko munhu un’wana a ku yingisa! Munhu wo tano a nga hetelela a ve nandza wa Yehovha!