Xana Vana Va Wena Va Lunghekile?

1. Ha yini ku ri ni xilaveko xo va vana va xikolo va lungheka?

¹ A swi kanakanisi leswaku lembe ni lembe vana va wena va ta langutana ni swiphiqo leswintshwa ni mintshikilelo exikolweni. Va ta tlhela va kuma nkarhi wo “nyikela vumbhoni malunghana ni ntiyiso.” (Yoh. 18:37) Xana va lunghekile?

2. Leswaku va lungheka, i yini leswi vana va wena va faneleke va swi tiva?

² Xana vana va wena va swi twisisa kahle leswi katsekaka emhakeni yo tlangela minkhuvo ya tiko, tiholideyi ta vuhedeni ni leswaku ha yini ku tikatsa eka swilo leswi swi nga ri swinene? Xana va wu lunghekerile ntshikilelo lowu va nga ta langutana na wona wo hlongorisa dyondzo leyi tlakukeke, ku rhandzana ni ku tirhisa xihoko kumbe swidzidziharisi? Xana va fanele va vula ntsena leswaku mintirho yo karhi yi lwisana ni vukhongeri bya vona, kumbe va fanele va tiva ndlela yo hlamusela tidyondzo leti va pfumelaka eka tona?—1 Pet. 3:15.

3. Vatswari va nga byi tirhisa njhani Vugandzeri bya Ndyangu bya nimadyambu ku endla leswaku vana va vona va lungheka?

³ Tirhisa Vugandzeri Bya Ndyangu Bya Nimadyambu: I ntiyiso leswaku u nga ha lava ku burisana ni vana va wena lembe hinkwaro loko va langutana ni swiphiqo leswintshwa exikolweni. Loko u endla matshalatshala yo hlawuleka yo kambisisa swiphiqo leswi va nga ha langutanaka na swona exikolweni emahlweni ko va xi pfula swi ta va tiyisa. Ha yini u nga tirhisi byin’wana bya Vugandzeri bya Ndyangu bya nimadyambu leswaku u endla tano? U nga ha vutisa vana va wena leswaku i yini leswi va karhataka swinene exikolweni. Timhaka leti mi buleke ha tona emalembeni lama hundzeke ti nga pfuxetiwa sweswi hileswi se vana va wena va kuleke naswona va nga ni vutivi lebyi engetelekeke. (Ps. 119:95) Mi nga ha endla minkombiso leyi eka yona u tiendlaka thicara, mutsundzuxi kumbe xichudeni-kulobye. Dyondzisa vana va wena ku hlamula hi ku tirhisa Bibele ni ku tirhisa buku leyi nge Ku Hlamulana ni leyi nge Vantshwa Va Vutisa. Mutswari un’wana u tirhise minkombiso leswaku a lunghiselela vana vakwe ku va va ya eka mathicara ya vona lamantshwa lembe ni lembe leswaku va ma tivisa leswaku i Timbhoni ta Yehovha.—Vona Xihondzo xo Rindza xa December 15, 2010, matluka 3-5.

4. I yini leswi vatswari vo tlhariha va nga swi endlaka?

⁴ Swiphiqo leswi vantshwa lava nga Vakreste va langutanaka na swona emasikwini lawa ya makumu swi ya swi ‘nonon’hwa ku langutana na swona.’ (2 Tim. 3:1) Vatswari vo tlhariha va ta ringeta ku anakanya ka ha ri emahlweni hi swiphiqo leswi vana va vona va nga ta langutana na swona kutani va va lunghiselela ku hlula swiphiqo swoleswo. (Swiv. 22:3) Emahlweni ko va va langutana ni swiphiqo swoleswo, endla hinkwaswo leswi u nga swi kotaka ku pfuna vana va wena leswaku va lungheka.