Xiviko Xa Vahuweleri Va Mfumo

Vana Va Xikolo Va Timbhoni Va Bumabumeriwa

XANA wena, tanihi xichudeni exikolweni, wa nyuma ku vulavula hi ripfumelo ra wena? Mintokoto leyi nga la hansi yi komba leswaku Timbhoni leti tintshwa a ti nga chavi ku tlakusa ripfumelo ra tona ra Vukriste kutani ti bumabumeriwa hi ku endla tano.

◻ Exikolweni eAustralia, swichudeni a swi averiwe ku tsala xitsalwana hi Khisimusi, kambe mudyondzisi u te eka Mbhoni ya malembe ya 11 hi vukhale: “Ndza swi tiva leswaku u un’wana wa Timbhoni ta Yehova, kutani u nga ka u nga tsali hi ta minkhuvo ya Khisimusi. U nga tsala xitsalwana lexi hambaneke hi ‘Matimu ya Khisimusi.’” Makwerhu lontsongo wa xisati a tsala xitsalwana, a tirhisa rungula leri faneleke leri humaka etibukwini ta Sosayiti ni tibuku tin’wana ta tinhlamuselo. Lexi hlamariseke klasi, mudyondzisi u vule leswaku mhaka ya kona a yi ri yinene ngopfu ni ku va ntiyiso hi tlhelo ra matimu. “Eka switsalwana hinkwaswo leswi ndzi swi kumeke, xa wena hi xona xo antswa eklasini,” ku vula mudyondzisi. Hikwalaho ka sweswo, Mbhoni leyintsongo yi fambisele mudyondzisi wa yona ni swichudeni-kulobye broxara yin’we leyi nge School, 15 wa timagazini, buku yin’we leyi nge Youth na tibuku timbirhi leti nge Hanya Hi Masiku.

◻ Exikolweni xin’wana, eAustralia, vana va nhungu va Timbhoni a va fambisiwa hi mukhomeri wa mudyondzisi ndzhenga wun’wana ni wun’wana hi mavhiki manharhu yo hetelela ya xikolo, leswi a va nga hlanganyeli eka mintirho ya Khisimusi. Endzhaku u vulavule ni mana wa van’wana va vana a ku: “Xiphemu lexi ndzi veke na xona a xi ri xintsongo swinene. Va nga ri vangani va vadyondzisi va tile ivi va vutisa hi laha swilo swi fambaka ha kona. Ndzi te eka vona: ‘A swi khathariseki leswi mi anakanyaka swona hi vukhongeri bya vona na hi ndlela leyi va alaka mintirho yin’wana ha yona, lowu i ntlawa lowu antswaka wa vana lava ndzi tshameke ndzi tirha na vona.’” Mavhiki ma nga ri mangani endzhaku loko ku hlanganiwe na yena entirhweni wa yindlu na yindlu, u te: “Kambe, xana u swi hundzisele emahlweni leswi ndzi swi vuleke hi ta vana exikolweni? Ndzi lava leswaku hinkwavo va swi tiva.”

◻ Hi le United States ku ta ntokoto lowu wa xichudeni xin’wana xa siniyara xa malembe ya 17 hi vukhale xa kholichi lexi klasi ya xona ya nawu a yi katseke swinene hi bulo ra timfanelo leti yelanaka ni ntshunxeko wa vukhongeri ni ku hambana ka Kereke ni Mfumo. Timbirhi ta timhaka ta kona a ti katsa Timbhoni ta Yehova ni mhaka ya ngati. Makwerhu lontsongo wa xisati u kume xiviko xa tlhelo rin’we ni lexi nga riki xinene mayelana ni mintiyiso ya Bibele hi ta ngati ivi a byela mudyondzisi wakwe sweswo. U hlamule hi ku n’wi nyika nkarhi wo vulavula ni klasi. A nga si vulavula, swichudeni swi ehlekete leswaku tihuvo a ti endle kungu lerinene eku sindziseni ka Timbhoni leswaku ti va ni mimpompelo ya ngati leyi lwisanaka ni ku navela ka tona. Kambe endzhaku ko twa mhaka leyi seketeriweke eBibeleni, hi ku twanana klasi yi sole makungu ya khoto. Makwerhu wa hina wa xisati a a tsakile loko vo tala va swichudeni va n’wi tshinelela ivi va kombela vuxokoxoko lebyi engetelekeke mayelana ni Timbhoni ta Yehova. Sweswi u vula leswaku u tlangela swinene leswaku xikolo i nsimu yakwe leyi hlawulekeke.

Ina, n’wina vana va xikolo mi na nsimu leyi hlawulekeke. Leswi mi nga ni nkarhi, hambetani mi pfuna swichudeni-kuloni hi musa ku dyondza hi xikongomelo lexi hlamarisaka xa Xikwembu, kutani mi ta kuma ku bumabumeriwa hayi loku humaka eka van’wana ntsena kambe loku humaka eka Yehova hi yexe!—Yobo 40:14.