Xiviko Xa Vahuweleri Va Mfumo
Vana Va Xikolo Va Le Nigeria Va Katekisiwile Hikwalaho Ka Vutshembeki Bya Vona
MUAPOSTOLA Pawulo u tsarile: “Endlani hinkwaswo leswi mi swi kotaka, hi tlhelo ra n’wina, ku hanyisana ni vanhu hinkwavo hi ku rhula.” (Varhoma 12:18) Vana va xikolo va Timbhoni ta Yehova eNigeria va tirhise xitsundzuxo lexi, hambi loko va xanisiwa. Hikokwalaho ka sweswo, Yehova u va katekisile.
◻ Thicara un’wana a a venga Timbhoni ta Yehova. Mixo wun’wana hi nkarhi wa xikhongelo, u hlengelete Timbhoni hinkwato emahlweni kutani a ti lerisa ku yimbelela risimu ra tiko. Va arile, va vula leswaku va lava ku yisa vugandzeri lebyi hlawulekeke eka Xikwembu ntsena. Kutani thicara a va teka hinkwavo a va humesela ehandle kutani a va byela leswaku va tsema byanyi. Hi nkarhi wolowo, swichudeni swin’wana swi ye emahlweni ni tidyondzo.
Nkulukumba un’wana wa Mbhoni u teke broxara leyi nge School and Jehovah’s Witnesses kutani a yi nyika thicara, a hlamusela vukala-tlhelo bya Timbhoni ta Yehova. Hambi swi ri tano, thicara u arile ku burisana na yena kumbe ku amukela broxara yoleyo. Hi loko, xikan’we-kan’we a andzisa nxupulo wa vana volavo.
Timbhoni letitsongo ti ye emahlweni ti tiyisela nxupulo lowu naswona ti ya emahlweni no tsema byanyi hambi loko thicara a nga ri kona. Siku rin’wana thicara u tumberile naswona a va languta, vona va nga n’wi voni loko va ri karhi va ya emahlweni no tirha ni ku yimbelela tinsimu ta Mfumo. Swi n’wi tsakisile swinene lerova a va tlherisela etlilasini, a phofula ku hlamala ka yena langutelo ra vona. Vuyelo byi ve byihi? Thicara yoloye sweswi u dyondza Bibele ni Timbhoni ta Yehova!
Entiyisweni vana lava va xikolo va katekisiwile swinene hi ku tshembeka eka Yehova ni le ka misinya ya yena ya milawu.—Swivuriso 10:22.
◻ Ruth ni vanghana va yena na vona va katekisiwile hi vutshembeki bya vona eka xilaveko xa Yehova xa ku nga vi “xiphemu xa misava.” (Yohane 17:16, NW) Ruth, loyi a nga ni malembe ya 18, u sungule ku phayona loko a ri ni malembe ya 12. Yena ni Timbhoni tin’wana va kanetiwile hi swirho swa ntlawa wa vadyondzisi hikwalaho ko ala ku yimbelela risimu ra tiko. Thicara u kombele ku vona vatswari va vanhwanyana volavo. Loko va hlamuserile, hi ku tirhisa broxara leyi nge School, thicara a a anerisekile naswona a nga ha swi karhatanga swichudeni sweswo.
Hambi swi ri tano, siku rin’wana thicara la humaka eIndia u holovele un’wana wa vanhwanyana emahlweni ka tlilasi a tlhela a n’wi xupula loko nhwanyana yoloye a nga yimbelelanga risimu ra tiko. Nhwanyana yoloye u lwele ripfumelo ra yena hi xivindzi kutani thicara a n’wi teka a n’wi yisa eka nhloko ya xikolo. Loko va fika kwalaho, mbhoni leyitsongo yi kume leswaku mupfuni wa nhloko ya xikolo a a ri kona kwalaho. Lexi n’wi hlamariseke, nhloko ya xikolo ni mupfuni wa yona va sungule ku hleka. Nhloko ya xikolo yi byele thicara yi ku: “Manana, u nga vileli hi vanhwanyana lava. Hambi loko wo va dlaya, va ngo ho fa ematshan’wini yo yimbelela risimu ra tiko. A wu si twa ha vona xana?” Hi loko yena ni mupfuni wa yena va vulavula hi ripfumelo ni xivindzi xa Timbhoni ta Yehova. Loko yi vulavula ni nhwanyana yoloye, nhloko ya xikolo yi vule leswaku yi vaviseke swinene hi ndlela yo biha leyi a khomiweke ha yona. Kutani yi engetela yi ku: “Yana emahlweni ni mintirho ya wena ya ripfumelo. Ndza byi navela vukhongeri bya wena ni xivindzi xa wena loko u ri handle ni laha xikolweni.” Endzhakunyana, thicara loyi eku sunguleni a kaneta u kombele ku rivaleriwa eka Mbhoni, a vula leswaku sweswi wa byi twisisa vukala-tlhelo bya Timbhoni.
Vana lava va landzelele xikombiso xa Vaheveru vanharhu lava nga tshikangiki vutshembeki bya vona eka Xikwembu hi ku korhamela xifaniso, ni xikombiso lexinene xa Daniyele, loyi a aleke ku tshika ku khongela eka Yehova. Vavanuna lava va katekisiwile hi Yehova hikuva a va tshembeka eka milawu ya ku lulama ya Xikwembu.—Daniel, tindzima 3 na 6.