Mudyondzisi Wa Xisati A Cinca Langutelo Ra Yena

◼ Emalembeni yo hlayanyana lama hundzeke, mudyondzisi un’wana wa le dorobeni ra Batumi, leri nga eGeorgia, u kombele swichudeni leswaku swi tsala Milawu ya Khume. Lexi hlamariseke mudyondzisi yoloye, xichudeni xin’wana lexi vuriwaka Anna, xi yi longoloxe hi ku landzelelana ka yona. Xi tlhela xi hlamula swivutiso swin’wana swa le Bibeleni hi ndlela leyi tsakisaka. Mudyondzisi yoloye u xi vutisile a ri karhi a hlamarile leswaku xi ti tivela kwihi timhaka toleto. Loko Anna a vule leswaku timhaka leti u ti tive hi ku dyondza Bibele ni Timbhoni ta Yehovha, mudyondzisi yoloye u nambe a n’wi miyeta a vula leswaku yena u ti teka ti hisekela etlhelo.

Siku rin’wana, mudyondzisi yoloye u kombele swichudeni leswaku swi tsala xitsalwana malunghana ni vutomi bya le Georgia swin’we ni swiphiqo swo hambana-hambana leswi nga kona etikweni rero. Emakumu ka xitsalwana xa yena, Anna u tsarile a ku: “Vanhu a va nge swi koti ku herisa swiphiqo leswi vanhu va nga na swona hikuva Yeremiya 10:23 yi ri: ‘Ndlela ya munhu wa la misaveni a yi le ka yena. Munhu loyi a fambaka a nga ka a nga wu kongomisi nkondzo wa yena.’ Swiphiqo hinkwaswo swi ta herisiwa hi Mfumo wa Xikwembu.”

Hi siku leri landzelaka mudyondzisi yoloye u bumabumele xitsalwana xa Anna emahlweni ka vadyondzi lavan’wana kutani a ku: “Ndzi tsakisiwe hi xitsalwana xa Anna xo hlawuleka, lexi a xi tsaleke hi marito ya yena n’wini. Eka xona u hlamusele ndlela leyi swiyimo swa misava leyi swi nga ta lulamisiwa ha yona.” Mudyondzisi loyi u tlhele a tsakisiwa hi mahanyelo ya Anna, a n’wi bumabumela emahlweni ka vadyondzi lavan’wana hinkwavo hikwalaho ka leswi a tikhomeke kahle ni hi ndlela leyinene leyi a ambalaka ha yona.

Loko Timbhoni ta Yehovha ti endzele mudyondzisi yoloye ekaya ka yena, u ti byele leswaku eku sunguleni a a anakanya leswaku ti hisekela etlhelo kambe u cince ndlela leyi a a titeka ha yona hikwalaho ka xichudeni xakwe lexi vuriwaka Anna. Hi 2007, mudyondzisi yoloye u ve kona eXitsundzuxweni xa rifu ra Yesu Kreste swin’we ni Timbhoni ta Yehovha a tlhela a rhiya ndleve loko nkulumo yi ri karhi yi ya emahlweni.

Endzhaku ka Xitsundzuxo, mudyondzisi wa Anna u pfumerile leswaku u tsakisiwe swinene hi leswi Timbhoni ta Yehovha ti yi tivaka kahle Bibele. Sweswi Timbhoni ti dyondza na yena Bibele nkarhi na nkarhi. A swi kanakanisi leswaku ku fana ni mudyondzisi loyi, na wena u pfuleke mahlo u susumeteleka ku kambisisa vukhongeri bya van’wana ni mahanyelo ya vona. Ha yini u nga kombeli Mbhoni ya Yehovha yi ta dyondza Bibele na wena ekaya mahala?

[Xifaniso lexi nga eka tluka 21]

Anna a ri karhi a tsala xitsalwana xa yena