“Nsimu Leyi Hlawulekeke”

VANTSHWA vo tala va Vukriste va amukele langutelo ra leswaku xikolo i ‘nsimu ya vona leyi hlawulekeke,’ kutani va xalamukele minkarhi yo veka vumbhoni eka mathicara ni vanghana va klasi. Xiya vuyelo lebyinene lebyi kumiweke hi Susan, wanhwana wa malembe ya 13 hi vukhale eCanada.

“Hi December thicara wa mina u kombele klasi ku tsala xitori xa Khisimusi leswaku ku ‘vumbiwa xitsalwana.’ Ndzi hlawule nhloko-mhaka ya mina leyi nge ‘Xiviko eHenhleni Ka Masungulo Ya Khisimusi.’ Hi ku tirhisa ti-encyclopedia ta xikolo ni swihloko swa Awake! leswaku ndzi kuma tinhlamuselo, ndzi swi kotile ku tsala xiviko lexi dyondzisaka.” Thicara u anakanye yini ha swona?

“Emakumu ka xiviko xa mina thicara u endle tinhlamuselo leti: ‘Susan, u tsale kahle swonghasi! Ndzi rhandza vutshembeki bya wena naswona ndzi xixima ku tiyimisela ka wena. Hi mianakanyo ya wena ni ku twisisa ka wena, minkarhi hinkwayo u ta xiximiwa. Ndza tshemba leswaku eka nkarhi lowu taka u ta hlayisa timfanelo leti rhandzekaka leti u nga na tona sweswi. Eku heteleleni, swa phyuphyisa swinene naswona swa vuyerisa ku hlaya kumbe ku vulavula ni munhu wa malembe ya wena loyi a kuriseke ni ku hlayisa xivindzi xa ku tiyimisela ka yena.’

“Endzhaku ka loko a hlaye xiviko hi yexe, u endle leswaku mathicara hinkwawo ekamareni ra mathicara ya xi hlaya. Kutani hinkwavo va kume vumbhoni! Swi ndzi nyike xivindzi ni ku tiyimisela ku vulavula hi mintiyiso ya Bibele ni van’wana exikolweni.

“Kavula, vanghana va mina hinkwavo va xikolo va swi tiva leswaku ndzi un’wana wa Timbhoni ta Yehova, naswona, loko va twe leswi ndzi tsaleke ha swona, na vona va lave ku hlaya xiviko xa mina. Va vonake va ri lava va tsakelaka swinene lerova ndzi boxa leswaku a ndzi ta tisela un’wana ni un’wana wa vona nkandziyiso wa Awake!, lowu a wu ri na xihloko lexi vulavulaka hi Khisimusi. Wolowo a wu ri nkandziyiso wa December 22, 1979, naswona a wu ri na xihloko lexi vulavulaka hi ‘disco.’

“Loko ndzi tise tikopi ta nkandziyiso wa Awake! exikolweni, van’wana vo hlayanyana eklasini va ti vonile naswona na vona va kombele tikopi. Va kombise ku tsakela lokukulu swinene eka xihloko lexi vulavulaka hi ‘disco’ lerova ndzi kunguhata ku tisela un’wana ni un’wana wa vona kopi ya Awake! ya March 22, 1979, leyi a yi ri na nxaxamelo wa swihloko emhakeni yoleyo. Hikwalaho ke, ndzi fambise timagazini ta 26 eka swichudeni-kulorhi.

“Eka nkarhi wun’wana wa le ndzhakunyana, enkarhini lowu muongori wa xikolo xa hina a kombiseke filimi ya nhluvuko wa munhu hi xiyexe, ndzi tisele swichudeni-kulorhi swo hambana-hambana un’wana ni un’wana kopi ya buku leyi nge Your Youth—Getting the Best out of It. Ndzi va byele leswaku buku leyi hakunene yi ndzi pfunile ku twisisa ku hundzuka ni swiphiqo leswi fambisanaka ni ku kula.

“Nakambe, loko van’wana eklasini ya mina va vona vanhwanyana lava va hlaya ni ku vulavula hi buku leyi, va ndzi vutise loko na vona va nga kuma kopi—hambi va ri vafana van’wana va endle tano. Kutani ke, ti hlanganile, ndzi fambise 17 wa tibuku leti nge Youth enkarhini wolowo. . . .

“Eka khamba rin’wana wanhwana exikolweni u ndzi byele leswaku u ve kona exikolweni xa Sonto naswona u hlaye Bibele, kambe a nga yi twisisanga. Ndzi n’wi byele leswaku ndzi ni Bibele leyi swi olovaka ku yi hlaya naswona ndzi ta tsakela ku n’wi tisela ya yena n’wini. A ndzi n’wi tiselanga New World Translation ntsena kambe ndzi tlhele ndzi n’wi tisela ni kopi ya Buku Yanga ya Timhaka ta Bibele ivi ndzi komba ndlela leyi buku leyi yi nga n’wi pfunaka ha yona hakunene eku twisiseni ka Bibele. A a nyanyuleke ngopfu ha swona.”

Susan u titwisa ku yini hi ku veka vumbhoni exikolweni? “Hakunene ndzi tsakela ku veka vumbhoni eka vanghana va mina exikolweni naswona ndzi swi teka ri ri lunghelo ku va ni nsimu leyi yo hlawuleka.”

Xana u le xikolweni? Hikwalaho ka yini u nga tirhisi ‘nsimu ya wena leyi hlawulekeke’?