A A Rhandza Leswi A A Swi Dyondza

KA HA ku kumeka papila leri tsariweke hi wansati un’wana loko a a ri kusuhi ni ku dlayiwa hi vuvabyi bya khensa hi May 2004. A a nga si heta ku tsala papila rakwe, swi vonaka onge xiyimo xi sungule ku nyanya ku biha a ha tsala. Kambe lava hlayeke papila rakwe, leri a tsandzekeke ku ri rhumela, va khavaxele mihloti, naswona ri ake ripfumelo ra vona eka Xikwembu.

Epapileni rero, mutsari wa rona Susan, u vula leswaku a a ha ri n’wana wa kondlo-a-ndzi-dyi loko a fonela nkulu la nga Mukreste wa Timbhoni ta Yehovha eConnecticut, le U.S.A. U ye mahlweni a hlamusela xiyimo lexi a langutaneke na xona emalembeni wolawo ya kondlo-a-ndzi-dyi. Mana wa Susan u kume papila rero ro tsakisa eku heleni ka n’wexemu hiloko a rhumela kopi ya rona eyindlu-nkulu ya Timbhoni ta Yehovha le New York.

Susan u vule leswaku u kume nomboro ya riqingho ya nkulu yoloye wa le Connecticut ebukwini ya tinqingho hi 1973. U te: “Lembe rero, loko ndzi ri ni malembe ya 14, endzhaku ko hlaya tikopi ta Xihondzo xo Rindza ni Xalamuka!, ndzi endle xiboho xa leswaku leswi ku fanele ku ri ntiyiso. Leswi a ndzi nga si tshama ndzi hlangana ni Timbhoni ta Yehovha, ndzi lave Timbhoni ebukwini ya tinqingho kutani ndzi hlawula nomboro leyi a yi ri ni khodi ya ndhawu ya ka hina. Loko Makwerhu Genrich a hlamula, u hlamarile ku twa leswaku a ndzi si tshama ndzi hlangana ni Mbhoni.”a

Xiphiqo Xo Hlamarisa

Susan u hlamuserile epapileni rakwe leswaku loko a ri ni malembe ya khume, u yisiwe eConnecticut leswaku a ya tshama ni mhani-ntsongo wakwe. A a fanele a tshama swa xinkarhana, kambe endzhakunyana ka nkarhi, Susan u byele mana wakwe, loyi a a tshama eFlorida, leswaku u lava ku tshama kwalaho ni mhani-ntsongo wakwe. Epapileni rakwe, Susan u tsale leswaku xiyimo xakwe a xi fana ni xa vuvabyi lebyi va nge i “Stockholm syndrome, laha munhu a hetelelaka a va ni vunghana ni lava va n’wi tshikileleke.”b A a khomiwe hi ndlela yo biha swinene.

Susan u tsale a ku: “Mhani-ntsongo ni munghana wakwe a va ndzi xanisa swinene. Tlhandlakambirhi, a hi vangani vanhu va le handle lava a va pfumeleriwa ku nghena endlwini yakwe. Loko a ndzi pfumelela ku ya exikolweni, a a nga ndzi nyiki swakudya swa ninhlikanhi kumbe swiambalo leswinene, hambileswi Mhani a a n’wi rhumela mali yo tala ya ku ndzi wundla. A ndzi ri ni xirhangiso xin’we ntsena, kasi vana va mhani-ntsongo vona, lava a va ri vatsongo eka mina, a va ri na hinkwaswo leswi va swi lavaka.” U boxe leswi ku kombisa leswaku a a swi tiva leswaku u ta dya naxo, loko mhani-ntsongo wakwe o swi kuma leswaku u lava ku dyondza swo tala hi Bibele.

Ndlela Leyi Susan A Kumeke Vutivi Lebyi Engetelekeke Bya Bibele Ha Yona

Susan u tsale a ku: “Makwerhu Genrich u ndzi tivise eka Laura, makwerhu wa xisati la nga Mukreste la wupfeke, naswona u hete nkarhi wo leha a hlamula swivutiso swa mina swo tala swa Bibele, hakanyingi a hi hlangana le ku hlantswiwaka kona timpahla.” Susan u hlamusele leswaku a a nga si tshama a tiendlela swiboho swakwe ku fikela nkarhi wolowo nileswaku endzhaku ka mabulo lawa niloko a hete ku hlaya buku leyi sekeriweke eBibeleni yo kota leyi nge, Ntiyiso Lowu Yisaka eVuton’wini Lebyi Nga Heriki, u tiendlele swiboho swakwe.

Susan u ye emahlweni a ku: “A ku ri hi Ravuntlhanu nivusiku, loko ndzi byela mhani-ntsongo leswaku a ndzi ri karhi ndzi vulavula ni Timbhoni. U ndzi sindzise ku heta vusiku byebyo hinkwabyo ndzi yime hi milenge, exikarhi ka khixi. Endzhaku ka sweswo, a ku ri hava lexi a xi ta ndzi sivela ku va Mbhoni.”

Ku sukela hi nkarhi wolowo ku ya emahlweni, Makwerhu Genrich u hambete a nyika Susan tibuku leti a ti ta n’wi pfuna ku twisisa Bibele. Susan u tsale a ku: “Ndzi tsundzuke Buku Ya Lembe Ya 1974 Ya Timbhoni Ta Yehovha, hikuva yi vike ndlela leyi Timbhoni ta le Jarimani ra Manazi ti tiyiseleleke nxaniso ha yona endzhaku ka Nyimpi ya Vumbirhi ya Misava niloko nyimpi yi ri karhi yi hisa. . . . Hi wona nkarhi lowu ndzi kombeleke nkulu ku ndzi rhekhodela tinsimu ta Mfumo leswaku ndzi ti dyondza. Ku nga si hela ni lembe, a ndzi swi kota ku yimbelela tinsimu hinkwato ta 119 leti nga ebukwini ya tinsimu ya 1966, leyi nge, ‘Singing and Accompanying Yourselves With Music in Your Hearts.’”

“Hi nkarhi wolowo, Makwerhu Genrich u tlhele a ndzi siyela tinkulumo ta Bibele leti rhekhodiweke, tidrama ni tinkulumo leti rhekhodiweke enhlengeletanweni. A a fika a ti veka ekusuhi ni mhandzi yo karhi ya riqingho ya Vukhume kutani mina ndzi fika ndzi ti teka kwalaho. . . . Xiyimo lexi a ndzi ri eka xona xi sungule ku ndzi pfilunganya hikuva se a ndzi endle nhluvuko lowukulu kambe a ndzi nga si ya ni le ka nhlangano wun’we. Ndzi vona onge swi fike laha ndzi heleriwaka hi matimba.”

Susan u vule leswaku malembe yo hlayanyana lama landzeleke a ma tika swinene. A a nga ha vonani ni Timbhoni timbirhi leti a a tiva tona ntsena. Kambe u vule leswaku ku “dyondza tinsimu hinkwato swi endle leswaku ndzi nga ‘ntshunxeki.’” Ha yini? “Hikuva a ndzi tsundzuka marito ya tinsimu, ku fana ni lama nge, ‘Masocha ya Yah a ma lavi vutomi byo olova.’ A ndzi swi tiva leswaku marito wolawo ma tsariwe hi Mbhoni leyi a yi ri ekampeni ya nxaniso hi nkarhi wa Nyimpi ya Vumbirhi ya Misava, kutani sweswo swi engetele gome ra mina. A ndzi tivona ndzi ri toya naswona a ndzi ehleketa leswaku Yehovha u ndzi lahlile.”c

Ndzi Hetelela Ndzi Ntshunxekile

“Swilo swi cince loko ndzi va ni malembe ya 18. Se a ku hundze malembe ku nga si tshama ku nghena Mbhoni emutini wa ka hina hikuva a hi tsariwe eka nxaxamelo wa ‘lava ku nga ngheniwiki eka vona.’ Kambe hi siku rero, ku fike un’wana loyi a a huma evandlheni rin’wana, kutani ndzi swi kotile ku vulavula na yena hikuva a ndzi sele ndzi ri ndzexe. A ku ri ro sungula ndzi tikuma ndzi sele ndzi ri ndzexe ekaya hi Mugqivela. Leswi ndzi swi teke tanihi xitiyisekiso xa leswaku Yehovha a nga ndzi lahlanga. Kutani ndzi fonele Makwerhu Genrich, loyi a ndzi n’wi fonerile eku sunguleni, ndzi n’wi byela leswaku a ndzi lunghekele ku rhurha, kutani ndzi kombela switsundzuxo eka yena. Eku heteleleni, u ndzi pfunile ku rhurha.”

Susan u rhurhele endhawini yin’wana hi April 1977. Papila rakwe ri engeterile: “Hi haxawa wa kona, ndzi swi kotile ku ya eminhlanganweni ni le tinhlengeletanweni hinkwato, naswona ndzi sungule ni ku chumayela. Ndzi tlhele ndzi hlangana na mana wa mina. A a nga swi tivi leswaku a ndzi khomiwe hi ndlela yo bihisa xileswi malembe wolawo hinkwawo, kutani u twe ku vava swinene. U vhele a nghenelela kutani a tiyiseka leswaku ndzi kuma xin’wana ni xin’wana lexi ndzi xi lavaka. Manana a ha ku rhurhela le Alaska emalembeni ma nga ri mangani lama hundzeke. Tanihi leswi a kombiseke ku tsakela lokukulu eka tidyondzo ta Bibele, ndzi rhurhele le Alaska leswaku ndzi ya tshama na yena HI 1978. Eku heteleleni u ve Mbhoni naswona wa ha tshembekile ku fikela ninamuntlha.

“Loko se ndzi sungule ku va kona eminhlanganweni, Makwerhu Genrich u hlele riendzo ra ntlawa leri yaka eyindlu-nkulu ya Timbhoni ta Yehovha eBrooklyn, le New York, naswona u ndzi rhambile leswaku ndzi famba na vona. Yoleyo a ku ri nyiko leyikulu ku tlula hinkwato leyi munhu a tshameke a ndzi nyika yona, hikuva yi endle leswaku ndzi tlangela nhlengeletano ya Yehovha vutomi bya mina hinkwabyo. Ndzi gimeta kwala. Ndzi lo yi katsakanya hikuva a ndzi lava ku yi heta nkarhi wa ha ri kona.”

Mhaka leyi nga laha henhla ko va xiphemu xa papila leri leheke matluka ya tsevu ni hafu. Loko a gimeta papila rakwe, Susan u te: “A ndzi vabya ngopfu exibedlhele n’hweti leyi nga hundza, naswona a ndzi ehleketa leswaku ndza fa . . . Ndzi khongele eka Yehovha ndzi kombela leswaku loko ndzo hanya mavhiki mambirhi ndzi ri kahle, ndzi ta lunghisa swin’wana. . . . A ndzi rindzelanga ku hanya nkarhi wo leha, kambe ndza swi vona leswaku malembe lawa ndzi ma heteke ndzi ri entiyisweni, a ma ri kahle ngopfu, hi wona lawa ndzi hanyeke vutomi lebyinene ku tlula hambi ku ri rini.”

A ku ri hava marito yo lela kumbe nsayino, naswona papila rero a ri rhumeriwanga. Lava va ri kumeke a va nga swi tivi leswaku ri fanele ri nyikiwa mani. Kambe, hilaha hi boxeke hakona eku sunguleni, papila rero ri hetelele ri rhumeriwe mana wa Susan.

Ku Tiva Swin’wana Hi Susan

Endzhaku ka ku khuvuriwa ka Susan hi April 14, 1979, mana wakwe u tlhelele eFlorida. Susan u sale le Alaska, tanihi leswi a a endle vunghana lebyikulu ni swirho swa Vandlha ra le North Pole. U nghenele ntirho wa vuphayona bya nkarhi hinkwawo endzhakunyana ka sweswo. Eku heteleleni, u rhurhele eFlorida, naswona hi 1991, u tekane ni phayona-kulobye leri nga Mukreste, leri feke endzhakunyana ka ku fa ka Susan.

Susan ni nuna wakwe a va ri mpatswa lowu rhandzekaka swinene lowu hlanganyeleke evutirhelini bya nkarhi hinkwawo swin’we kukondza vuvabyi byi va sivela ku ya emahlweni. U hete malembe lama tlulaka 20 a ri evutirhelini bya nkarhi hinkwawo. Nkulumo ya xilahlo enkosini wakwe eFlorida a yi yingiseriwe ni hi Vandlha ra le North Pole hi riqingho.

Papila ra Susan ri hi pfuna leswaku hi yi vona kahle mikateko leyi kumiwaka hi lava va tirhelaka Yehovha ni ntshembo lowunene wa ku pfuxiwa ka vafi. (Mintirho 24:15) Ntokoto lowu wu swi kombisa kahle leswaku Xikwembu xi le kusuhi ni hinkwavo lava tshinelaka eka xona!—Yakobo 4:7, 8.

[Tinhlamuselo ta le hansi]

[Marito lama tshahiweke exihlokweni lama nga eka tluka 23]

“Malembe lawa ndzi ma heteke ndzi ri entiyisweni, a ma ri kahle ngopfu, hi wona lawa ndzi hanyeke vutomi lebyinene ku tlula hambi ku ri rini”

[Xifaniso lexi nga eka tluka 21]

Loko Susan a ri ni malembe ya khume

[Xifaniso lexi nga eka tluka 23]

Susan a ri ni nuna wakwe, James Seymour