Mikateko Leyi Tisiwaka Hi Ku Tlangela Rirhandzu Ra Yehovha—Xiyenge 1

¹ Muapostola Yohane u tsale a ku: ‘Loko ku ri hina, hi ni rirhandzu, hikuva Yehovha hi yena a nga sungula a hi rhandza.’ (1 Yoh. 4:19) Loko hi anakanya hi swilo hinkwaswo leswi Yehovha a hi nyikeke swona, hi susumeteleka ku kombisa leswaku ha swi tlangela swinene. Yesu u hi vekele xikombiso xa ku tlangela, hi ku titsongahatela ku chumayela hi vito ni Mfumo wa Xikwembu. (Yoh. 14:31) Swi ta hi vuyerisa ku anakanyisisa hi tindlela tin’wana leti hi nga kombisaka ku tlangela rirhandzu ra Yehovha ha tona ni mikateko leyi hi yi kumaka hi ku endla tano.

² Ku Famba Hi Yindlu Ni Yindlu: Yesu u dyondzise vadyondzisiwa va yena ndlela leyi va nga wu endlaka ha yona ntirho wo chumayela hi Mfumo. Swiletelo swa yena swi swi veka erivaleni leswaku a va famba hi yindlu ni yindlu, va chumayela mahungu lamanene. (Luka 9:1-6; 10:1-7) Hi fanele hi rhandza Xikwembu ni vaakelani leswaku hi hambeta hi famba hi yindlu ni yindlu, hambiloko vanhu va nga tsakeli naswona va hi kaneta. Hambiswiritano, ha vuyeriwa hi ku endla tano, hikuva ripfumelo ra hina ra tiyisiwa, hi ya hi khorwiseka swinene naswona ntshembo wa hina wu ya wu va wa xiviri.

³ Hi ku kongomisiwa hi tintsumi, hi kume vanhu vo tala lava nga ni ndlala ni torha ra ntiyiso. (Nhlav. 14:6) Vini va miti va vule leswaku a va ri karhi va khongela loko Mbhoni yi va endzela. Timbhoni timbirhi leti a ti famba ni n’wana a ti ri karhi ti famba hi yindlu ni yindlu exihlaleni xa Kharibiya. Loko timbhoni leti ti endla xiboho xa leswaku se ta wisa, n’wana u ye emahlweni a ri yexe a ya gongondza endlwini leyi landzelaka. Hiloko rivanti ri pfuriwa hi nhwanyana wo karhi. Loko timbhoni leti ti n’wi vona, ti yile ti ya vulavula na yena. U ti amukerile kutani a ti byela leswaku a a ri karhi a khongela leswaku Xikwembu xi n’wi rhumelela Timbhoni leswaku ti ta n’wi dyondzisa Bibele!

⁴ Ku Chumayela eSwitarateni: Leswi swi tikaka ngopfu etindhawini tin’wana ku kuma vanhu emakaya, ndlela leyi humelelaka ya ku nyikela vanhu vumbhoni i ku chumayela exitarateni. Ku tlula kwalaho, vanhu vo tala va tshama emiakweni leyi tinyangwa ta yona ti tshamaka ti gogiwile kumbe leyi swi tikaka ku nghena eka yona, laha hi nga taka hi nga swi koti ku nghena hi yindlu ni yindlu. Hambiswiritano, ku tlangela ka hina rirhandzu ra Yehovha ku ta hi susumetela ku tirhisa ndlela yin’wana ni yin’wana leyi hi nga yi kotaka leswaku hi vulavurisana ni vanhu hi rungula ra Mfumo, ku katsa ni ku chumayela exitarateni.—Swiv. 1:20, 21.

⁵ Ku Endla Maendzo Yo Vuyela: Leswi hi lavaka vanhu lava “khathalaka hi xilaveko xa vona xa moya” hi lava ku endla hinkwaswo leswi hi nga swi kotaka leswaku hi enerisa xilaveko xexo. (Mat. 5:3) Sweswo swi lava leswaku hi cheleta timbewu ta ntiyiso leti hi ti byaleke. (1 Kor. 3:6-8) Makwerhu un’wana wa xisati eAustralia u nyike wansati un’wana xiphephana, loyi a a nga vonaki a tsakela. Nilokoswiritano, makwerhu u ye ko tala ekaya rakwe a ta n’wi lava. Loko a n’wi kumile, u xiye leswaku wansati loyi u sale a xava Bibele yo durha endzhaku ka loko a n’wi endzerile ro sungula. Makwerhu loyi wa xisati u sungule ku n’wi dyondzela!

⁶ Ku Fambisa Tidyondzo Ta Bibele: Lowu wu nga va ntirho lowu tsakisaka swinene ni lowu vuyerisaka evutirhelini bya hina. I nkateko ku pfuna vanhu leswaku va dyondza hi Yehovha ni ku va vona va hundzula vutomi bya vona leswaku va n’wi tsakisa, kutani u va vona va khuvuriwa tanihi Vakreste, ku ri xikombiso xa ku tinyiketela ka vona eka Xikwembu!—1 Tes. 2:20; 3 Yoh. 4.

⁷ Eka xihloko lexi landzelaka, hi ta bula hi tindlela leti engetelekeke, leti hi katekisiwaka ha tona hi ku kombisa ku tlangela rirhandzu ra Yehovha.