Khathalela Swinene Vanhu Hinkwavo Lava Kombiseke Ku Tsakela
1 Ntirho wa misava hinkwayo wa ku twarisa Mfumo wu ta hela ku nga ri khale, laha endzhaku hinkwavo lava ‘nga tiviki Xikwembu’ va nga ta lovisiwa. (2 Tes. 1:7-9) Xisweswo, ku khathalela vutomi bya van’wana hi xiviri swi susumetela vanhu va Yehovha leswaku va fikelela vo tala hilaha swi nga kotekaka hakona hi rungula ra Mfumo.—Sof. 2:3.
2 N’hweti yin’wana ni yin’wana, ku hetiwa timiliyoni ta tiawara eku lavisiseni ka lava lavaka ku twa “timhaka le’ti ṭakisaka.” (Esa. 52:7) Hikwalaho ko yingisa xiringanyeto xa nyiko ya sweswinyana ya buku, vanhu vo tala va amukele swikhokhelo swa Xihondzo xo Rindza ni Xalamuka!, tikopi ta timagazini, kumbe broxara leyi nge I Yini Leswi Xikwembu Xi Swi Languteleke Eka Hina? Ku khathalela vanhu lava hi xiviri swi fanele swi hi susumetela ku landzela ku tsakela hinkwako loku kombisiweke.—Swiv. 3:27.
3 Hlayisa Tirhekhodo Leti Tsariweke Kahle: Ku ta hetisisiwa swo tala loko u hlayisa rhekhodo leyi hetisekeke ni leyi kongomeke ya vanhu lava tsakelaka ni ya leswi fambisiweke. Rungula ro tanihi vito ra n’wini wa muti ni adirese ya yena, siku ni nkarhi lowu u nga endza ha wona, buku leyi fambisiweke, ni mhaka leyi mi buleke ha yona swi ta ku pfuna leswaku u humelela swinene loko u tlhelela. Nakambe, loko u swi tsala ehansi leswi vuriweke hi n’wini wa muti ebulwini ra n’wina ro sungula, u nga kota ku vulavula ha swona hilaha ku humelelaka loko u sungula bulo eka riendzo ro vuyela.
4 U Nga Hlweli Ku Endla Maendzo Yo Vuyela: I vanhu vangani eka lava amukeleke tibuku eka wena n’hweti leyi nga hundza lava u ringeteke ku tlhela u va endzela? Xana ku hundze mavhiki u nga si vonana na vona? Ku khumbeka swinene hi vuhlayiseki bya vona bya hilaha ku nga heriki ku fanele ku ku susumetela ku tlhelela hi xihatla hilaha swi nga kotekaka hakona, ngopfu-ngopfu endzhaku ka masiku ma nga ri mangani, leswaku leswi mi vulavuleke ha swona swi va swa ha ri swintshwa emianakanyweni. Hi ku tlhelela hi xihatla leswaku u ya yisa ku tsakela ka vona emahlweni, u nga ha kota ku sivela matshalatshala ya Sathana a nga si “hatlisa a ta eka vona, a va tekela Rito leri haxiweke eka vona.”—Mar. 4:15.
5 Ku Lunghiselela I Swa Nkoka: Ku humelela ka wena eku endleni ka maendzo yo vuyela swi titshege hi ndlela leyinene leyi u lunghiselelaka ha yona. Kunguhata xingheniso xa wena u nga si famba. Tluka ra le ndzhaku ra Vutirheli Bya Hina Bya Mfumo bya April 1997 ri nyikela swingheniso swo hambana-hambana leswi nga ha tirhisiwaka hi ndlela leyi humelelaka swinene loko u fambisa swikhokhelo, timagazini kumbe broxara leyi nge Leswi Xi Swi Languteleke. Xin’wana i ku va ni tinhla to karhi emianakanyweni leti u nga bulaka ha tona loko u tlhelela. I yini leswi nga vuriwaka loko u landzela ku tsakela? Xana dyondzo ya Bibele yi nga sunguriwa njhani?
6 Loko u yisa bulo emahlweni mayelana ni leswi nga lavekaka leswaku ku basisiwa misava ni ku yi endla ndhawu yo antswa yo hanya eka yona, u nga ha ku:
◼ “Eriendzweni ra mina leri nga hundza, hi pfumelelanile leswaku ku fanele ku tekiwa magoza ya xihatla misava yi nga si endliwa paradeyisi yo rhula. Xana u ehleketa leswaku vanhu va ni leswi va swi lavaka ku endla ntirho lowu? [Yimela nhlamulo.] Ndzi kombela u xiya xivangelo xo va swi fanerile leswaku Xikwembu xi nghenelela etimhakeni ta vanhu.” Hlaya Pisalema 37:38. Kutani u pfula dyondzo 5 eka broxara leyi nge Leswi Xi Swi Languteleke, ivi u tirhisa tinhla leti hlawuriweke eka tindzimana 4-5 u n’wi kombisa ndlela leyi Xikwembu xi nga ta hetisisa vuprofeta lebyi ha yona. Tikarhatele ku nyikela dyondzo ya Bibele hi ku tirhisa broxara leyi.
7 Loko mi bule hi Mfumo wa Xikwembu naswona u fambise broxara leyi nge “Leswi Xi Swi Languteleke” eriendzweni ro sungula, loko u tlhelela u nga ha vula swin’wana swo fana ni leswi:
◼ “Loko hi vulavula enkarhini lowu nga hundza, hi vone Mfumo wa Xikwembu wu ri hulumendhe ya xiviri leyi nga ta fuma misava hinkwayo. Bibele yi kombisa leswaku Kreste Yesu u ta va mufumi wa yona. Xana wa yi ehleketa mimbuyelo yo va ni hulumendhe ni murhangeri wa muxaka lowu?” Yimela nhlamulo. Pfula broxara leyi nge Leswi Xi Swi Languteleke eka dyondzo 6. Loko u tirhisa tinhla leti hlawuriweke eka tindzimana 6-7 ni xifaniso lexi nga eka tluka 13, kombisa leswi Mfumo wa Xikwembu wu nga ta va endlela swona vanhu enkarhini lowu taka. Hlaya Daniyele 2:44, naswona loko swi fanerile, n’wi hlamusele hi buku leyi nge Vutivi ivi u lunghiselela dyondzo ya Bibele.
8 Loko u kuma munhu la pfumelaka leswaku vukhongeri bya misava byi vangele vanhu swiphiqo, u nga ha vutisa xivutiso lexi eriendzweni ro vuyela:
◼ “Xana u tshama u tivutisa leswaku i vukhongeri byihi lebyi amukeriwaka hi Xikwembu? [Yimela nhlamulo.] Broxara leyi leyi nge I Yini Leswi Xikwembu Xi Swi Languteleke Eka Hina? yi nyika swikombiso leswi xiyekaka swa vukhongeri bya ntiyiso.” Pfula eka dyondzo 13, kutani u kandziyisa tinhla ta ntlhanu leti tsariweke hi swo voyama eka tindzimana 3-7. U nga ha ya emahlweni u ku: “Ku engetela eku kumeni ka vukhongeri bya ntiyiso, hi fanele hi kumisisa leswi Xikwembu xi swi languteleke eka hina ha un’we-un’we.” Hlaya Yohane 4:23, 24. N’wi byele leswaku mi ta yisa bulo leri emahlweni. Pfula dyondzo 1 ya broxara leyi, ivi u n’wi komba ndlela leyi hi yi dyondzaka ha yona.
9 Loko u tlhelela ku ya yisa bulo emahlweni malunghana ni ntsako endyangwini, u nga vula swin’wana swo fana ni leswi landzelaka:
◼ “Loko hi hlangana ro sungula, ndzi burisane na wena hi ta xihundla xa ntsako endyangwini, lexi nga kumiwaka hi ku tirhisa ndzayo leyi kumekaka eRitweni ra Xikwembu, ku nga Bibele. Loko swi ta eku langutaneni ni swilaveko swa ndyangu wa manguva lawa, xana u pfumela leswaku Bibele yi hundzeriwe hi nkarhi kumbe leswaku ya ha tirha?” Yimela nhlamulo. Humesa buku leyi nge Vutivi. Yana eka ndzima 2, kutani u hlaya marito lama tshahiweke eka ndzimana 13. Loko u tirhisa tinhla leti nga eka ndzimana 3, simeka dyondzo ya Bibele ya ndyangu.
10 Hi ku hlayisa tirhekhodo leti kongomeke, ku endla malunghiselelo lama faneleke ni ku tlhelela hi ku hatlisa leswaku hi ta yisa ku tsakela ka vona emahlweni, hi nga kombisa muxaka wa rirhandzu ra muakelani leri nga ta va tshineta endleleni ya ku ponisiwa.—Mt. 22:39; Gal. 6:10.