Ku Tirhisa Buku Leyi Nge Nghwazi Eka Maendzo Yo Vuyela
1 Muapostola Pawulo a a wu tiva nkoka wa ku gingiriteka eku khathaleleni ka lava kombiseke ku tsakela ntiyiso. U va fanise ni swimilana swo olova, leswi lavaka ku cheletiwa ni ku hlakuleriwa nkarhi na nkarhi. (1 Kor. 3:6-9) Hi ku fanana namuntlha, lava tsakelaka va lava nkhathalelo wa rirhandzu lowu hi va kombaka wona loko hi endla maendzo yo vuyela leswaku hi hlakulela ku kula ka vona ka moya.
2 I swinene ku tsundzuka leswaku vanhu lava hi va endzelaka hakanyingi va ta lava ku tsundzuxiwa, leswaku hi va pfuna va tsundzuka tinhla leti vuriweke eka bulo ra hina ra nkarhi lowu hundzeke. Hikokwalaho, eka riendzo rin’wana ni rin’wana ro vuyela swi nga ha va swinene ku pfuxetanyana leswi mi buleke ha swona eka riendzo ra nkarhi lowu hundzeke, u talela eka tinhla leti ngopfu-ngopfu n’wini wa muti a ti tlangeleke. Katsa n’wini wa muti ebulwini ivi u hatla u twisisa ku tsakela ni swilaveko swakwe.
3 Loko u endla riendzo ro vuyela, hambi loko buku leyi nge “Nghwazi,” yi tekiwile kumbe yi nga tekiwanga, u nga ha tirhisa ku tshinelela loku kongomeke leswaku u sungula dyondzo:
◼ U nga ha vutisa: “I yini lexi endleke Yesu a va nghwazi ya misava?” U nga ha hlamula xivutiso lexi hi ku kombetela eka tindzimana ti nga ri tingani eka ta 133 leti vulavulaka hi vutomi byakwe, vumunhu byakwe, ku dyondzisa kakwe ni mintirho yakwe. Ndzima 24 yi hlamusela xikongomelo xa yena xa ku ta emisaveni. Ndzima 35 yi hlamusela Dyondzo yakwe leyi tivekaka ya le Ntshaveni. Ndzima 133 yi hlamuselanyana mikateko leyi vanhu va nga ta yi kuma loko a heta ntirho wakwe. Komba n’wini wa muti ndlela leyi swivutiso ni matsalwa eku heleni ka ndzima yin’wana ni yin’wana swi hi pfunaka ha yona ku twisisa tinhla ta nkoka swinene ta ndzima yin’wana ni yin’wana. Hlanganisa tinhla ti nga ri tingani ivi u endla malunghiselelo lama tiyeke ya ku tlhela u vuya.
4 Ku tshinelela kun’wana ku nga ha va loku:
◼ “Ndzi ri tsakele ngopfu bulo ra hina vhiki leri nga hundza. Vanhu vo tala va phofule ku khumbeka hi swiyimo swa misava leswi yaka swi biha. Ndzi ehlekete leswaku ndzima 111 ya buku leyi, Nghwazi Leyi Tshameke Yi Hanya, u ta yi tsakela. [Lunghiselela ku hlamusela swiyenge leswi u swi hlawuleke eka ndzima 111 swo hlamula xivutiso xin’we kumbe swimbirhi swa mpfuxeto eku heleni ka ndzima, hi xikombiso: “I swiyimo swihi swa misava leswi funghaka vukona bya Kriste?” kumbe “I xifaniso xihi lexi Yesu a xi nyikaka ku pfuna vadyondzisiwa va yena va nkarhi lowu taka ku twisisa loko makumu ma ri kusuhi?”] Hi ku ya hi leswi hi swi hlayaka laha, hi wihi ntshembo wa hina wa nkarhi lowu taka? [Yimela nhlamulo ivi u bumabumela n’wini wa muti.] Hi fanele hi endla yini loko hi ri ni ntshembo wo pona makumu ya mafambiselo lawa yo biha?” Hlaya Yohane 17:3 kutani u nyikela dyondzo ya le kaya ya Bibele ya nkarhi na nkarhi.
5 Endzhaku ka riendzo ra nkarhi lowu hundzeke laha u fambiseke kona buku leyi nge “Nghwazi,” u nga ha ku:
◼ “Nkarhi lowu hundzeke loko ndzi endzile, hi bule hi swiyimo swa misava leswi ku lavekaka leswaku swi cinca. Xana u tshame u tivutisa leswaku swiyimo swi ta va njhani eka misava leyi loko vubihi byi nga ha ri kona?” Yimela nhlamulo ivi u pfula eka ndzima 133, u xiya swivutiso swimbirhi swa mpfuxeto eku heleni ka ndzima. Hlaya u tlhela u hlamusela tindzimana leti hlamulaka swivutiso leswi, u pfula matsalwa man’wana eku heleni ka ndzima. U nga ha engetela bulo hi ku pfula xifaniso lexi nga eka ndzima yoleyo.
6 Laha Ku Siyiweke Xiphephana: Nkarhi wun’wana xiphephana xi siyiwa eka riendzo ro sungula. Loko u endla maendzo yo vuyela, u nga ha bula hi ndzimana yin’we kumbe timbirhi exiphephanini kun’we ni matsalwa lama kombisiweke. Loko munhu a tsakela, u nga ha nyikela buku leyi nge Nghwazi, u endla malunghiselelo yo yisa bulo emahlweni eka riendzo ra wena leri landzelaka.
7 Tanihi leswi hi ku tshembeka hi khathalelaka ku cheleta swimilana swo olova swa ripfumelo ra Vukreste leswi hi faneleke ku swi khathalela, Xikwembu xi ta swi kurisa leswaku swi xi dzunisa ni ku xi tlakusa.—1 Kor. 3:7.