Landzelela Ku Tsakela Loku U Ku Kumeke
1 Loko hi tirha hi yindlu ni yindlu, hakanyingi a hi swi koti ku heta nkarhi wo tala ni munhu la tsakelaka. Hakanyingi ntirho wa xiviri wo dyondzisa wu endliwa loko hi endla maendzo yo vuyela ni loko hi fambisa tidyondzo ta le kaya ta Bibele. (Mt. 28:19, 20) Leswaku hi ta dyondzisa hi laha ku humelelaka eka maendzo yo vuyela, hi fanele ku pfuxeta leswi hi swi vuleke eka riendzo ro sungula kutani hi hlela ku yisa bulo emahlweni.
2 Loko mi bule hi ku tsekatseka ka lunghiselelo ra ndyangu, u nga ha tirhisa mhaka leyi nga eka ndzima 29 ya buku leyi nge “Hanya Hi Masiku.” U nga ha vula leswi:
◼ “Eku sunguleni hi vulavule hi vutlharhi byo landzela ndzayo ya Bibele leswaku hi ta va ni vutomi lebyi tsakisaka bya ndyangu. Xana u ehleketa leswaku hi xihi xilotlelo xo endla mindyangu yi va ni vun’we namuntlha?” Yimela nhlamulo. Kombetela eka ndzimana 27 eka tluka 247, kutani u hlaya Vakolosa 3:12-14. Yana emahlweni u hlamusela u kombisa ndlela leyi rirhandzu ra xiviri ri nga hlanganisaka mindyangu ha yona. Hlamusela ndlela leyi dyondzo leyi hleriweke ya buku leyi nge Hanya Hi Masiku yi nga pfunaka ku ololoxa swiphiqo ha yona.
3 Loko mi bule hi swiyimo swa misava leswi onhakaka eriendzweni ra wena ro sungula, u nga ri yisa emahlweni hi ku vula leswi:
◼ “Ndza tshemba u ta pfumelelana na mina leswaku ku laveka ku cinca lokukulu leswaku hi kota ku hanya hi ku rhula. Bibele yi kombisa leswaku Sathana i muvangi lonkulu wa swiphiqo swa hina. Vo tala va tivutisa leswaku ha yini Xikwembu xi n’wi pfumelele nkarhi wo leha hi ndlela leyi. Xana u ehleketa yini ha swona?” Yimela nhlamulo. Pfula eka tluka 20, tindzimana 14 na 15, ebukwini leyi nge Hanya Hi Masiku, kutani u hlamusela xivangelo xa ku va Sathana a nga si herisiwa. Kutani hlaya Varhoma 16:20, leyi kombisaka leswi hi nga swi langutelaka ku nga ri khale.
4 Loko mi bule hi mikateko leyi nga ta va kona ehansi ka vulawuri bya Mfumo, eka riendzo ra wena ro vuyela, u nga ha vula leswi:
◼ “Mfumo wa Xikwembu wu ta tisela misava ni vanhu mikateko leyi hlamarisaka. Mikateko leyi yi kombisiwe kahle laha eka matluka 12 na 13. Xana u tsakisiwa hi yini eka leswi u swi vonaka? [Yimela nhlamulo.] Anakanya leswaku a swi ta va njhani ku hanya emisaveni yo fana ni leyi.” Hlaya ndzimana 12. Loko ku ri ni ku tsakela, vutisa xivutiso eka ndzimana 13, kutani mi bula hi nhlamulo. Kombisa leswaku ndzima leyi yi hlamula swivutiso swo tala malunghana ni mikateko ya Mfumo ni leswaku u ta tsakela ku bula hi yona loko u vuya.
5 U nga ha kota ku sungula dyondzo hi ku vula leswi:
◼ “Vanhu vo tala va kume tinhlamulo ta swivutiso swa vona swa Bibele hi ku tirhisa buku leyi.” Pfula tluka leri nga ni nxaxamelo wa leswi nga endzeni, kutani u vutisa u ku: “Hi yihi nhloko-mhaka leyi ku tsakisaka ngopfu laha?” Yimela nhlamulo, pfula ndzima leyi n’wi tsakisaka kutani u hlaya ndzimana yo sungula. Hlamusela ndlela leyi swivutiso leswi nga ehansi ka tluka rin’wana ni rin’wana swi kandziyisaka tinhla-nkulu eka ndzimana yin’wana ni yin’wana ha yona. Kombisa hi ku hlamusela ndzimana yin’we kumbe timbirhi, kutani u endla malunghiselelo yo vuyela nakambe.
6 Ku landzelela ku tsakela ebukwini leyi nge Hanya Hi Masiku swi kombisa ku navela ka hina ko hetisisa vutirheli bya hina hi xitalo. (2 Tim. 4:5) Hi nga ha kota ku pfuna lava hi yingisaka leswaku va fanelekela vutomi lebyi nga heriki.—Yoh. 17:3.